ទីក្រុងកូឡុំបូ៖ ថ្ងៃនេះ ស្រីលង្កាប្រកាសដាក់ប្រទេសជាតិនៅក្នុងស្ថានភាពអាសន្ន និងប្រកាសស្នើសុំជំនួយពីសហគមន៍អន្តរជាតិជាបន្ទាន់ដើម្បីយកមកដោះស្រាយបញ្ហាគ្រោះទឹកដ៏ធ្ងន់ធ្ងរដែលបានឆក់យកជីវិតមនុស្សជាច្រើននាក់។ គ្រោះទឹកជំនន់ដែលកើតឡើងបន្ទាប់ពីមានភ្លៀងធ្លាក់ខ្លាំងជាច្រើនថ្ងៃជាប់គ្នានោះបានសម្លាប់មនុស្សយ៉ាងតិច១៣២នាក់គិតតែសាកសពដែលបានរកឃើញតែប៉ុណ្ណោះ។ ក្រៅពីនេះ មនុស្ស១៧៦នាក់ទៀតកំពុងបាត់ខ្លួន។
គ្រោះមហន្តរាយធម្មជាតិដ៏អាក្រក់នេះបានបំផ្លិចបំផ្លាញផ្ទះរបស់អ្នកស្រុកជាង១៥០០០ខ្នង, បង្ខំឱ្យប្រជាជន៧៨០០០នាក់ចាកចោលផ្ទះសម្បែង និងរត់ទៅជ្រកកោននៅក្នុងទីជម្រកបណ្ដោះអាសន្នដែលរៀបចំឡើងដោយរដ្ឋាភិបាល។ នេះបើយោងតាមការអះអាងរបស់មជ្ឈមណ្ឌលគ្រប់គ្រងគ្រោះមហន្តរាយ។ នៅក្នុងស្ថានភាពនេះ ប្រធានាធិបតីស្រីលង្កា លោកអនុរក្ស កុមារា (Anura Kumara) បានប្រកាសប្រើច្បាប់ស្ដីពីការដាក់ប្រទេសជាតិនៅក្នុងស្ថានភាពអាសន្នដើម្បីឱ្យលោកមានសិទ្ធិអំណាចក្នុងការដោះស្រាយបញ្ហាគ្រោះមហន្តរាយក្រោយការធ្លាក់ភ្លៀងខ្លាំងទូទាំងប្រទេសរយៈពេល១សប្ដាហ៍។
អគ្គនាយកមជ្ឈមណ្ឌលគ្រប់គ្រងគ្រោះមហន្តរាយថ្លែងថាមនុស្ស១៣២នាក់ត្រូវបានបញ្ជាក់ថាបានស្លាប់ហើយ ហើយ១៧៦នាក់ទៀតកំពុងបាត់ខ្លួន។ លោកថ្លែងបន្ថែមទៀតថាអាជ្ញាធរកំពុងតែពន្លឿនការដោះស្រាយបញ្ហាលំបាករបស់ប្រជាជនដោយមានការប្រើប្រាស់កម្លាំងទ័ពជើងគោក ជើងទឹក និងជើងអាកាសដើម្បីចូលរួមចំណែកក្នុងការជួយ។ ពួកយោធាបានជួយសង្គ្រោះរថយន្តបឺសមួយគ្រឿងដឹកមនុស្សសរុប៦៩នាក់។ ក្នុងនោះមានអ្នកទេសចរជនជាតិអាល្លឺម៉ង់ម្នាក់ដែលជាប់ផុងទៅណាមិនរួចនៅក្នុងតំបន់មួយហ៊ុមព័ទ្ធដោយវាលទឹកដ៏ល្ហល្ហាច។ ទម្រាំជួយសង្គ្រោះបាន អាជ្ញាធរត្រូវចេញប្រតិបត្តិការរយៈពេល២៤ម៉ោងដោយប្រើប្រាស់ឧទ្ធម្ភាគចក្រ និងនាវារបស់កងទ័ពជើងទឹក។
អ្នកដំណើរម្នាក់ប្រាប់ថាទាហានជើងទឹកបានជួយមនុស្សនៅក្នុងឡាននោះដើម្បីឱ្យពួកគេឡើងទៅលើដំបូលផ្ទះដែលនៅជិតនោះ។ យើងមានសំណាងណាស់ដែលរួចផុតពីការស្លាប់។ នៅពេលយើងឡើងទៅលើដំបូលផ្ទះនោះស្រាប់តែផ្នែកខ្លះនៃដំបូលចាប់ផ្ដើមបាក់ចុះទៅក្រោម។ ស្ត្រីបីនាក់ធ្លាក់ចូលទៅក្នុងទឹក។ ប៉ុន្តែពួកគេត្រូវបានជួយឡើងមកលើដំបូលវិញ។
មុនដំបូង ឧទ្ធម្ភាគចក្រយោធាប្រុងហោះចុះទៅដឹកពួកគេចេញពីទីនោះ។ ប៉ុន្តែកម្លាំងខ្យល់ដែលបក់ចេញពីកង្ហាររបស់ឧទ្ធម្ភាគចក្រមានសភាពខ្លាំងក្លាពេកសឹងតែធ្វើឱ្យរបើកដំបូលផ្ទះ។ ដូចនេះ អាជ្ញាធរក៏សម្រេចប្រើទូកដើម្បីជម្លៀសពួកគេចេញពីទីនោះ។ រហូតមកដល់ពេលនេះ គេឃើញថាដងផ្លូវនានានៅស្រុកបាឌូឡា (Badulla) មិនអាចធ្វើដំណើរបានទេព្រោះត្រូវកាត់ផ្ដាច់ដោយទឹកជំនន់ ដែលជាហេតុធ្វើឱ្យភូមិមួយចំនួនត្រូវនៅដាច់ឆ្ងាយពីគេ ហើយមិនអាចដឹកជំនួយយកទៅចែកជូនជនរងគ្រោះនៅទីនោះបានឡើយ។ នេះបើយោងតាមប្រភពពីឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ