ខេត្តកំពង់ស្ពឺ ៖ ព្រោះតែរឿងប្រពន្ធឈ្លោះគ្នាកន្លែងធ្វើការងារបន្តិចបន្តួចសោះ ធ្វើឱ្យបុរសម្នាក់ត្រូវបាននគរបាលស្រាវជ្រាវឃាត់ខ្លួនកសាងសំណុំរឿងចាត់ការបន្ត ដោយសារតែបុរសរូបនោះខឹងគូទំនាស់របស់ប្រពន្ធពេក ក៏បានកាន់ដាវ និងបង្ហោះម៉ូតូ ថតបង្ហោះតាមបណ្តាញសង្គមហ្វេកប៊ុក ដើម្បីគំរាមភាគីដែលទំនាស់ជាមួយប្រពន្ធរបស់ខ្លួននៅកន្លែងធ្វើការងារក្នុងរោងចក្រមួយកន្លែង។
ការស្រាវជ្រាវឃាត់ខ្លួនបុរសម្នាក់កាន់ដាវ និងបង្ហោះម៉ូតូ គំរាមគូរទំនាស់របស់ប្រពន្ធនេះធ្វើឡើងកាលពីល្ងាចថ្ងៃទី២៩ ខែវិច្ឆិកា ឆ្នាំ២០២៥ នៅក្នុងភូមិព្រៃធំ ឃុំយុទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបាននិយាយឱ្យដឹងថា បុរសដែលត្រូវឃាត់ខ្លួនមានឈ្មោះ សុផល វាសនា អាយុ២០ឆ្នាំ រស់នៅក្នុងភូមិព្រៃធំ ឃុំយុទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបានបន្តថា នៅមុនពេលឃាត់ខ្លួនបុរសខាងលើគឺ៖ ដោយបានការបញ្ជាដឹកនាំដ៏ខ្ពង់ខ្ពស់ពី លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងអធិការដ្ឋាននគរបាលស្រុកសាមគ្គីមុនីជ័យ ដែលមានលោកវរសេនីយ៍ទោ សាវ សុភក្ដី អធិការនគរបាលស្រុកសាមគ្គីមុនីជ័យ បានឱ្យផ្នែកព្រហ្មទណ្ឌ និងផ្នែកសន្ដិសុខធ្វើការសហការស្រាវជ្រាវលើមុខសញ្ញារក្សាទុកនិងប្រើប្រាស់អាវុធខុសច្បាប់ (កាន់ដាវរួចថតបង្ហោះចែកចាយតាមបណ្ដាញសង្គមហ្វេកប៊ុក)។
នគរបាលស្រុកសាមគ្គីមុនីជ័យបានបន្តឱ្យដឹងទៀតថា នៅរសៀលថ្ងៃទី២៩ ខែវិច្ឆិកា ឆ្នាំ២០២៥ កម្លាំងបានធ្វើការស្រាវជ្រាវរកឃើញបុរសម្នាក់ឈ្មោះ សុផល វាសនា អាយុ២០ឆ្នាំ រស់នៅភូមិព្រៃធំ ឃុំយុទ្ធសាមគ្គី ស្រុកសាមគ្គីមុនីជ័យ ដែលជាម្ចាស់គណនីហ្វេសប៊ុក មានឈ្មោះ Djz Fong បានធ្វើសកម្មភាពបង្ហោះម៉ូតូនៅលើផ្លូវបេតុងស្ថិតនៅក្នុងភូមិត្រពាំងល្ពាក់ ឃុំយុទ្ធសាមគ្គី ស្រុកសាមគ្គីមុនជ័យ និងជាអ្នកផុសបង្ហោះStorry ដោយកាន់ដាវមួយដើមផងដែរ ។
ក្នុងប្រតិបត្ដិការឃាត់ខ្លួនបុរសខាងលើ សមត្ថកិច្ចនគរបាលបានធ្វើការដកហូតដាវ០១ដើម នឹងម៉ូតូ០១គ្រឿងម៉ាកCRF។
ក្រោយឃាត់ខ្លួន បុរសខាងលើបានសារភាពថា មូលហេតុដែលរូបគេថតកាន់ដាវរួចបង្ហោះនោះ គឺដើម្បីគំរាមទៅអ្នកដែលធ្វើការនៅក្នុងរោងចក្រជាមួយគ្នាឱ្យប្រយ័ត្នខ្លួន ក្រោយពីគូទំនាស់បានឈ្លោះប្រកែកគ្នាជាមួយប្រពន្ធរបស់ខ្លួនកន្លងទៅ ។
បច្ចុប្បន្នជននេះត្រូវឃាត់ខ្លួន និងបានបញ្ជូនមកអធិការដ្ឋាននគរបាលស្រុកសាមគ្គីមុនីជ័យសួរ នុងកសាងសំណុំរឿង ដេីម្បីចាត់ការបន្ដតាមផ្លូវច្បាប់ ៕
ចែករំលែកព័តមាននេះ