ខេត្តស្ទឹងត្រែង ៖ រដ្ឋបាលខេត្តស្ទឹងត្រែង បានសហការជាមួយមន្ទីរកិច្ចការនារីខេត្ត រៀបចំយុទ្ធនាការ «១៦ថ្ងៃ ដើម្បីបញ្ឈប់អំពើហិង្សាតាមបច្ចេកវិទ្យាឌីជីថល លើស្ត្រី និងក្មេងស្រី» កាលពីព្រឹកថ្ងៃទី២៩…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែង បានសហការជាមួយមន្ទីរកិច្ចការនារីខេត្ត រៀបចំយុទ្ធនាការ «១៦ថ្ងៃ ដើម្បីបញ្ឈប់អំពើហិង្សាតាមបច្ចេកវិទ្យាឌីជីថល លើស្ត្រី និងក្មេងស្រី» កាលពីព្រឹកថ្ងៃទី២៩ ខែវិច្ឆិកា ឆ្នាំ២០២៥ នៅទីលានតេជោធិបតី ក្រុងស្ទឹងត្រែង ។
កម្មវិធីនេះ ប្រារព្ធឡើងក្រោមអធិបតីភាពលោកស្រី កុត ប៊ុនមី សមាជិកក្រុមប្រឹក្សាខេត្ត លោកស្រី វិន ស៊ីធួន អភិបាលរងខេត្ត និងលោកស្រី សន សុខា ប្រធានមន្ទីរកិច្ចការនារីខេត្ត ដោយមានការចូលរួមពីមន្ត្រីរាជការកងកម្លាំងប្រដាប់អាវុធ និងសិស្សានុសិស្ស ប្រមាណ ១,០០០នាក់។
កម្មវិធីនេះមានគោលបំណងស្នូលលើកកម្ពស់ការយកចិត្តទុកដាក់ និងការចូលរួមទប់ស្កាត់ អំពើហិង្សាទាក់ទងនឹងយេនឌ័រ ពីគ្រប់ភាគីពាក់ព័ន្ធ។ជំរុញការអនុវត្តច្បាប់ ដែលការពារ និងលុបបំបាត់រាល់ទម្រង់ នៃការរើសអើងលើស្ត្រី និងកុមារ ។
លោកស្រី សន សុខា បានគូសបញ្ជាក់ថា យុទ្ធនាការនេះមានគោលដៅផ្សព្វផ្សាយពីផលប៉ះពាល់ នៃអំពើហិង្សា និងលើកកម្ពស់ការយល់ដឹងជាសាធារណៈ អំពីកាតព្វកិច្ចរបស់ប្រជាពលរដ្ឋ និងស្ថាប័នក្នុងការប្រយុទ្ធប្រឆាំងអំពើហិង្សា ។
លោកស្រី វិន ស៊ីធួន បានលើកឡើងពីភាពចាំបាច់ក្នុងការ បន្តអនុវត្តផែនការសកម្មភាពជាតិ ស្តីពីការទប់ស្កាត់អំពើហិង្សាលើស្ត្រី សំដៅ លុបបំបាត់ឥរិយាបថប្រើអំពើហិង្សា និង ពង្រីកវប្បធម៌អហិង្សា ដើម្បីរួមចំណែកដល់សីលធម៌សង្គម និងការកសាងគ្រួសារមានសុភមង្គល ។
លោកស្រីអភិបាលរងខេត្ត បានសង្កត់ធ្ងន់ថា ការបញ្ឈប់អំពើហិង្សាទាមទារការឆ្លើយតបជាពហុវិស័យ និងការចូលរួមពីអ្នកពាក់ព័ន្ធទាំងអស់។ សកម្មភាពដើរហែក្បួននេះ គឺជាការរួមចំណែកដ៏សំខាន់ក្នុងការ កាត់បន្ថយអំពើហិង្សាទាក់ទងនឹងយេនឌ័រ ឆ្លើយតបទៅនឹងគោលនយោបាយភូមិ.ឃុំ មានសុវត្ថិភាព របស់រាជរដ្ឋាភិបាល ៕
ចែករំលែកព័តមាននេះ