រាជធានីភ្នំពេញ ៖ កាលពីថ្ងៃទី២៨ ខែវិច្ឆិកា ឆ្នាំ២០២៥ អ្នកនាំពាក្យសាលាដំបូង និងអយ្យការអមសាលាដំបូងរាជធានីភ្នំពេញ សូមជម្រាបជូនភាគី និងសាធារណជនជ្រាបថា ៖…
រាជធានីភ្នំពេញ ៖ កាលពីថ្ងៃទី២៨ ខែវិច្ឆិកា ឆ្នាំ២០២៥ អ្នកនាំពាក្យសាលាដំបូង និងអយ្យការអមសាលាដំបូងរាជធានីភ្នំពេញ សូមជម្រាបជូនភាគី និងសាធារណជនជ្រាបថា ៖ យោងកិច្ចប្រជុំរបស់ក្រុមការងារ និងដោះស្រាយសំណុំរឿងពាក់ព័ន្ធនឹងក្រុមហ៊ុន ពិភពដីមាស ដោយបានដឹកនាំកិច្ចប្រជុំដោយ ឯកឧត្តម នួន ណារ៉ា ប្រធានសាលាដំបូងរាជធានីភ្នំពេញ និងឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ បានពិនិត្យចំណាត់ការសំណុំរឿងទទួលបានវឌ្ឍនភាពដូចខាងក្រោម ៖
1.សំណុំរឿងព្រហ្មទណ្ឌ
១.ចំណាត់ការសំណុំរឿងជំនុំជម្រះចំនួន ៥រឿង ចៅក្រមជំនុំជម្រះបានកំណត់កាលបរិច្ឆេទសវនាការ ដូចខាងក្រោម ៖
-សំណុំរឿងព្រហ្មទណ្ឌ ៤៧២៨ ចុះថ្ងៃទី២៨ ខែសីហា ឆ្នាំ២០២៣ ពីបទ.ឆបោកមានស្ថានទម្ងន់ទោសជាក្រុមមានការចាត់តាំង ដែលមានជនជាប់ចោទចំនួន៧នាក់ ដែលមានដើមបណ្តឹងរដ្ឋប្បវេណីឈ្មោះ ថាន់ អូន ជាតំណាងឲ្យប្រជនរងគ្រោះចំនួន១៥ គ្រួសារ ។
-សំណុំរឿងព្រហក្មទណ្ឌលេខ ៤១៤៦ ចុះថ្ងៃទី២ ខែសីហា ឆ្នាំ២០២៣ ពីបទ.ឆបោកមានស្ថានទម្ងន់ទោសជាក្រុមមានការចាត់តាំង ដែលមានជនជាប់ចោទចំនួន ៧នាក់ ដែលមានដើមបណ្តឹងរដ្ឋប្បវេណីឈ្មោះ ហ៊ាង ឈឹម ។
-សំណុំរឿងព្រហ្មទណ្ឌលេខ ៣៨៧០ ចុះថ្ងៃទី១៧ ខែកក្កដា ឆ្នាំ២០២៣ ពីបទ.ឆបោកមានស្ថានទម្ងន់ទោសជាក្រុមមានការចាត់តាំង ដែលមានជនជាប់ចោទចំនួន ៧នាក់ ដែលមានដើមបណ្តឹងរដ្ឋប្បវេណីឈ្មោះ សោម ចន្ទ្រា និងឈ្មោះ សេង គង់ ។
សំណុំរឿងទាំង៣ខាងលើនេះ ចៅក្រមកំណត់កាលបរច្ឆេទសវនាការនៅថ្ងៃទី១៦ ខែធ្នូ ឆ្នាំ២០២៥ ។
-សំណុំរឿងព្រហ្មទណ្ឌលេខ ៤២៨៩ ចុះថ្ងៃទី៨ ខែសីហា ឆ្នាំ២០២៣ ពីបទ.ឆបោកមានស្ថានទម្ងន់ទោស លើជនជាប់ចោទចំនួន ១៩នាក់ និងបទ ហិង្សាដោយចេតនាមានស្ថានទម្ងន់ទោសលើជនជាប់ចោទចំនួន ៥នាក់ ដែលមានដើមបណ្តឹងរដ្ឋប្បវេណីចំនួន ៤៣នាក់ ជាអ្នកតំណាងឲ្យជនរងគ្រោះចំនួន ១,០៩៤គ្រួសារ ។
សំណុំរឿងខាងលើងនេះ ចៅក្រមកំណត់កាលបរិច្ឆេទសវនាការថ្ងៃទី៣០ ខែធ្នូ ឆ្នាំ២០២៥ ។
-សំណុំរឿងព្រហ្មទណ្ឌលេខ ៤៧៣៦ ចុះថ្ងៃទី២៨ ខែសីហា ឆ្នាំ ២០២៣ ពីបទ.ឆបោកមានស្ថានទម្ងន់ទោស ដែលមានជនជាប់ ចោទចំនួន ៧ នាក់ ដែលមានដើមបណ្តឹងឈ្មោះ យុន សោភា ជាអ្នកតំណាងឲ្យជនរងគ្រោះចំនួន ២៣ គ្រួសារ ។
សំណុំរឿងខាងលើនេះ ចៅក្រមកំណត់កាលបរិច្ឆេទសវនាការថ្ងៃទី១២ ខែមករា ឆ្នាំ២០២៦ ។
២.ចំណាក់ការសំណុំរឿងស៊ើបសួរ ចំនួន ២០រឿង ចៅក្រមស៊ើបសួរបានពិនិត្យបញ្ជូលសំណុំរឿងមួយចំនួន ដើម្បីមានភាពងាយស្រួល និងពន្លឿនក្នុងចំណាត់ការសំណុំរឿងដែលនឹងបញ្ចប់កិច្ចស៊ើបសួរក្នុងរយៈពេលដ៏ខ្លីខាងមុខ ។
៣.ចំណែកសំណុំរឿងជំនុំជម្រៈចំនួន ៣រឿង ផ្សេងទៀត មានចំណាត់ការដូចខាងក្រោម ៖
-សំណុំរឿងព្រហ្មទណ្ឌលេខ ៣៤៥៣ ចុះថ្ងៃទី៣០ ខែឧសភា ឆ្នាំ២០២៤ ពីបទ.គំរាមកំហែង ត្រូវបានចៅក្រមជំនុំជម្រះ បានចេញសាលក្រមព្រហ្មទណ្ឌលេខ ២៨៣៥”ង”ចុះថ្ងៃទី៣០ ខែកក្កដា ឆ្នាំ២០២៥ សម្រេចផ្តន្ទាទោសជនជាប់ចោទចំនួន ២ នាក់ ។ ពិរុទ្ធជនទាំង ២នាក់ បានប្តឹងឧទ្ធរណ៍ត្រង់ចំណុចទាំងមូលនៃសាលក្រម ។ សំណុំរឿងនេះ បានបញ្ជូនទៅសាលាឧទ្ធរណ៍ ដើម្បីមានចំណាត់ការតាមនីតិវិធី ។
-សំណុំរឿងព្រហ្មទណ្ឌលេខ ៧៧៦១ ចុះថ្ងៃទី៣ ខែធ្នូ ឆ្នាំ២០២៤ ពីបទ.ប្តឹងបរិហារបង្កាច់កេរ្តិ៍ ដែលមានជនជាប់ចោទឈ្មោះ នាក់ ទី ដែលមានដើមបណ្តឹងរដ្ឋប្បវេណីចំនួន ៤ នាក់ ចៅក្រមជំនុំជម្រះបានកំណត់កាលបរិច្ចេទសវនាការថ្ងៃទ១៧ ខែធ្នូ ឆ្នាំ២០២៥ ។
-សំណុំរឿងព្រហ្មទណ្ឌលេខ ៧៧៦២ ចុះថ្ងៃទី៣ ខែធ្នូ ឆ្នាំ២០២៤ ពីបទ.ប្តឹងបរិហារបង្កាច់កេរ្តិ៍ ដែលមានជនជាប់ចោទឈ្មោះ រី សុវណ្ណារិទ្ធ ដែលមានដើមបណ្តឹងរដ្ឋប្បវេណីចំនួន ៣ នាក់ ចៅក្រមជំនុំជម្រះ បានកំណត់កាលបរិច្ឆេទសវនាការថ្ងៃទី៩ ខែមករា ឆ្នាំ២០២៦ ។
2.សំណុំរឿងរដ្ឋប្បវេណី
១.ចំណាត់ការសំណុំរឿងអង្គសេចក្តីចំនួន ៣រឿង
-សំណុំរឿង ៥៥៩ ចុះថ្ងៃទី២០ ខែមីនា ឆ្នាំ២០២៥ ដែលមានដើមចោទឈ្មោះ នូ សុធន ចែម សុផល និងមានចុងចម្លើយ ក្រុមហ៊ុនពិភពដីមាស អ៊ិនវេសម៉ិន តុលាការបានចេញសាលក្រមលេខ ៩៧៣ ម ចុះថ្ងៃទី២៥ ខែសីហា ឆ្នាំ២០២៥ ។
-សំណុំរឿងលេខ ៩៧៧ ចុះថ្ងៃទី២២ ខែឧសភា ឆ្នាំ២០២៥ ដែលមានដើមបណ្តឹងឈ្មោះ ខុត ជឿន,ង៉ុយ ថារិន និងចុងចម្លើយឈ្មោះ ហ៊ី គឹមហុង,សាន សុទ្ធារិន និងឈ្មោះ ដេង ប៊ុនលីន តុលាការនឹងបន្តនីតិវិធីត្រៀមសម្រាប់ទាញហេតុផលលើកទី៣ នៅថ្ងៃទី១៩ ខែធ្នូ ឆ្នាំ២០២៥ ។
២.សំណុំរឿងរក្សាការពារមានចំនួន ៥រឿង ដែមានដើមបណ្តឹងសរុបចំនួន ២៣២១ នាក់ តុលាការបានចេញដីកាសម្រេចរឹបអូស និងឃាត់ទុកដីមួយចំនួនតាមការស្នើសុំរបស់ដើមបណ្តឹងរដ្ឋប្បវេណីដែលជាប្រជាពលរដ្ឋ ដើម្បីធានាក្នុងការអនុវត្តសំណងជូនជនរងគ្រោះនៅពេលក្រោយ ។
អ្នកនាំពាក្យសាលាដំបូង និងអយ្យការអមសាលាដំបូងរាជធានីភ្នំពេញ សូមបញ្ជាក់ជូនបន្ថែមថា នៅក្នុងចំណាត់ការសំណុំរឿងខាងលើនេះ តុលាការត្រូវការពេលវេលាសមរម្យ ដោយសារសំណុំរឿងមានចំនួនច្រើន និងមានលក្ខណៈស្មុគស្មាញ ជាពិសេសជនរងគ្រោះជាដើមបណ្តឹងរដ្ឋប្បវេណីមានច្រើនរយនាក់ តុលាការកំពុងពិនិត្យផ្ទេងផ្ទាត់អត្តសញ្ញាណជនរងគ្រោះ ដែលជាដើមបណ្តឹងរដ្ឋប្បវេណីឲ្យបានត្រឹមត្រូវ ហើយក៏ដូចជាការពិនិត្យផ្ទៀងផ្ទាត់ឯកសារ បញ្ជាក់ការទាមទារសំណងរបស់ដើមបណ្តឹងម្នាក់ៗ ផងដែរ ។
ចំពោះសំណូមពរផ្សេងទៀតរបស់ប្រជាពលរដ្ឋ ដែលជាដើមបណ្តឹងរដ្ឋប្បវេណី ក៏ដូចជាចំណាត់ការបន្តសំណុំរឿងទាំងនេះ តុលាការនឹងបន្តធ្វើការពិនិត្យចាត់ការឲ្យបានលឿន ត្រឹមត្រូវ និងយុត្តិធម៌ជូនភាគី ។ សេចក្តីដូចបានជម្រាបជូនខាងលើ សូមភាគី និងសាធារណជនជ្រាបជាព័ត៌មាន ៕
ចែករំលែកព័តមាននេះ