ទីក្រុងកៀវ៖ រុស្ស៊ី និងអ៊ុយក្រែនបន្តប្រើប្រាស់យុទ្ធសាស្ត្រវាយប្រហារគ្នាផង និងចរចាផងនៅក្នុងសង្គ្រាមដែលអូសបន្លាយជិត៤ឆ្នាំមកហើយនៅខ្វះតែជាង២ខែទៀតប៉ុណ្ណោះ។ កាលពីយប់មិញ និងព្រឹកមិញ រុស្ស៊ីពន្លះអ៊ុយក្រែនមួយអស់ដៃបណ្ដាលឱ្យស្លាប់មនុស្សយ៉ាងតិច៣នាក់ និងរបួសជិត៣០នាក់។ នេះបើតាមការអះអាងរបស់មន្ត្រីរដ្ឋាភិបាលអ៊ុយក្រែន។ ផ្ទះរបស់ប្រជាជនជាង៦សែនខ្នងគ្មានភ្លើងអគ្គិសនីប្រើប្រាស់បន្ទាប់ពីរុស្ស៊ីវាយប្រហារចំរោងចក្រអគ្គិសនី។
ព្រឹត្តិការណ៍នេះកើតឡើងចំពេលអាមេរិកកំពុងរៀបចំផែនការសន្តិភាពដើម្បីបញ្ចប់សង្គ្រាម។ ប៉ុន្តែភាគីជម្លោះទាំង២នៅតែមិនទាន់ឯកភាពទទួលយកនៅឡើយទេ។ រដ្ឋមន្ត្រីការបរទេសអ៊ុយក្រែន អានឌ្រី ស៊ីប៊ីហា (Andrii Sybiha) បង្ហោះសារនៅលើបណ្ដាញសង្គមថាទន្ទឹមនឹងពេលដែលគ្រប់គ្នាកំពុងពិភាក្សាគ្នាអំពីផែនការសន្តិភាព រុស្ស៊ីបែរជាបន្តអនុវត្តតាមផែនការធ្វើសង្គ្រាមរបស់ខ្លួនដែលផ្ដោតតែលើ២ចំណុចប៉ុណ្ណោះគឺសម្លាប់មនុស្ស និងបំផ្លិចបំផ្លាញទ្រព្យសម្បត្តិ។
កាលពីយប់មិញ រុស្ស៊ីវាយប្រហាររដ្ឋធានីកៀវរបស់អ៊ុយក្រែនខ្លាំងជាងគេ។ លោកហ្សេឡិនស្គីថ្លែងថារុស្ស៊ីបញ្ជូនមីស៊ីល៣៦គ្រាប់ និងដ្រូនជិត៦រយគ្រឿងទៅវាយប្រហារ។ រុស្ស៊ីច្រើនវាយប្រហារទីតាំងផលិតថាមពលរបស់អ៊ុយក្រែនជារឿងធម្មតាទៅហើយចាប់តាំងពីឆ្នាំ២០២២។ ប៉ុន្តែលើកចុងក្រោយនេះ រុស្ស៊ីសម្រុកវាយប្រហារកាន់តែខ្លាំងទៅលើទីក្រុងនានារបស់អ៊ុយក្រែនខណៈដែលរដូវរងាចាប់ផ្ដើមចូលមកដល់ជាបណ្ដើរៗ។
ផ្ទះរបស់ប្រជាជនអ៊ុយក្រែនភាគច្រើនសព្វថ្ងៃនេះមានភ្លើងអគ្គិសនីប្រើប្រាស់ត្រឹមតែ៨ម៉ោងប៉ុណ្ណោះក្នុងមួយថ្ងៃ។ ហេតុនេះ ប្រជាជនងាកទៅប្រើប្រាស់ម៉ាស៊ីនភ្លើងខ្នាតតូចៗ ដែលជាហេតុធ្វើឱ្យមានក្លិនឆួលនៃផ្សែងប្រេងម៉ាស៊ូតពាសពេញរដ្ឋធានី។ នៅតាមដងវិថីនានា ប្រជាជនត្រូវប្រើប្រាស់ពិលសម្រាប់បំភ្លឺផ្លូវនៅពេលពួកគេធ្វើដំណើរ។ មូលហេតុដោយសារអគ្គិសនីនៅតាមផ្លូវត្រូវកាត់ផ្ដាច់ខ្ទេចខ្ទីអស់ហើយ។
ក្រសួងថាមពលអ៊ុយក្រែនថ្លែងថាការវាយប្រហារកាលពីយប់មិញវាយចំទីតាំងផលិតថាមពលនៅទីក្រុងកៀវ និងតំបន់៥ទៀតរបស់អ៊ុយក្រែន។ គ្រាន់តែទីក្រុងកៀវមួយប៉ុណ្ណោះ ផ្ទះរបស់ប្រជាជនជាងកន្លះលានខ្នងដាច់ភ្លើង។ ក្រឡេកទៅមើលដំណើរការចរចាសន្តិភាពវិញម្ដង អ៊ុយក្រែនកំពុងចរចាជាមួយអាមេរិកដើម្បីកែសម្រួលលក្ខខណ្ឌខ្លះៗនៅក្នុងផែនការសន្តិភាពដែលហាក់ដូចជាលំអៀងទៅខាងរុស្ស៊ីខ្លាំងពេក។ អ៊ុយក្រែន និងសម្ព័ន្ធមិត្តអឺរ៉ុបថ្លែងថាពួកគេចង់បានណាស់សន្តិភាព។
ប៉ុន្តែពួកគេមិនទទួលយកទេនូវលក្ខខណ្ឌដើមនៃផែនការសន្តិភាពដែលដាក់ចេញដោយអាមេរិកនោះ។ អ៊ុយក្រែនថាខ្លួននឹងមិនដកកងទ័ពថយចេញពីទីតាំងដែលខ្លួនកំពុងឈរជើងដើម្បីប្រគល់ទៅឱ្យរុស្ស៊ីទេ។ ម៉្យាងទៀត អ៊ុយក្រែនសូមជំទាស់នឹងការកំណត់លក្ខខណ្ឌរបៀបចងជើងមិនឱ្យអ៊ុយក្រែនចូលជាសមាជិកនៃបក្សសម្ព័ន្ធណាមួយ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ