ទីក្រុងញូដេលី៖ នៅរដូវវស្សាឆ្នាំនេះ បណ្ដាប្រទេសមួយចំនួននៅទ្វីបអាស៊ីរងគ្រោះយ៉ាងធ្ងន់ធ្ងរពីទឹកជំនន់ដោយសារភ្លៀងធ្លាក់ខ្លាំងខុសពីធម្មតា។ មិនថាបណ្ដាប្រទេសនៅអាស៊ីអាគ្នេយ៍ទេ សូម្បីតែអាស៊ីខាងត្បូងក៏រងគ្រោះយ៉ាងដំណំផងដែរ។ ឧទាហរណ៍ ប្រទេសស្រីលង្កាស្លាប់ជាង១រយនាក់។ ឥឡូវនេះដល់វេនប្រទេសឥណ្ឌាវិញម្ដង។ ខ្យល់ព្យុះឌិតវ៉ា (Ditwah)…
ទីក្រុងញូដេលី៖ នៅរដូវវស្សាឆ្នាំនេះ បណ្ដាប្រទេសមួយចំនួននៅទ្វីបអាស៊ីរងគ្រោះយ៉ាងធ្ងន់ធ្ងរពីទឹកជំនន់ដោយសារភ្លៀងធ្លាក់ខ្លាំងខុសពីធម្មតា។ មិនថាបណ្ដាប្រទេសនៅអាស៊ីអាគ្នេយ៍ទេ សូម្បីតែអាស៊ីខាងត្បូងក៏រងគ្រោះយ៉ាងដំណំផងដែរ។ ឧទាហរណ៍ ប្រទេសស្រីលង្កាស្លាប់ជាង១រយនាក់។ ឥឡូវនេះដល់វេនប្រទេសឥណ្ឌាវិញម្ដង។ ខ្យល់ព្យុះឌិតវ៉ា (Ditwah) ចាប់ផ្ដើមបក់ទៅដល់តំបន់មាត់សមុទ្រ និងពាំនាំទៅជាមួយនូវភ្លៀងធ្លាក់យ៉ាងខ្លាំងក្លានៅក្នុងស្រុកមួយចំនួន។
រដ្ឋតាមីលណាឌូ (Tamil Nadu) និងបេងហ្កាលូរូ (Bengaluru) ត្រូវបានដាក់នៅក្នុងស្ថានភាពប្រុងជើងការកម្រិតខ្ពស់។ នាយកដ្ឋានឧតុនិយមបានបង្កើនកម្រិតអាសន្នពីពណ៌លឿងទុំទៅជាពណ៌ក្រហម។ មានន័យថាជាកម្រិតអាសន្នខ្ពស់បំផុតនៅតំបន់ខាងលើ។ កម្រិតនេះបង្ហាញថាទីតាំងទាំងនោះនឹងទទួលបានរបបទឹកភ្លៀងលើសពី២០០មិល្លីម៉ែត្រនៅក្នុងរយៈពេល២៤ម៉ោង។
យោងតាមការព្យាកររបស់ក្រុមឧតុនិយម បណ្ដាស្រុកនៅភាគខាងជើងនឹងមានភ្លៀងធ្លាក់យ៉ាងខ្លាំងក្លាបំផុតរហូតដល់ល្ងាចថ្ងៃអាទិត្យ។ ដើម្បីពង្រឹងការជួយសង្គ្រោះ ក្រុមការងារដោះស្រាយគ្រោះមហន្តរាយធម្មជាតិចំនួន១៦ក្រុម រួមទាំងក្រុមជួយសង្គ្រោះដទៃទៀតត្រូវបានដាក់ពង្រាយជាបណ្ដើរៗហើយ។ អ្នកជួយសង្គ្រោះដប់ក្រុមទៀតក៏កំពុងធ្វើដំណើរទៅតំបន់រងគ្រោះផងដែរ។ អាជ្ញាធរបានអំពាវនាវទៅអ្នកនេសាទទាំងអស់សូមកុំបើកទូកទៅសមុទ្រនៅអំឡុងពេលនេះ។
សម្រាប់ពេលនេះ ដីជិត២ម៉ឺនហិចតារត្រូវទឹកលិច។ សេវាដឹកជញ្ជូនតាមយន្តហោះ និងរថភ្លើងអាចនឹងរងការរំខានយ៉ាងខ្លាំង។ អាជ្ញាធរបានលុបចោលជើងហោះហើររាប់សិបខ្សែទាំងអន្តរជាតិ និងនៅក្នុងស្រុក។ ចំណែកសេវាដឹកជញ្ជូនតាមរថភ្លើងក៏ត្រូវផ្អាកជាបណ្ដោះអាសន្នផងដែរ។ នេះបើយោងតាមប្រភពពី Time of India, Hindustan និងប្រភពដទៃទៀត៕
ចែករំលែកព័តមាននេះ