រាជធានីភ្នំពេញ ៖ ដោយសារតែភ្លៀងធ្លាក់រាល់ថ្ងៃ ហើយនៅប៉ែកខាងក្រោមៗទឹកពេញចាល់មិនអាចហូររួច ជាហេតុធ្វើឲ្យជន់លិចផ្លូវជាតិលេខ៤ច្រើនថ្ងៃមកហើយនោះ នៅវេលាល្ងាចថ្ងៃទី១៤ ខែកញ្ញា ឆ្នាំ២០២៥ រដ្ឋបាលរាជធានីភ្នំពេញ សហការជាមួយរដ្ឋបាលខណ្ឌពោធិ៍សែនជ័យ…
រាជធានីភ្នំពេញ ៖ ដោយសារតែភ្លៀងធ្លាក់រាល់ថ្ងៃ ហើយនៅប៉ែកខាងក្រោមៗទឹកពេញចាល់មិនអាចហូររួច ជាហេតុធ្វើឲ្យជន់លិចផ្លូវជាតិលេខ៤ច្រើនថ្ងៃមកហើយនោះ នៅវេលាល្ងាចថ្ងៃទី១៤ ខែកញ្ញា ឆ្នាំ២០២៥ រដ្ឋបាលរាជធានីភ្នំពេញ សហការជាមួយរដ្ឋបាលខណ្ឌពោធិ៍សែនជ័យ និងរដ្ឋបាលសង្កាត់ចោមចៅទី៣ បានដាក់ម៉ាស៊ីនបូមទឹកចំនួន៦គ្រឿងទៅបូមទឹកចេញពីផ្លូវជាតិលេខ៤ ត្រង់ចំណុចខាងលិចស្ពានអាកាសចោមចៅ និងតំបន់ប៉ែកខាងត្បូងផ្លូវជាតិលេខ៤ហើយ ។
លោកវ៉ា សាវឿន ចៅសង្កាត់ចោមចៅទី៣ បានប្រាប់អ្នកសារព័ត៌មាននៅព្រឹកថ្ងៃទី១៥ ខែកញ្ញាថា ទឹកលិចផ្លូវនេះដោយសារតែប៉ុន្មានថ្ងៃមក នៅក្នុងខណ្ឌពោធិ៍សែនជ័យនិងកន្លែងផ្សេងទេទៀត មានភ្លៀងធ្លាក់ជាបន្តបន្ទាប់ ។ ក្រៅពីនេះក៏មានទឹកហូរមកពីតំបន់នានានៅក្នុងស្រុកអង្គស្នួល ខេត្តកណ្ដាល និងភូមិសាស្ត្រសង្កាត់កន្ទោក ខណ្ឌកំបូល រាជធានីភ្នំពេញ ចូលមកក្នុងភូមិសាស្ត្រសង្កាត់ចោមចៅទី៣ ខណ្ឌពោធិ៍សែនជ័យនេះទាំងអស់ ។
លោកចៅសង្កាត់បានប្រាប់ឲ្យដឹងបន្តទៀតថា ទឹកទាំងនេះមួយចំហៀងខាងត្បូងផ្លូវខាងត្បូងត្រូវហូរធ្លាក់ទៅកាន់ប៉ែកខាងត្បូងផ្លូវជាតិលេខ៤ ក្នុងភូមិសាស្ត្រសង្កាត់ចោមចៅទី២ ខណ្ឌពោធិ៍សែនជ័យ ឬតំបន់ជាប់នោះបន្តទៀត ។ ប៉ុន្តែដោយសារតែនៅផ្នែកខាងក្រោមនោះទឹកពេញ ទឹកមិនអាចហូរបានលឿន ទើបចាល់លិចផ្លូវជាតិលេខ៤ ខាងលិចស្ពានអាកាសចោមចៅ និងតំបន់នានាជិតនោះបែបនេះ ។
លោកបានប្រាប់បន្ថែមថា ដោយមិនអាចឲ្យទឹកលិចផ្លូវយូរនាំខូចផ្លូវ និងបង្កការលំបាកក្នុងការធ្វើដំណើររបស់ប្រជាពលរដ្ឋនោះ សាលារាជធានីភ្នំពេញក៏បានសហការជាមួយសាលាខណ្ឌពោធិ៍សែនជ័យ និងសាលាសង្កាត់ចោមចៅទី៣ ដាក់ម៉ាស៊ីនចំនួន៦គ្រឿងបូមទឹកចេញពីតំបន់នោះ ទម្លាក់ទៅទៅប៉ែកខាងជើងផ្លូវជាតិលេខ៤ ព្រោះតំបន់នោះមិនមានការស្ទះទឹកនោះឡើយ ។
បើតាមប្រជាពលរដ្ឋបាននិយាយថា ទឹកចាប់ផ្ដើមលិចផ្លូវជាតិលេខ៤នេះ តាំងពីវេលាល្ងាចថ្ងៃទី១០ កញ្ញា ឆ្នាំ២០២៥ មកម្ល៉េះ ដោយសារតែភ្លៀងធ្លាក់ខ្លាំង ហើយភ្លៀងក៏ចេះតែធ្លាក់បន្តរាល់ថ្ងៃទៀត ទើបលិចកាន់តែខ្លាំងឡើងៗ និងមិនព្រមស្រកវិញសោះ ។ បើគិតរហូតមកដល់ត្រឹមព្រឹកថ្ងៃទី១៥ ខែកញ្ញា ទោះបីជាអាជ្ញាធរដាក់ម៉ាស៊ីនបូមទឹកចេញ១យប់ហើយក្ដី ប៉ុន្តែទឹកស្រកតិចតួចប៉ុណ្ណោះ ទឹកនៅតែលិចផ្លូវដដែល ព្រោះពេលបូមនោះទឹកបានហូរចេញមកពីតំបន់ជិតនោះដែរ ៕
ចែករំលែកព័តមាននេះ