ទីក្រុងកៀវ៖ មន្ត្រីជាន់ខ្ពស់អ៊ុយក្រែនកំពុងធ្វើដំណើរទៅទីក្រុងវ៉ាស៊ីនតោនដើម្បីដឹកនាំការចរចាអំពីលក្ខខណ្ឌផ្សេងៗដូចដែលមានចែងនៅក្នុងសេចក្ដីព្រាងនៃផែនការសន្តិភាពដែលផ្ដួចផ្ដើមឡើងដោយលោកត្រាំ។ លោកហ្សេឡិនស្គីប្រកាសកាលពីមុននេះបន្តិចថាគណៈប្រតិភូអ៊ុយក្រែនដឹកនាំដោយលោករូសស្ទឹម អ៊ូមេរ៉ូស (Rustem Umerov) បានចាកចេញពីមាតុប្រទេសហើយដើម្បីទៅជួបមន្ត្រីរដ្ឋាភិបាលអាមេរិក។
តាមរយៈការបង្ហោះសារនៅលើបណ្ដាញអ៊ិច លោកហ្សេឡិនស្គីសរសេររៀបរាប់ថាវត្ថុបំណងនៃបេសកកម្មការទូតលើកនេះដើម្បីពន្លឿនកិច្ចការនៅចំពោះមុខឱ្យបានឆាប់រហ័សបំផុត និងដើម្បីដាក់ចេញអ្វីដែលត្រូវធ្វើនៅជំហានជាបន្តបន្ទាប់។ លោកអ៊ូរ៉ាម៉ូសជាអតីតរដ្ឋមន្ត្រីការពារជាតិអ៊ុយក្រែន លោកបានទទួលការតែងតាំងជាលេខាធិការទទួលបន្ទុកសន្តិសុខជាតិ និងការពារជាតិកាលពីខែកក្កដា ឆ្នាំ២០២៥។
ការចាត់តាំងលោកអ៊ូរ៉ាម៉ូសដើម្បីដឹកនាំគណៈប្រតិភូទៅអាមេរិកលើកនេះបន្ទាប់ពីលោកហ្សេឡិនស្គីដកតំណែងលោកអានឌ្រី យេម៉ាក (Andriy Yermak) ដែលជាទីប្រឹក្សាកំពូល និងជាដៃស្ដាំរបស់លោក។ អង្គភាពប្រឆាំងអំពើពុករលួយបានចូលឆែកឆេរលំនៅដ្ឋាន និងកន្លែងធ្វើការរបស់លោកយេម៉ាកកាលពីល្ងាចថ្ងៃសុក្រ។ លោកយេម៉ាកជាមនុស្សសំខាន់ក្នុងការធ្វើនយោបាយការទូតដើម្បីទាក់ទាញការគាំទ្រពីក្រុមបស្ចិមប្រទេស។ លោកជាមនុស្សមានអំណាចកំពូលទី២នៅក្នុងរដ្ឋាភិបាល។
ទូរទស្សន៍ប៊្លូមបឺក (Bloomberg) ផ្សាយថាគណៈប្រតិភូអ៊ុយក្រែននឹងជួបប្រេសិតពិសេសរបស់លោកត្រាំគឺលោកស្ទីវវីតខូស (Steve Witkoff) និងកូនប្រសារបស់លោកត្រាំនៅរដ្ឋផ្លរីដា។ លោកវីតខូសត្រៀមធ្វើដំណើរទៅទីក្រុងម៉ូស្គូនៅសប្ដាហ៍ក្រោយដើម្បីជួបមន្ត្រីរដ្ឋាភិបាលរុស្ស៊ី។ ឥឡូវនេះ លោកក្លាយទៅជាប្រធានបទក្ដៅនៅលើសារព័ត៌មានបន្ទាប់ពីទូរទស្សន៍ប៊្លូមបឺកផ្សព្វផ្សាយសំណុំឯកសារដែលបង្ហាញថាលោកបានបង្ហាត់បង្ហាញទីប្រឹក្សារបស់លោកពូទីនគឺលោកអ៊ូសាកូស (Yuri Ushakov) នូវវិធីនិយាយបញ្ចុះបញ្ចូលលោកត្រាំ។ ឥឡូវនេះ គេមិនទាន់ដឹងថាតើនរណាដែលធ្វើឱ្យបែកការណ៍សម្ងាត់នេះ។ មិនដឹងខាងរុស្ស៊ី ឬខាងអាមេរិកជាអ្នកទម្លាយរឿងនេះ?
គម្រោងជួបគ្នានៅរដ្ឋផ្លរីដាលើកនេះធ្វើឡើងបន្ទាប់ពីរដ្ឋាភិបាលរបស់លោកត្រាំដាក់ចេញផែនការសន្តិភាព២៨ចំណុច។ ផែនការនេះត្រូវអ៊ុយក្រែន និងអឺរ៉ុបមិនទទួលយកទេព្រោះពួកគេយល់ថាហាក់ដូចជាលំអៀង ឬក៏ធ្វើទៅតាមការចង់បានរបស់រុស្ស៊ីខ្លាំងពេក។ នៅក្នុងផែនការនោះមានចំណុចខ្លះទាមទារឱ្យអ៊ុយក្រែនកាត់ទឹកដីទៅឱ្យរុស្ស៊ីរួមទាំងប្រគល់តំបន់ដុនបាស់ (Donbas) ទាំងមូលតែម្ដង។ មិនតែប៉ុណ្ណោះ ផែនការនោះក៏បានទាមទារឱ្យអ៊ុយក្រែនបញ្ចុះចំនួនកងទ័ពផងដែរ។
លោកត្រាំទទួលស្គាល់ថាផែនការនេះមិនទាន់សម្រេចយកជាបានការនោះទេ។ វាត្រូវការការចរចាគ្នាជាបន្តទៀតដើម្បីកែសម្រួលផ្នែកខ្លះ។ សូមបញ្ជាក់ថានៅក្នុងចំណោមគណៈប្រតិភូដែលកំពុងធ្វើដំណើរទៅអាមេរិកនោះក៏មានប្រធានស៊ើបការណ៍សម្ងាត់អ៊ុយក្រែន និងនាយអគ្គសេនាធិការកងទ័ពអ៊ុយក្រែនផងដែរ។ នេះបើយោងតាមការផ្សាយរបស់ប៉ូលីទីកូ (Politico) និងប្រភពដទៃទៀត៕
ចែករំលែកព័តមាននេះ