ខេត្តប៉ៃលិន ៖ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានអញ្ជើញចុះពិនិត្យមើលសង្វាក់ផលិតកម្មសម្ងួតផ្លែមៀនប៉ៃលិនក្រៀមរបស់វិស័យឯកជន នៅថ្ងៃទី២៩ ខែវិច្ឆិកា ឆ្នាំ២០២៥…
ខេត្តប៉ៃលិន ៖ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានអញ្ជើញចុះពិនិត្យមើលសង្វាក់ផលិតកម្មសម្ងួតផ្លែមៀនប៉ៃលិនក្រៀមរបស់វិស័យឯកជន នៅថ្ងៃទី២៩ ខែវិច្ឆិកា ឆ្នាំ២០២៥ សម្រាប់នាំចេញទៅកាន់ទីផ្សារក្រៅប្រទេស ដែលមានទីតាំងនៅភូមិបុសស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ នេះបើយោងតាមផេកក្រសួងមហាផ្ទៃ បានប្រកាសនាថ្ងៃទី២៩ ខែវិច្ឆិកានេះ ។
លោកជំទាវបណ្ឌិត បាន ស្រីមុំ បានមានប្រសាសន៍លើកឡើងថា បច្ចុប្បន្នរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានជំរុញឱ្យគ្រប់ភាគីពាក់ព័ន្ធបណ្តុះបណ្តាលដល់សហគមន៍ ឬបណ្តុំកសិករ ដោយផ្តល់អ្នកជំនាញទៅបណ្តុះបណ្តាលដល់មូលដ្ឋានផ្ទាល់តែម្តង គឺធ្វើយ៉ាងណា ឱ្យការដាំដុះរបស់ប្រជាកសិករទទួលបានទិន្នផលច្រើន ចំណាយលើការផលិតតិច និងមានសុវត្ថិភាព ដល់អ្នកប្រើប្រាស់ក៏ដូចជា អ្នកដាំផ្ទាល់ ជាពិសេសផលិតកសិផលទៅតាមតម្រូវការទីផ្សារក្នុងស្រុក និងនាំចេញទៅក្រៅប្រទេស ។
នៅក្នុងឱកាសនោះផងដែរ លោកជំទាវ បានមានប្រសាសន៍ថ្លែងអំណរគុណដល់ក្រុមហ៊ុនដែលបានបើករោងចក្រសហគ្រាស ដោយផ្ទាល់នៅលើទឹកដីខេត្តប៉ៃលិន ហើយជួយទិញផ្លែមៀនប៉ៃលិនពីបងប្អូនប្រជាកសិករម្ចាស់ចំការធ្វើការ សម្ងួតវេចខ្ចប់សម្រាប់នាំចេញនៅទីផ្សារក្រៅប្រទេស ហើយបានផ្តល់ការងារជាច្រើន ដល់បងប្អូនប្រជាពលរដ្ឋនៅមូលដ្ឋាន ដែលជាកត្តាជួយជំរុញសេដ្ឋកិច្ចជីវភាពរបស់ប្រជាពលរដ្ឋ និងចូលរួមអនុវត្តនូវគោលនយោបាយរបស់រាជរដ្ឋាភិបាល គឺប្រទេសកម្ពុជា ក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ ៕
ចែករំលែកព័តមាននេះ