ខេត្តស្ទឹងត្រែង ៖ មន្ទីរបរិស្ថានខេត្តស្ទឹងត្រែង បាននិងកំពុងយកចិត្តទុកដាក់ខ្ជាប់ខ្ជួនក្នុងការអនុវត្តតួនាទី និងភារកិច្ចស្នូលរបស់ខ្លួន ស្របតាមយុទ្ធសាស្ត្រចក្រាវិស័យបរិស្ថាន ដែលមានមុំគោលចំនួន ៣ គឺ ភាពស្អាត…
ខេត្តស្ទឹងត្រែង ៖ មន្ទីរបរិស្ថានខេត្តស្ទឹងត្រែង បាននិងកំពុងយកចិត្តទុកដាក់ខ្ជាប់ខ្ជួនក្នុងការអនុវត្តតួនាទី និងភារកិច្ចស្នូលរបស់ខ្លួន ស្របតាមយុទ្ធសាស្ត្រចក្រាវិស័យបរិស្ថាន ដែលមានមុំគោលចំនួន ៣ គឺ ភាពស្អាត ភាពបៃតង និងចីរភាព។ ការងារនេះ ត្រូវបានជំរុញបន្ថែមដោយការអនុវត្តយ៉ាងម៉ឺងម៉ាត់នូវសារាចរណែនាំ ក្នុងការអនុវត្តច្បាប់ ១០០% ស្របតាមក្រមបរិស្ថាន និងធនធានធម្មជាតិ ។
លោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង បានលើកឡើងអំពីគោលដៅសកម្មភាពស្នូល នៃការគ្រប់គ្រងធនធានធម្មជាតិក្នុងគោលដៅធានានូវចីរភាព និងការការពារបរិស្ថានក្នុងភូមិសាស្ត្រខេត្ត មន្ទីរបរិស្ថានខេត្តស្ទឹងត្រែង បានដាក់ចេញនូវសកម្មភាពសំខាន់ៗដូចជា៖ការល្បាត និងស្រាវជ្រាវជីវៈចម្រុះ ក្រុមការងារជំនាញបានបង្កើនសកម្មភាពល្បាតជាប់ជាប្រចាំ ក្នុងគោលបំណងសិក្សាស្រាវជ្រាវ និងវាយតម្លៃលើជីវៈចម្រុះនៅក្នុងតំបន់ការពារធម្មជាតិ និងតំបន់អភិរក្សនានា ដើម្បីជាមូលដ្ឋានគ្រឹះក្នុងការរៀបចំផែនការអភិរក្ស ។
លោកបន្តថា ជាមួយនឹងការល្បាត មន្ទីរបានយកចិត្តទុកដាក់ជាពិសេសលើការទប់ស្កាត់ និងបង្ក្រាបបទល្មើសធនធានធម្មជាតិគ្រប់ប្រភេទ។ សកម្មភាពបង្ក្រាបបានផ្តោតលើករណីធំៗ ដូចជា ៖ ការកាប់រុករានទន្ទ្រានដីព្រៃរបស់រដ្ឋធ្វើជាកម្មសិទ្ធិខុសច្បាប់។ ការដឹកជញ្ជូនឈើចេញពីតំបន់ការពារធម្មជាតិដោយគ្មានច្បាប់អនុញ្ញាត និងការបរបាញ់សត្វព្រៃខុសច្បាប់ ។
យោងតាមរបាយការណ៍ សំណុំរឿង និងជនសង្ស័យដែលជាប់ពាក់ព័ន្ធនឹងបទល្មើសទាំងនេះត្រូវបានបញ្ជូនទៅកាន់អយ្យការអមសាលាដំបូងខេត្ត ដើម្បីចាត់ការតាមនីតិវិធីច្បាប់ជាធរមាន ។
ប្រធានមន្ទីររូបនេះ បានបន្ថែមទៀតថា ដើម្បីសម្រេចបានប្រសិទ្ធភាពខ្ពស់ក្នុងការងារទប់ស្កាត់ និងបង្ក្រាប មន្ទីរបរិស្ថានខេត្តស្ទឹងត្រែង បានសហការយ៉ាងជិតស្និទ្ធជាមួយស្ថាប័នពាក់ព័ន្ធនានារដ្ឋបាលខេត្ត.ស្រុក ទទួលបានការគាំទ្រ និងការសម្របសម្រួលយ៉ាងសកម្មពីសំណាក់អាជ្ញាធរដែនដី។ កម្លាំងប្រតិបត្តិការសឹក្ករងខេត្ត សហការដើម្បីអន្តរាគមន៍ និងអនុវត្តប្រតិបត្តិការទប់ស្កាត់បទល្មើសធនធានធម្មជាតិប្រកបដោយការទទួលខុសត្រូវ ។
ការអនុវត្តភារកិច្ចទាំងអស់នេះ គឺស្ថិតក្រោមឆន្ទៈអនុវត្តតាមក្រមបរិស្ថាន និងធនធានធម្មជាតិ ជាធរមាន ដោយធានាថាការងារគ្រប់គ្រងធនធានធម្មជាតិក្នុងខេត្តស្ទឹងត្រែង ត្រូវបានថែរក្សាការពារប្រកបដោយចីរភាព និងនិរន្តរភាព ៕
ចែករំលែកព័តមាននេះ