រាជធានីភ្នំពេញ ៖ កាលពីព្រឹកថ្ងៃទី២២ ខែធ្នូ ឆ្នាំ២០២៥កន្លងទៅ សាលាដំបូងរាជធានីភ្នំពេញ បានលើកយកសំណុំរឿងអតីតចៅសង្កាត់រងទី២សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ដែលជាប់ចោទពីបទក្លែងបន្លំ…
រាជធានីភ្នំពេញ ៖ កាលពីព្រឹកថ្ងៃទី២២ ខែធ្នូ ឆ្នាំ២០២៥កន្លងទៅ សាលាដំបូងរាជធានីភ្នំពេញ បានលើកយកសំណុំរឿងអតីតចៅសង្កាត់រងទី២សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ដែលជាប់ចោទពីបទក្លែងបន្លំ និងប្រើប្រាស់លិខិតក្លែង មកបើកសវនាការជំនុំជម្រះទោសជាសាធារណៈ ។
សវនាការបានសាកសួរដេញដោលតាមអង្គហេតុនិងអង្គច្បាប់ អស់រយៈពេលជាច្រើនម៉ោង ហើយទីបញ្ចប់ចៅក្រមក្រុមប្រឹក្សាជំនុំជម្រះបានសម្រេចលើកពេលប្រកាសសាលក្រមផ្តនា្ទទោសជនជាប់ចោទទៅថ្ងៃទី៣១ ខែធ្នូ ឆ្នាំ២០២៥ខាងមុខ ។
ជនជាប់ចោទឈ្មោះ ឌឿក ឆាន ភេទប្រុស អាយុ៥៧ឆ្នាំ មុនចាប់ខ្លួនជាចៅសង្កាត់រងទី២ សង្កាត់ស្ទឹងមានជ័យ១ ស្នាក់នៅផ្ទះលេខ០១៦ ផ្លូវមុនីរ៉េត ភូមិថ្មី សង្កាត់ស្ទឹងមានជ័យ១ខណ្ឌមានជ័យ ។ ជនត្រូវចោទត្រូវបានចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួនក្នុងពន្ធនាគារជាបណ្តោះអាសន្ន កាលពីថ្ងៃទី៥ ខែមិថុនា ឆ្នាំ២០២៥ ដោយដាក់ឲ្យស្ថិតនៅក្រោមការពិនិត្យពីបទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងខែមេសា និងខែឧសភា ឆ្នាំ២០២៥ បទល្មើសព្រហ្មទណ្ឌដែលមានចែងតាមមាត្រា៦២៦ មាត្រា៦២៧ និងមាត្រា៦២៨ នៃក្រមព្រហ្មទណ្ឌ ។
បទក្លែងបន្លំ យោងតាមមាត្រា៦២៧ ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល ។ ចំណែកបទប្រើប្រាស់លិខិតក្លែង ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ៣ឆ្នាំ និងពិន័យជាប្រាក់ពី ២លានរៀល ទៅ ៦លានរៀល ។
ដូច្នេះជនត្រូវចោទ នឹងអាចជាប់ពន្ធនាគារពីចន្លោះពី២ ទៅ៦ឆ្នាំ ក្នុងចំនួន ២បទល្មើស តាមការចោទប្រកាន់នេះ ។ សូមជម្រាបថា នៅពេលសមត្ថកិច្ចចាប់ខ្លួនជនសង្ស័យ ស្នងការដ្ឋាននគរបាលរាជធានីភ្នំពេញ បានចេញសេចក្ដីប្រកាសព័ត៌មាន ជុំវិញការឃាត់ខ្លួនចៅសង្កាត់រងទី២ខាងគណបក្សភ្លើងទៀន សង្កាត់ស្ទឹងមានជ័យ១ ។ អ្នកនាំពាក្យស្នងការដ្ឋាននគរបាលរាជធានីភ្នំពេញ បានជម្រាបជូនសាធារណជនថា នៅថ្ងៃទី៣ ខែមិថុនា ឆ្នាំ២០២៥ វេលាម៉ោង៨និង៣០នាទីព្រឹក សមត្ថកិច្ចនៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យម្នាក់ឈ្មោះ ឌឿក ឆាន ភេទប្រុស អាយុ៥៧ឆ្នាំ ជាចៅសង្កាត់រងទី២ សង្កាត់ស្ទឹងមានជ័យទី១ ហើយនាំខ្លួនមកសាកសួរនៅស្នងការដ្ឋាននគរបាលរាជធានីភ្នំពេញ និងអនុវត្តតាមនីតិវិធី ។
ការឃាត់ខ្លួនជនសង្ស័យនេះ សមត្ថកិច្ចអនុវត្តតាមដីកាបញ្ជាឲ្យចូលខ្លួនរបស់លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ក្រោយពីសមត្ថកិច្ចទទួលបានពាក្យបណ្តឹងពីឈ្មោះ ឡេង វ៉ាន់ឌី ហើយបានធ្វើការស្រាវជ្រាវស៊ើបអង្កេត ។ ដោយយោងតាមចម្លើយសារភាព និងប្រមូលបានវត្ថុតាង បុគ្គលនេះពិតជាបានប្រព្រឹត្តសកម្មភាពក្លែបន្លំឯកសាសាធារណៈប្រាកដមែន ។ ការឃាត់ខ្លួនជនសង្ស័យ ជាបទល្មើសព្រហ្មទណ្ឌ ដោយមិនជាប់ពាក់ព័ន្ធនឹងរឿងនយោបាយឬការគាបសង្កត់បំភិតបំភ័យ និងធ្វើទុក្ខបុកម្នេញផ្នែកនយោបាយដល់សមាជិកគណប្សនយោបាយណាមួយឡើយ ។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ សូមបដិសេធ និងច្រានចោលទាំងស្រុងការចោទប្រកាន់ទាំងបំពាន ដោយគ្មានមូលដ្ឋានច្បាស់លាស់របស់គណបក្សភ្លើងទៀន ដែលចុះផ្សាយនៅថ្ងៃទី៤ ខែមិថុនា ឆ្នាំ២០២៥ ។
អង្គហេតុនៃសំណុំរឿងខាងលើ គឺផ្តើមចេញពីជនសង្ស័យឈ្មោះ ឌឿក ឆាន បានក្លែងបន្លំធ្វើលិខិត ឬឯកសារក្លែងឲ្យលោកស្រី ឡេង វ៉ាន់ឌី អាយុ៧៨ឆ្នាំ (ដើមបណ្តឹង) ជាក្រុមប្រឹក្សាសង្កាត់ ផ្តិតមេដាយលាលែងពីតំណែង ដោយដាក់អ្នកថ្មីចូលជំនួស ។ ផ្ទុយទៅវិញ ដើមបណ្តឹងគឺលោកស្រី ឡេង វ៉ាន់ឌី មិនបានដឹងរឿងជនសង្ស័យប្រើល្បិចធ្វើយ៉ាងដូច្នេះទេ ហើយលោកស្រីក៏មិនទាន់ចូលនិវត្តដែរ ៕
ចែករំលែកព័តមាននេះ