ខេត្តបន្ទាយមានជ័យ ៖ មន្ត្រីជំនាញបានឱ្យដឹងថា ស្ថានីយប្រេង និងឧស្ម័ន ដែលមានចំនួន២៨៦ស្ថានីយក្នុងខេត្ត បានបើកដំណើរការប្រមាណ៦០ភាគរយហើយ និង៤០ភាគរយមិនទាន់បើកទ្វារទេ ព្រោះពុំមានស្តុកប្រេងគ្រប់គ្រាន់ សម្រាប់ថ្ងៃទី១០…
ខេត្តបន្ទាយមានជ័យ ៖ មន្ត្រីជំនាញបានឱ្យដឹងថា ស្ថានីយប្រេង និងឧស្ម័ន ដែលមានចំនួន២៨៦ស្ថានីយក្នុងខេត្ត បានបើកដំណើរការប្រមាណ៦០ភាគរយហើយ និង៤០ភាគរយមិនទាន់បើកទ្វារទេ ព្រោះពុំមានស្តុកប្រេងគ្រប់គ្រាន់ សម្រាប់ថ្ងៃទី១០ ខែមីនា ឆ្នាំ២០២៦ នៅខេត្តបន្ទាយមាន
ជ័យ ។
លោក ប៉ុក ឡៃជី ប្រធានមន្ទីរពាណិជ្ជកម្មខេត្តបន្ទាយមានជ័យ បានប្រាប់ថា នៅខេត្តបន្ទាយមានជ័យ ស្ថានីយប្រេងឥន្ធនៈនិងឧស្ម័ន សរុបចំនួន២៨៦ស្ថានីយ បានបើកដំណើរការឡើងវិញប្រមាណជាង៦០ភាគរយហើយ នៅតែ៤០ភាគរយមិនទាន់បានបើក ព្រោះពុំមានស្តុកប្រេងគ្រប់គ្រាន់ ដើម្បីលក់ឱ្យអតិថិជន ។ ប្រេងសាំង និងឧស្ម័ន ប្រេងសាំងស៊ុបពែរមានប្រហែល ១៤៧ ៣០០លីត្រ និងប្រេងម៉ាស៊ូតមានប្រមាណ ១៥៤ ១០០លីត្រ និងឧស្ម័ន(ហ្គាស) អិលភីជីមាន ១៩៩តោន ។
លោកបានបញ្ជាក់ថា ក្រុមការងារមន្ទីរជំនាញ បានចុះផ្សព្វផ្សាយរបស់ក្រសួងពាណិជ្ជកម្ម នៃតម្លៃដាក់ឱ្យអាជីវករលក់ចាប់ពីថ្ងៃទី០៨ដល់១០ ខែមីនា ឆ្នាំ២០២៦ មានប្រេងសាំងធម្មតា១លីត្រតម្លៃ ៤ ៤០០រៀល និងប្រេងម៉ាស៊ូត១លីត្រតម្លៃ ៥ ១៥០រៀល បើសិនជាស្ថានីយប្រេងឥន្ធនៈ និងឧស្ម័នណាមួយហ៊ានលក់លើសតម្លៃកំណត់ បើរកឃើញត្រូវមានវិធានការតាមច្បាប់ជៀសវាងការឆ្លៀតឱកាសកើតឡើង ។ សម្រាប់ថ្ងៃទី១១ ខែមីនា ឆ្នាំ២០២៦ ការកំណត់តម្លៃបានបង្ហាញថា ឡើងថ្លៃមួយកម្រិតទៀត ដែលប្រេងសាំងធម្មតា១លីត្រតម្លៃ ៥ ២០០រៀល និងប្រេងម៉ាស៊ូតតម្លៃ ៦ ០៥០រៀល ។
លោក ប៉ុក ឡៃជី បានបញ្ជាក់ថា ស្ថានីយប្រេងឥន្ទនៈ និងឧស្ម័ននៅខេត្តបន្ទាយមានជ័យ ដែលកំពុងលក់ចែកចាយមានដូចជាក្រុមហ៊ុន តេលា តូតាល់ កាល់តិច ស៊ូគីម៉ិច អ៊ិលអេចអ ប៊ីវីអឹម ភីធីធី លីមឡុង តារាស៊ីធី និងក្រុមហ៊ុនផ្សេងៗទៀត ។ តាមការសំណូមពរពីម្ចាស់ស្ថានីយប្រេង ឬដេប៉ូលក់ចែកចាយ សុំឱ្យក្រសួងពាក់ព័ន្ធជួយអន្តរាគមន៍ផ្គត់ផ្គង់ប្រេងឱ្យបានគ្រប់គ្រាន់ និងទាន់ពេល សម្រាប់លក់ជូនប្រជាពលរដ្ឋ ៕
ចែករំលែកព័តមាននេះ