ប្រទេសបារាំង ៖ ប្រធានាធិបតីបារាំង លោកអេមម៉ានុយអែលម៉ាក្រុង បានសម្រេចកាលពីថ្ងៃទី២១ធ្នូ ពីការកសាងនាវាផ្ទុកយន្តហោះថ្មី សម្រាប់ជំនួសនាវាផ្ទុកយន្តហោះចាស់ CHARLES DE GAULLE…
ប្រទេសបារាំង ៖ ប្រធានាធិបតីបារាំង លោកអេមម៉ានុយអែលម៉ាក្រុង បានសម្រេចកាលពីថ្ងៃទី២១ធ្នូ ពីការកសាងនាវាផ្ទុកយន្តហោះថ្មី សម្រាប់ជំនួសនាវាផ្ទុកយន្តហោះចាស់ CHARLES DE GAULLE ដែលនាវាផ្ទុកយន្តហោះថ្មីនោះនឹងដាក់ឲ្យប្រើប្រាស់ក្នុងឆ្នាំ២០៣៨ ។
ក្នុងឱកាសបុណ្យណូអែលជាមួយកងទ័ពបារាំងនៅអាប៊ូដាប៊ី ប្រមុខរដ្ឋបារាំងប្រកាសថា យោងតាមច្បាប់ចុងក្រោយ២ ស្ដីពីកម្មវិធីយោធា និងបន្ទាប់ពីការពិនិត្យពេញលេញនិងហ្មត់ចត់ខ្ញុំសម្រេចឲ្យប្រទេសបារាំងបំពាក់ដោយនាវាផ្ទុកយន្តហោះថ្មី។
សេចក្ដីសម្រេចអនុវត្តកម្មវិធីដ៏ធំនោះ ត្រូវបានធ្វើក្នុងសប្ដាហ៍នេះ ។ ការប្រកាសជាផ្លូវការពីការកសាងនាវាផ្ទុកយន្តហោះថ្មីនេះ ត្រូវបានគេរង់ចាំក៏ទោះបីបារាំងកំពុងមានភាពទ័លច្រកខាងថវិកា ដែលរដ្ឋាភិបាលបារាំងកំពុងប្រឈមមុខក៏ដោយ។ ពិតណាស់ការកសាងនាវាផ្ទុកយន្តហោះថ្មីនោះ ត្រូវការវិនិយោគដ៏ធំមួយ។
លោកម៉ាក្រុងថាលោកនឹងស្វែងរកការចូលរួមរបស់អ្នកផ្គត់ផ្គង់ប្រមាណជា៨០០ ទទួលបន្ទុកគម្រោងនោះ។ លោកបញ្ជាក់ថា លោកនឹងទៅកាន់ការដ្ឋានសាងសង់នាវាក្នុងខែកុម្ភៈខាងមុខនេះ។ លោកម៉ាក្រុងថានាវាផ្ទុកយន្តហោះថ្មីនេះ នឹងបង្ហាញពីកម្លាំងនៃឧស្សាហកម្មនិងបច្ចេកវិទ្យាឧស្សាហកម្ម បម្រើដល់សេរីភាពសមុទ្រ។
នាវាផ្ទុកយន្តហោះថ្មីនោះក៏ប្រើថាមពលនុយក្លេអ៊ែរនិងធំជាងនាវាផ្ទុកយន្តហោះបច្ចុប្បន្ន ដែលនឹងមានចំណុះជិត៨០.០០០តោន និងមានបណ្ដោយប្រវែង៣១០ម៉ែត្រ ទល់នឹងនាវាបច្ចុប្បន្នមានបណ្ដោយ ២៦១ម៉ែត្រ និងមានចំណុះត្រឹម៤២.០០០តោន។ ជាមួយនាវិកប្រមាណជា២០០០នាក់ នាវាផ្ទុកយន្តហោះថ្មីនោះ អាចដឹកយន្តហោះប្រយុទ្ធបាន៣០គ្រឿង៕
ចែករំលែកព័តមាននេះ