ទីក្រុងការ៉ាកាស់៖ រដ្ឋាភិបាលវេណេហ្ស៊ូអេឡាប្រកាសថ្កោលទោសជាទម្ងន់ចំពោះសេចក្ដីថ្លែងការណ៍របស់លោកដូណាល់ត្រាំពាក់ព័ន្ធនឹងការបិទដែនអាកាសរបស់ប្រទេសនេះ និងដែនអាកាសជុំវិញនោះ។ ការប្រកាសរបស់វេណេហ្ស៊ូអេឡាធ្វើឡើងបន្ទាប់ពីលោកត្រាំបង្ហោះសារនៅលើបណ្ដាញសង្គមថាដែនអាកាសនៅពីលើប្រទេសវេណេហ្ស៊ូអេឡា រួមជាមួយដែនអាកាសជុំវិញនោះត្រូវសន្មតថាបានបិទទាំងស្រុង។
វេណេហ្ស៊ូអេឡាចាត់ទុកថាសារនយោបាយរបស់លោកត្រាំទី១-គឺជា «ការគំរាមកំហែងបែបអាណានិគមនិយម» ទៅលើអធិបតេយ្យភាពជាតិរបស់វេណេហ្ស៊ូអេឡា និងទី២-មានវិសមិតភាព ឬមិនស៊ីសង្វាក់គ្នានឹងច្បាប់អន្តរជាតិ។ សូមរំលឹកថាលោកត្រាំប្រកាសកាលល្ងាចម្សិលមិញពីការបិទដែនអាកាសដោយមិនពន្យល់លម្អិតទេ។ លោកសរសេរនៅលើបណ្ដាញសង្គមទ្រូសសូសល (Truth Social) ថា «ជូនចំពោះក្រុមហ៊ុនអាកាសចរណ៍, អាកាសយានិក, ក្រុមជួញដូរគ្រឿងញៀន និងក្រុមជួញដូរមនុស្សទាំងអស់ឱ្យបានជ្រាបថាដែនអាកាសពីលើ និងជុំវិញប្រទេសវេណេហ្ស៊ូអេឡានឹងត្រូវបិទទាំងស្រុង»។
ក្រសួងការបរទេសវេណេហ្ស៊ូអេឡាចេញសេចក្ដីប្រកាសថាខ្លួនសូមប្រឆាំងជំទាស់ និងសូមថ្កោលទោសការគំរាមកំហែងបែបអាណានិគមនិយមដែលមានចេតនាធ្វើឱ្យប៉ះពាល់អធិបតេយ្យភាពដែនអាកាសរបស់ខ្លួន។ ក្រសួងចាត់ទុកថាការប្រកាសរបស់លោកត្រាំជាចរិតឈ្លានពានទាំងខុសច្បាប់ និងមិនសមហេតុផលប្រឆាំងនឹងប្រជាជនវេណេហ្ស៊ូអេឡា។
គួរកត់សម្គាល់ថាការបង្ហោះសាររបស់លោកត្រាំធ្វើឡើងចំពេលដែលអាមេរិក និងវេណេហ្ស៊ូអេឡាកំពុងមានភាពតានតឹងនឹងគ្នាកាន់តែខ្លាំងឡើងៗ។ លោកត្រាំចោទប្រកាន់ថាក្រុមជួញដូរគ្រឿងញៀនធ្វើសកម្មភាពចេញពីប្រទេសវេណេហ្ស៊ូអេឡា។ លោកចោទប្រកាន់ថាលោកម៉ាឌូរ៉ូជាមេម៉ាស់ផ្ចាធំជាងគេ។ ដូច្នេះក្រៅពីបើកប្រតិបត្តិការបង្ក្រាបគ្រឿងញៀនតាមជើងទឹកជាបណ្ដើរៗ លោកត្រាំថាអាមេរិកនឹងបើកប្រតិបត្តិការបង្ក្រាបតាមជើងគោកនៅក្នុងពេលឆាប់ៗនេះ។
អាមេរិកបានបញ្ជូននាវាដឹកយន្តហោះធំជាងគេនៅលើពិភពលោក រួមទាំងនាវាចម្បាំងដទៃទៀតទៅឈប់សំចតនៅសមុទ្រការីប៊ីន (Caribbean) ដែលស្ថិតនៅមិនឆ្ងាយប៉ុន្មានពីព្រំដែនសមុទ្រប្រទេសវេណេហ្ស៊ូអេឡា។ អាមេរិកថានេះជាផ្នែកមួយនៃប្រតិបត្តិការបង្ក្រាបគ្រឿងញៀន។ ប៉ុន្តែការកសាងកម្លាំងយោធាដ៏ច្រើនសន្ធឹកសន្ធាប់នេះត្រូវគេមើលឃើញថាជាការត្រៀមលក្ខណៈវាយប្រហារវេណេហ្ស៊ូអេឡា។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ