ទីក្រុងហុងកុង៖ នគរបាលហុងកុងនិយាយនៅល្ងាចនេះថាចំនួនអ្នកស្លាប់ដោយសារហេតុការណ៍ឆេះអគារកាលពីថ្ងៃពុធនោះអាចនឹងកើនឡើងបន្ថែមទៀតព្រោះមនុស្សជាង១០០នាក់នៅតែបន្តបាត់ខ្លួន។ សម្រាប់បច្ចុប្បន្ននេះ គេរកឃើញសាកសពជនរងគ្រោះសរុប១២៨នាក់។ ក្រុមអ្នកស្វែងរក និងជួយសង្គ្រោះកំពុងតែរើកកាយនៅក្នុងអគារដែលឆេះខ្លោចដោយកម្ដៅភ្លើង។
កាលពីមុននេះ អាជ្ញាធរប្រកាសថាអ្នកបាត់ខ្លួនមានចំនួន២រយនាក់។ ក្រោយមក ចំនួននេះបានបញ្ចុះមកនៅ១៥០នាក់វិញបន្ទាប់ពីនគរបាលបញ្ជាក់ផ្ទៀងផ្ទាត់ជាមួយសាច់ញាតិរបស់ពួកគេឃើញថាពួកគេនៅរស់ទេ។ គេបានចាត់កម្លាំងរាប់រយនាក់ដើម្បីស្វែងរកអ្នកបាត់ខ្លួន។ ពួកគេមិនទាន់អាចរកឃើញសូម្បីតែសាកសពមនុស្សម្នាក់។ ប៉ុន្តែបែរជារកឃើញសត្វឆ្មាបីក្បាល និងអណ្ដើកមួយក្បាលទៅវិញ។
នៅថ្ងៃនេះផងដែរ ទីក្រុងហុងកុងប្រកាសកាន់មរណទុក្ខរយៈពេលបីថ្ងៃដើម្បីគោរពវិញ្ញាណក្ខន្ធជនរងគ្រោះដែលបានស្លាប់នៅក្នុងហេតុការណ៍នេះ។ សំណុំរឿងនេះនៅមិនទាន់បិទបញ្ចប់ត្រឹមនេះទេ។ នៅមានបញ្ហាពាក់ព័ន្ធនឹងផ្លូវច្បាប់ថែមទៀត។ មនុស្សមួយចំនួនដែលសមត្ថកិច្ចចាប់ខ្លួននោះអាចប្រឈមនឹងការចោទប្រកាន់ពីបទមនុស្សឃាត។ ពួកគេជាអ្នកម៉ៅការសំណង់, ជានាយកក្រុមហ៊ុនផ្ដល់ប្រឹក្សាយោបល់ផ្នែកសំណង់, ជាអ្នកគ្រប់គ្រងគម្រោង និងជាអ្នកម៉ៅការខាងធ្វើរន្ទាឫស្សីសម្រាប់ជួសជុលអគារ។
ហេតុការណ៍ឆេះអគារលើកនេះត្រូវគេចាត់ទុកថាជាមហន្តរាយដោយអគ្គិភ័យដ៏ធំមិនធ្លាប់មានចាប់តាំងពីឆ្នាំ១៩៤៨។ កាលនោះមនុស្ស១៣៥នាក់បានស្លាប់។ ប៉ុន្តែបើលើកនេះគេរកឃើញសាកសពបន្ថែមលើសពីចំនួននោះ ការឆេះលើកនេះកាន់តែធ្ងន់ធ្ងរជាងពេលនោះទៅទៀត។ បញ្ហាចោទដ៏សំខាន់គឺការធានាសុវត្ថិភាព។ ឥឡូវនេះ អាជ្ញាធរកំពុងស្រាវជ្រាវចង់ដឹងថាតើមានការរំលោភបំពានទៅលើគោលការណ៍ណែនាំស្ដីពីសុវត្ថិភាពដែរឬទេព្រោះអ្នករស់នៅក្នុងអគារនោះប្រាប់ថានៅពេលភ្លើងចាប់ផ្ដើមឆេះដំបូងៗ ពួកគេមិនបានស្ដាប់ឮសំឡេងកណ្ដឹងរោទិ៍ដើម្បីប្រកាសអាសន្នទេ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ