រាជធានីភ្នំពេញ ៖ គិតមកដល់ថ្ងៃទី២២ ខែធ្នូ ឆ្នាំ២០២៥ មានសប្បុរសជន ស្ថាប័នរដ្ឋ និងក្រុមហ៊ុនឯកជន ចំនួន២៣៥ និងប្រជាពលរដ្ឋនៅរាជធានីភ្នំពេញជាច្រើនទៀត…
រាជធានីភ្នំពេញ ៖ គិតមកដល់ថ្ងៃទី២២ ខែធ្នូ ឆ្នាំ២០២៥ មានសប្បុរសជន ស្ថាប័នរដ្ឋ និងក្រុមហ៊ុនឯកជន ចំនួន២៣៥ និងប្រជាពលរដ្ឋនៅរាជធានីភ្នំពេញជាច្រើនទៀត បានបរិច្ចាគអំណោយជាប្រាក់ គ្រឿងឧបភោគបរិភោគ សម្ភារៈប្រើប្រាស់នានា ព្រមទាំងថ្នាំពេទ្យ តាមរយៈរដ្ឋបាលរាជធានីភ្នំពេញ ដើម្បីយកទៅចែកជូនដល់វីរកងទ័ពជួរមុខ ដែលបាននិងកំពុងខិតខំតស៊ូការពារបន្ទាត់ព្រំដែនកម្ពុជាយ៉ាងអង់អាចក្លាហានមោះមុត ប្រឆាំងនឹងសត្រូវឈ្លានពាន ប្រកបដោយស្មារតីស្នេហាជាតិមាតុភូមិ និងចែកជូនបងប្អូនប្រជាពលរដ្ឋដែលបានភៀសសឹកមកកាន់មណ្ឌលសុវត្ថិភាពនានា ។
ពិធីប្រគល់និងទទួលអំណោយមនុស្សធម៌នាថ្ងៃទី២២ ខែធ្នូ ឆ្នាំ២០២៥ ធ្វើឡើងក្រោមវត្តមានលោក ហួត ហៃ លោក ហ៊ុន សុរិទ្ធី និងលោក ពេញ ធារម្យ អភិបាលរង តំណាងឯកឧត្ដម ឃួង ស្រេង អភិបាលរាជធានីភ្នំពេញ នៅក្នុងបរិវេណសាលារាជធានីភ្នំពេញ ។
អំណោយដែលបានទទួលនាថ្ងៃនេះរួមមាន រដ្ឋបាលខណ្ឌឫស្សីកែវ រដ្ឋបាលខណ្ឌទួលគោក ក្រុមហ៊ុនស្នេថេក និងសប្បុរជនក្នុងស្រុកនិងនៅក្រៅស្រុកផងដែរ ដែលមានសប្បុរសជន ស្ថាប័នរដ្ឋ ក្រុមហ៊ុនឯកជនចំនួន២៣៥ និងប្រជាពលរដ្ឋនៅរាជធានីភ្នំពេញជាច្រើនទៀត បាននាំយកថវិកា ស្បៀងអាហារ គ្រឿងឧបភោគ បរិភោគ សម្ភារៈប្រើប្រាស់នានាមកជូនរដ្ឋបាលរាជធានីភ្នំពេញ ។
ក្នុងនាមឯកឧត្ដម ឃួង ស្រេង អភិបាលរាជធានីភ្នំពេញ លោក ហួត ហៃ លោក ហ៊ុន សុរិទ្ធី និងលោក ពេញ ធារម្យ បានថ្លែងនូវការអរគុណយ៉ាងជ្រាលជ្រៅរដ្ឋបាលខណ្ឌនិងសប្បុរសជនទាំងអស់ ដែលបាននាំយកអំណោយទាំងនេះជូនមករដ្ឋបាលរាជធានីភ្នំពេញ ដើម្បីយកទៅចែកជូនដល់វីរកងទ័ពជួរមុខ ដែលបាននិងកំពុងខិតខំតស៊ូការពារបន្ទាត់ព្រំដែនកម្ពុជា-ថៃ ប្រកបដោយភាពអង់អាចក្លាហានមោះមុត ប្រឆាំងនឹងសត្រូវឈ្លានពាន ក្នុងស្មារតីស្នេហាជាតិមាតុភូមិ ព្រមទាំងបងប្អូនប្រជាពលរដ្ឋជាជនភៀសសឹក ។ សម្រាប់អាជ្ញាធររាជធានីភ្នំពេញនៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ ៕
ចែករំលែកព័តមាននេះ