ទីក្រុងប៊ែឡាំង៖ ថ្មីៗនេះ រដ្ឋបាលរបស់លោកត្រាំសម្រេចចិត្តបន្ធូរបន្ថយទណ្ឌកម្មខ្លះៗទៅលើប្រទេសរុស្ស៊ីដើម្បីឱ្យប្រទេសនេះមានលទ្ធភាពនាំប្រេងឆៅទៅលក់នៅលើទីផ្សារអន្តរជាតិ។ នេះជាផ្នែកមួយនៃកិច្ចខិតខំប្រឹងប្រែងដើម្បីទប់ទល់នឹងតម្លៃប្រេងឆៅដែលចេះតែហក់ឡើងខ្ពស់ជាលំដាប់។ ម៉្យាង សង្គ្រាមអ៊ីរ៉ង់បន្តឆាបឆេះយ៉ាងក្ដៅគគុក និងម៉្យាងទៀតអ៊ីរ៉ង់ថែមទាំងបិទច្រកសមុទ្រហ័រម៉ូស។ ចាប់ពីល្ងាចថ្ងៃព្រហស្បតិ៍តទៅ អាមេរិកអនុញ្ញាតឱ្យរុស្ស៊ីដឹកជញ្ជូន និងលក់ប្រេងឆៅរបស់ខ្លួន។
ទោះជាយ៉ាងណាក្ដី វិធានការរបស់លោកត្រាំត្រូវអធិការបតីអាល្លឺម៉ង់រិះគន់។ លោកហ្វ្រីតរីចម៊ែក (Friedrich Merz) ថ្លែងថានេះជាទង្វើខុសឆ្គង។ លោកទទួលស្គាល់ថាប្រេងឆៅកំពុងតែឡើងថ្លៃពិតមែនហើយ។ ក៏ប៉ុន្តែការផ្គត់ផ្គង់ប្រេងមិនទាន់ចោទជាបញ្ហានៅឡើយទេ។ នៅក្នុងន័យនេះ លោកចង់ដាក់ជាសំណួរទៅកាន់រដ្ឋាភិបាលអាមេរិកថាតើមានកត្តាដទៃទៀតទេដែលធ្វើឱ្យខ្លួនត្រូវតែសម្រេចចិត្តយ៉ាងដូច្នេះ? លោកម៊ែកចាត់ទុកថាការសម្រេចចិត្តនេះជារឿងដែលគួរឱ្យភ្ញាក់ផ្អើល។
កាលពីមុននេះ លោកសង្ឃឹមថាអាមេរិកមិនធ្វើដូច្នេះទេព្រោះនៅក្នុងការសន្ទនាគ្នាតាមប្រព័ន្ធវីឌីអូពីចម្ងាយកាលពីថ្ងៃពុធ ក្រុមប្រទេសជី៧ (G7) បានផ្ដាំហើយផ្ដាំទៀតទៅលោកត្រាំថាកុំបន្ធូរដៃឱ្យរុស្ស៊ីឱ្យសោះ។ លោកម៊ែកថ្លែងថាយើងចង់ធ្វើឱ្យប្រាកដថារុស្ស៊ីមិនអាចទទួលបានផលចំណេញពីសង្គ្រាមនៅអ៊ីរ៉ង់ទេ។ បើដូច្នេះមែនវានឹងធ្វើឱ្យអ៊ុយក្រែនកាន់តែចុះខ្សោយ។ ម៉្យាងទៀត យើងមិនបណ្ដោយឱ្យរុស្ស៊ីជន្លចិត្តអង្គការណាតូនៅតំបន់ការពារខាងកើត ហើយឥឡូវនេះមកតំបន់ខាងជើងទៀតនោះទេ។
លោកម៊ែកចង់សង្កត់ធ្ងន់ថាអាល្លឺម៉ង់រួមគ្នាជាមួយក្រុមប្រទេសជី៧ និងអ៊ីស្រាអែលកំពុងសហការគ្នាដើម្បីបញ្ចប់សង្គ្រាម។ លោកក៏បានបញ្ជាក់ជាថ្មីអំពីក្ដីបារម្ភរបស់លោកថាដែលថាអាមេរិក និងអ៊ីស្រាអែលអាចនឹងខ្វះយុទ្ធសាស្ត្រមិនដឹងថាត្រូវបញ្ចប់សង្គ្រាមអ៊ីរ៉ង់ដោយវិធីណា។ នៅក្នុងស្ថានភាពដែលតម្លៃថាមពលហក់ឡើងខ្ពស់ដូចសព្វថ្ងៃនេះ លោកម៊ែកចង់ឱ្យប្រទេសនានាងាកទៅចាប់អារម្មណ៍ការបញ្ចេញប្រេងបម្រុងយកមកប្រើប្រាស់។ ក្នុងនោះប្រទេសអាល្លឺម៉ង់ក៏សម្រេចចិត្តប្រើប្រាស់ប្រេងបម្រុងផងដែរ។ លោកអះអាងថាវិធានការនេះនឹងជួយទប់ទល់តម្លៃប្រេងនៅលើទីផ្សារបានខ្លះៗដែរ៕ ប្រភព៖ Politico និងប្រភពដទៃទៀត
ចែករំលែកព័តមាននេះ