ទីក្រុងម៉ូស្គូ៖ ចំនួនទាហានរុស្ស៊ីដែលបានពលីជីវិតនៅក្នុងសង្គ្រាមអ៊ុយក្រែនបានកើនឡើងលើសពី១,៥សែននាក់ហើយ។ នេះបើយោងតាមការបូកសរុបតួលេខក្រោមកិច្ចសហការ និងផ្ទៀងផ្ទាត់គ្នារវាងទូរទស្សន៍ប៊ីប៊ីស៊ី និងមីឌាហ្សូណា (Mediazona)។ តួលេខនេះបានមកពីប្រភពចំហដូចជាដំណឹងមរណភាព និងកំណត់ហេតុរបស់តុលាការជាដើម ហើយបូកបញ្ចូលតែជនជាតិរុស្ស៊ីប៉ុណ្ណោះ។ យុទ្ធជនមកពីសាធារណរដ្ឋប្រជាមានិតដូញែត និងលូហានមិនបានរាប់បញ្ចូលនៅក្នុងចំនួននេះទេ។
សាធារណរដ្ឋបាស់ស្កត់តូស្តាន់ (Bashkortostan), សាធារណរដ្ឋតាតាស្តាន់ (Tatarstan) និងតំបន់ស្វៀតលូស (Sverdlovsk) មានយុទ្ធជនពលីច្រើនបំផុតគឺ៧៦៤៣នាក់, ៦៥៩៩នាក់ និង៥៣៨៦នាក់ជាលំដាប់លំដោយ។ នៅទីក្រុងម៉ូស្គូ យុទ្ធជនពលីចំនួន៤៥២០នាក់, សាធារណរដ្ឋឆេចឆឹនពលី៣៧២នាក់។
ប៊ីប៊ីស៊ី និងមីឌាហ្សូណាថ្លែងថាទំហំនៃការពលីជីវិតមិនសមាមាត្រគ្នាទេ មានន័យថាប្រែប្រួលមិនស្មើគ្នានៅក្នុងចំណោមអ្នករស់នៅទីក្រុងតូចៗ និងតំបន់ជនបទ។ លោកអាឡិចស៊ី សាការ៉ូស (Alexei Zakharov) ជាអ្នកជំនាញសេដ្ឋកិច្ចនៅសាកលវិទ្យាល័យស៊ីកាហ្គោ។ លោកប្រាប់ប៊ីប៊ីស៊ីថាអត្រាមរណភាពទាក់ទងនឹងការពឹងផ្អែករបស់ថ្នាក់មូលដ្ឋានទៅលើសហព័ន្ធផ្នែកថវិកា។
ក្រុមបស្ចិមប្រទេសប៉ាន់ស្មានថាកងទ័ពរុស្ស៊ីដែលបានពលីជីវិតនៅក្នុងសង្គ្រាមអ៊ុយក្រែនមានចំនួនច្រើនជាងតួលេខរបស់ប៊ីប៊ីស៊ី និងមីឌាហ្សូណាឆ្ងាយណាស់។ កាលពីខែមិថុនា ភ្នាក់ងារសម្ងាត់របស់អង់គ្លេសវាយតម្លៃថារុស្ស៊ីបាត់បង់កម្លាំងប្រយុទ្ធ១លាននាក់គិតសរុបទាំងរបួស និងស្លាប់។ បើគិតតែចំនួនកងទ័ពរុស្ស៊ីដែលបានស្លាប់គឺ២,៥សែននាក់។ ការបាត់បង់កម្លាំងប្រយុទ្ធជាអចិន្រ្តៃយ៍មានន័យថាមិនអាចវិលទៅសមរភូមិវិញទេដោយសាររបួសធ្ងន់ធ្ងរពេក រួមទាំងយុទ្ធជនបាត់ខ្លួនមានចន្លោះពី៤សែនទៅ៥សែននាក់។ តួលេខជាផ្លូវការរបស់រុស្ស៊ីថាកងទ័ពរបស់ខ្លួនដែលកំពុងច្បាំងនៅអ៊ុយក្រែនសព្វថ្ងៃនេះមានចំនួនសរុប៧សែននាក់។
រដ្ឋមន្ត្រីការបរទេសអាមេរិក លោករូប៊ីអូ (Rubio) ថ្លែងថារុស្ស៊ីស្លាប់យុទ្ធជនប្រហែល១សែននាក់ត្រឹមតែរយៈពេលកន្លះឆ្នាំប៉ុណ្ណោះគិតចាប់ពីដើមខែមករា-ចុងខែមិថុនា ឆ្នាំ២០២៥។ ក្រោយមកលោកដូណាល់ត្រាំថ្លែងថាទាហានរុស្ស៊ីស្លាប់ជាង១,១២សែននាក់គិតចាប់ពីខែមករារហូតមកដល់ពេលនេះ។ ចំណែកអ៊ុយក្រែនស្លាប់តិចជាងរុស្ស៊ីទេ ស្លាប់ប្រហែល៨ពាន់នាក់នៅក្នុងរយៈពេលដូចគ្នា។
លោកអាឡិចស៊ី សាការ៉ូសប៉ាន់ស្មានថារុស្ស៊ីទំនងជាបាត់បង់ជីវិតកងទ័ព៣១០០០នាក់ចាប់ពីថ្ងៃទី១ ខែឧសភាដល់ថ្ងៃទី៩ ខែកក្កដា។ ដូច្នេះបើបូកសរុបទាំងពេលមុនៗទៀត រុស្ស៊ីបាត់បង់កម្លាំងប្រយុទ្ធចន្លោះពី៩សែន-១,៣លាននាក់ (គិតទាំងរបួស និងស្លាប់)។ ក្នុងនោះ កងទ័ព១,៩សែននាក់-៣,៥សែននាក់មានពិការភាពធ្ងន់ធ្ងរមិនអាចវិលទៅសមរភូមិវិញបានទេ។ «មជ្ឈមណ្ឌលសិក្សាអំពីយុទ្ធសាស្ត្រ និងកិច្ចការអន្តរជាតិ» ដែលជាក្រុមអ្នកស្រាវជ្រាវនៅវ៉ាស៊ីនតោន ប៉ាន់ស្មានប្រហាក់ប្រហែលនឹងលោកអាឡិចស៊ី សាការ៉ូសដែរ។ មជ្ឈមណ្ឌលនេះប៉ាន់ស្មានថារុស្ស៊ីបាត់បង់កម្លាំងប្រយុទ្ធ១លាននាក់គិតទាំងស្លាប់ និងរបួស។ ក្នុងនោះ ស្លាប់២,៥សែននាក់ និងរបួសធ្ងន់លែងវិលទៅសមរភូមិវិញបានមានចំនួន៤សែននាក់។ នេះបើយោងតាមការដកស្រង់ប្រភពពីម៉ូស្គូថាមស៍ (Moscow Times) និងប្រភពដទៃទៀត៕
ចែករំលែកព័តមាននេះ