ទីក្រុងកៀវ៖ ថ្មីៗនេះ នាវាដ្រូន (ឬនាវាបញ្ជាពីចម្ងាយគ្មានមនុស្សបើក) របស់អ៊ុយក្រែនបានវាយប្រហារនាវាដឹកប្រេងរបស់រុស្ស៊ី២គ្រឿងនៅសមុទ្រខ្មៅនៅពេលនាវាទាំងនោះកំពុងធ្វើដំណើរឆ្ពោះទៅកំពង់ផែរបស់រុស្ស៊ីដើម្បីដឹកប្រេងឆៅទៅលក់នៅលើទីផ្សារអន្តរជាតិ។ ខាងលើនេះជាការអះអាងរបស់មន្ត្រីរដ្ឋាភិបាលអ៊ុយក្រែន។ ការវាយប្រហារនេះកើតឡើងចំពេលដែលអ៊ុយក្រែនព្យាយាមវាយសង្គ្រប់ទៅលើវិស័យប្រេងឆៅរបស់រុស្ស៊ីដើម្បីកុំឱ្យរុស្ស៊ីមានលុយធ្វើសង្គ្រាម។
នាវាទាំង២នោះ១គ្រឿងឈ្មោះខាយរ៉ូស (Kairos) និង១គ្រឿងទៀតឈ្មោះវីរ៉ាត់ (Virat)។ នៅពេលរងការវាយប្រហារនោះនាវាទាំង២នៅទំនេរ មិនបានដឹកប្រេងទេ។ នាវាទាំង២បើកតម្រង់ទៅរកតំបន់ណូវ៉ូរ៉ូស៊ី (Novorossiysk) ដែលជាទីតាំងស្តុកប្រេងឆៅដ៏ធំរបស់រុស្ស៊ីនៅសមុទ្រខ្មៅ។ នេះបើតាមការបង្ហើបឱ្យដឹងពីមន្ត្រីសន្តិសុខអ៊ុយក្រែន។
តាមរយៈវីឌីអូឃ្លីបដែលចែករំលែកដោយមន្ត្រីរូបនោះ គេឃើញនាវាបញ្ជាពីចម្ងាយរបស់អ៊ុយក្រែនបើកយ៉ាងលឿនសំដៅនាវាដឹកប្រេងទាំង២គ្រឿងរបស់រុស្ស៊ី។ ក្រោយមក មានការផ្ទុះដ៏ខ្លាំងមួយដែលបង្កជាភ្លើងឆេះនៅលើនាវាដឹកប្រេង។ វីឌីអូនោះបង្ហាញថានាវារបស់រុស្ស៊ីខូចខាតយ៉ាងដំណំ និងត្រូវគេលែងប្រើការតទៅទៀតបន្ទាប់ពីរងការវាយប្រហារ។ មន្ត្រីអ៊ុយក្រែនរូបនោះសរសេររៀបរាប់នៅក្នុងសេចក្ដីប្រកាសថានេះជាការទះមួយកំផ្លៀងយ៉ាងចាស់ដៃទៅលើវិស័យដឹកជញ្ជូនប្រេងឆៅរបស់រុស្ស៊ី។
អ៊ុយក្រែនបន្តបាយប្រហាររោងចក្រចម្រាញ់ប្រេងរបស់រុស្ស៊ីជាច្រើនខែមកហើយដោយប្រើប្រាស់ដ្រូនដែលអាចបើកប្រតិបត្តិការរយៈចម្ងាយឆ្ងាយ។ ប៉ុន្តែការវាយប្រហារលើកនេះខុសប្លែកពីលើកមុន។ អ៊ុយក្រែនបានអំពាវនាវម្ដងហើយម្ដងទៀតទៅក្រុមបស្ចិមប្រទេសដើម្បីចាត់វិធានដ៏ពិតប្រាកដទៅលើ «កងនាវាស្រមោល» របស់រុស្ស៊ី។ មានន័យថាទោះបីក្រុមបស្ចិមប្រទេសដាក់ទណ្ឌកម្មសេដ្ឋកិច្ចយ៉ាងណាក្ដី នាវាទាំងនោះនៅតែអាចជួយដឹកជញ្ជូនប្រេងឆៅចេញពីប្រទេសរុស្ស៊ី និងរកលុយឱ្យរុស្ស៊ីបានច្រើនៗសម្រាប់យកទៅធ្វើសង្គ្រាមនៅអ៊ុយក្រែន។
នាវាបញ្ជាពីចម្ងាយដែលអ៊ុយក្រែនប្រើប្រាស់សម្រាប់វាយប្រហារនាវាដឹកប្រេងទាំង២គ្រឿងរបស់រុស្ស៊ីនោះជាប្រភេទកូននាវា ឬអូប័រដែលផ្ទុកគ្រឿងផ្ទុះ។ នៅពេលបើកជិតដល់គោលដៅ វានឹងចុចបំផ្ទុះគ្រាប់បែករបៀបដូចជាការធ្វើអត្តឃាតដូច្នោះដែរ។ នាវាប្រភេទនេះបានដើរតួនាទីសំខាន់សម្រាប់អ៊ុយក្រែនយកទៅវាយបកលើរុស្ស៊ីនៅសមុទ្រខ្មៅ។ នាវាឈ្មោះខាយរ៉ូសមានបណ្ដោយប្រវែង២៧៤ម៉ែត្រ។ វាបានផ្ទុះ និងឆាបឆេះចេញជាអណ្ដាតភ្លើងយ៉ាងសន្ធោសន្ធៅនៅតាមផ្លូវធ្វើដំណើរពីអេហ្ស៊ីបទៅរុស្ស៊ី។ នេះបើយោងតាមការបញ្ជាក់ពីក្រសួងដឹកជញ្ជូនតួកគី។
បុគ្គលិកបម្រើការនៅលើនាវាបានជម្លៀសខ្លួនតាមទូកជួយសង្គ្រោះ។ ក្រោយមក គេនៅតែបន្តបាញ់ទឹកដើម្បីពន្លត់ភ្លើង។ ដោយឡែក នាវាឈ្មោះវីរ៉ាតរងការវាយប្រហារនៅពេលនាវាស្ថិតនៅចម្ងាយ៣៥ម៉ាយពីមាត់សមុទ្រនៅភាគខាងកើតសមុទ្រខ្មៅ។ នាវានេះរងការវាយប្រហារម្ដងទៀតកាលពីថ្ងៃសៅរ៍ដោយនាវាដែលគ្មានមនុស្សបើក។ ប៉ុន្តែនាវានេះខូចខាតត្រឹមតែបន្តិចបន្តួចប៉ុណ្ណោះ។ ក្រសួងដឹកជញ្ជូនតួកគីអះអាងថានាវានោះនៅល្អ ហើយអាចបន្តប្រើការបានជាធម្មតា។ ចំណែកបុគ្គលិកបម្រើការនៅលើនាវាមិនបានរងផលប៉ះពាល់អ្វីទេ។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ