ទីក្រុងហ្សាកាតា៖ ប្រទេសឥណ្ឌូណេស៊ីបញ្ជាក់ថានៅក្នុងចំណោមជនរងគ្រោះដែលបានស្លាប់នៅក្នុងហេតុការណ៍ឆេះអគារនៅហុងកុងនោះក៏មានជនជាតិរបស់ខ្លួនមួយចំនួនផងដែរ។ ថ្ងៃនេះ អ្នកនាំពាក្យក្រសួងការបរទេសឥណ្ឌូណេស៊ី លោកស្រីអ៊ីហ្វុន មេវេងកាង (Yvonne Mewengkang) ថ្លែងថាជនជាតិឥណ្ឌូណេស៊ីមួយចំនួនបានស្លាប់នៅហុងកុង។ លោកស្រីថ្លែងដូច្នេះនៅក្នុងខ្សែអាត់វីឌីអូ។…
ទីក្រុងហ្សាកាតា៖ ប្រទេសឥណ្ឌូណេស៊ីបញ្ជាក់ថានៅក្នុងចំណោមជនរងគ្រោះដែលបានស្លាប់នៅក្នុងហេតុការណ៍ឆេះអគារនៅហុងកុងនោះក៏មានជនជាតិរបស់ខ្លួនមួយចំនួនផងដែរ។ ថ្ងៃនេះ អ្នកនាំពាក្យក្រសួងការបរទេសឥណ្ឌូណេស៊ី លោកស្រីអ៊ីហ្វុន មេវេងកាង (Yvonne Mewengkang) ថ្លែងថាជនជាតិឥណ្ឌូណេស៊ីមួយចំនួនបានស្លាប់នៅហុងកុង។ លោកស្រីថ្លែងដូច្នេះនៅក្នុងខ្សែអាត់វីឌីអូ។
អ្នកនាំពាក្យរូបនេះថ្លែងបន្តទៀតថាយើងមានទុក្ខដ៏ក្រៀមក្រំបំផុតក្នុងការប្រកាសថាជនជាតិឥណ្ឌូណេស៊ី៧នាក់បានស្លាប់។ ពួកគេទាំងនោះជាពលករចំណាកស្រុកដែលទៅធ្វើការជាអ្នកបម្រើតាមផ្ទះ។ ជនជាតិឥណ្ឌូណេស៊ីម្នាក់អាចរួចផុតពីសេចក្ដីស្លាប់ និងកំពុងទទួលការព្យាបាលមុខរបួស។ ឥឡូវនេះគាត់ស្ថិតនៅក្នុងដំណាក់កាលធម្មតាឡើងវិញហើយ។
យោងតាមអ្នកនាំពាក្យរូបនេះ ជនជាតិឥណ្ឌូណេស៊ី៧៩នាក់ទៀតកំពុងបាត់ខ្លួន។ ស្ថានអគ្គកុងស៊ុលឥណ្ឌូណេស៊ីប្រចាំទីក្រុងហុងកុងកំពុងធ្វើការយ៉ាងជិតស្និទ្ធជាមួយអាជ្ញាធរហុងកុងដើម្បីកំណត់ថាតើពួកគេ (អ្នកបាត់ខ្លួន) កំពុងស្ថិតនៅទីណាពិតប្រាកដ។ លោកស្រីថ្លែងថាស្ថានអគ្គកុងស៊ុលធ្វើការយ៉ាងដុតដៃដុតជើងចាប់តាំងពីទទួលដំណឹងថាមានភ្លើងឆេះភ្លាម។
ស្ថានកុងស៊ុលបានបើកប៉ុស្តិ៍ទាក់ទងបន្ទាន់មួយចាប់តាំងពីថ្ងៃពុធ (នៅពេលភ្លើងចាប់ផ្ដើមឆេះដំបូង) ដើម្បីផ្ដល់ព័ត៌មាន និងផ្ដល់សេវាផ្ទៀងផ្ទាត់អត្តសញ្ញាណកម្ម និងទីជម្រកបណ្ដោះអាសន្ន។ ប៉ុស្តិ៍នេះក៏បានផ្ដល់ជំនួយជាសម្ភារៈទៅកាន់ទីជម្រកបណ្ដោះអាសន្នមួយចំនួនផងដែរ។ កិច្ចខិតខំប្រឹងប្រែងរបស់ស្ថានកុងស៊ុលរួមមានការឧបត្ថម្ភ-គាំទ្រចំពោះតម្រូវការបឋម, ការជួយរៀបចំឯកសារធ្វើដំណើរ និងការសម្របសម្រួលជនជាតិឥណ្ឌូណេស៊ីដែលរស់នៅទីក្រុងហុងកុងដើម្បីធានាថាពួកគេទទួលបានការជួយជ្រោមជ្រែង។ នេះបើយោងតាមលោកស្រីមេវេងកាង (Yvonne Mewengkang)។
ពាក់ព័ន្ធនឹងភ្លើងឆេះអគារនៅហុងកុងនោះ អាជ្ញាធរបានចាប់ឃុំខ្លួនមនុស្សសរុប១១នាក់ដែលសង្ស័យពីបទមនុស្សឃាតដោយអចេតនា។ នេះជាផ្នែកមួយនៃការស៊ើបអង្កេតដ៏ទូលំទូលាយដើម្បីស្វែងរកមូលហេតុនៃការឆេះ។ នេះបើយោងតាមប្រភពពីហ្សាកាតាប៉ុស្តិ៍ (Jakarta Post) និងប្រភពដទៃទៀត៕
ចែករំលែកព័តមាននេះ