ទីក្រុងការ៉ាកាស់៖ លោកដូណាល់ត្រាំថ្លែងថាដែនអាកាសពីលើប្រទេសវេណេហ្ស៊ូអេឡា និងជុំវិញប្រទេសនេះនឹងត្រូវបិទខ្ទប់ទាំងស្រុងស្របពេលដែលភាពតានតឹងរវាងប្រទេសអាមេរិក និងវេណេហ្ស៊ូអេឡាកំពុងតែឡើងកម្ដៅកាន់តែខ្លាំងឡើងៗ។ លោកត្រាំអះអាងថាលោកចង់ចាត់ការតែក្រុមជួញដូរគ្រឿងញៀនដែលដឹកចេញពីវេណេហ្ស៊ូអេឡាចូលអាមេរិកតែប៉ុណ្ណោះ។ ពោលគឺមិនមែនជាការប៉ុនប៉ងផ្ដួលរំលំរដ្ឋាភិបាលរបស់លោកម៉ាឌូរ៉ូទេ។
លោកត្រាំបានសរសេររៀបរាប់នៅលើបណ្ដាញសង្គមទ្រូសសូសល (Truth Social) ថា «ជូនចំពោះក្រុមហ៊ុនអាកាសចរណ៍, អាកាសយានិក, ក្រុមជួញដូរគ្រឿងញៀន និងក្រុមជួញដូរមនុស្សទាំងអស់ឱ្យបានជ្រាបថាដែនអាកាសពីលើ និងជុំវិញប្រទេសវេណេហ្ស៊ូអេឡានឹងត្រូវបិទទាំងស្រុង»។ ការបង្ហោះសាររបស់លោកត្រាំធ្វើឡើងចំពេលដែលមានសង្គ្រាមវោហារសាស្ត្រកាន់តែខ្លាំងឡើងៗនារយៈពេលប៉ុន្មានអាទិត្យចុងក្រោយនេះដែលថ្លែងដោយមន្ត្រីរដ្ឋាភិបាលអាមេរិកសំដៅទៅប្រធានាធិបតីវេណេហ្ស៊ូអេឡា លោកម៉ាឌូរ៉ូ និងរដ្ឋាភិបាលរបស់គាត់។
ទោះបីរដ្ឋាភិបាលរបស់លោកត្រាំអះអាងថាយុទ្ធនាការរបស់ខ្លួនដើម្បីប្រយុទ្ធប្រឆាំងនឹងការរត់ពន្ធគ្រឿងញៀនតែប៉ុណ្ណោះ ប៉ុន្តែក្រុមអ្នកជំនាញ និងក្រុមអ្នកឃ្លាំមើលសិទ្ធិមនុស្សយល់ថាទីក្រុងវ៉ាស៊ីនតោនហាក់ដូចជាចង់យកបញ្ហានេះធ្វើជាលេសដើម្បីផ្ដួលរំលំលោកម៉ាឌូរ៉ូពីតំណែង។ អាមេរិកចាប់ផ្ដើមបញ្ជូនយន្តហោះ និងនាវាចម្បាំង រួមទាំងនាវាដឹកយន្តហោះខ្នាតធំទៅឈប់សំចតនៅសមុទ្រការីប៊ីនដែលស្ថិតនៅមិនឆ្ងាយប៉ុន្មានពីដែនសមុទ្រវេណេហ្ស៊ូអេឡា។ ពេលខ្លះ អាមេរិកបាញ់កម្ទេចអូប័រដែលសង្ស័យដឹកគ្រឿងញៀនចេញពីវេណេហ្ស៊ូអេឡា បណ្ដាលឱ្យស្លាប់មនុស្សរាប់សិបនាក់។
កាលពីដើមសប្ដាហ៍នេះ លោកត្រាំប្រកាសថាលោកត្រៀមចាត់ការក្រុមជួញដូរគ្រឿងញៀនតាមផ្លូវគោកនៅក្នុងពេលឆាប់ៗនេះ។ តើលោកម៉ាឌូរ៉ូគិតយ៉ាងណានៅចំពោះមុខនៃការគំរាមកំហែងនេះ? នៅក្នុងការថ្លែងសុន្ទរកថាកាលពីថ្ងៃព្រហស្បតិ៍ លោកម៉ាឌូរ៉ូប្រកាសតាមកញ្ចក់ទូរទស្សន៍ជាតិថាវេណេហ្ស៊ូអេឡានឹងមិនចុះចាញ់ការសម្លុតនេះជាដាច់ខាត។ លោកធ្លាប់និយាយថាវេណេហ្ស៊ូអេឡាបានត្រៀមខ្លួនរួចហើយដើម្បីទប់ទល់នឹងការវាយប្រហារ។ នេះបើយោងតាមប្រភពពីអាល់ចាស៊ីរ៉ា (al-Jazeera) និងប្រភពដទៃទៀត៕
ចែករំលែកព័តមាននេះ