ប្រទេសថៃ ៖ វិស័យឯកជនបានរាយការណ៍ពីការខូចខាតដោយគ្រោះទឹកជំនន់ នៅភាគខាងត្បូងប្រទេសថៃចំនួន ១០ ពាន់លានបាត ឬ ៣១១លានដុល្លារអាមេរិក។ ការស្តារឡើងវិញត្រូវបានរំពឹងថានឹងចំណាយពេលបើរយៈពេលខ្លីត្រឹម ៣…
ប្រទេសថៃ ៖ វិស័យឯកជនបានរាយការណ៍ពីការខូចខាតដោយគ្រោះទឹកជំនន់ នៅភាគខាងត្បូងប្រទេសថៃចំនួន ១០ ពាន់លានបាត ឬ ៣១១លានដុល្លារអាមេរិក។ ការស្តារឡើងវិញត្រូវបានរំពឹងថានឹងចំណាយពេលបើរយៈពេលខ្លីត្រឹម ៣ ខែ ប៉ុន្តែបើរយៈពេលវែងរហូតដល់ ១ ឆ្នាំឯណោះ។ នេះបើតាមប្រភពពីកាសែតថៃមតិជន (Matichon) ចេញផ្សាយនៅថ្ងៃទី៣០ ខែវិច្ឆិកា ឆ្នាំ២០២៥។
លោក វិសិដ្ឋ លឹមលឿឆា (Wisit Limluecha) អនុប្រធានសភាពាណិជ្ជកម្មថៃ និងជាប្រធានគណៈ កម្មាធិការយុទ្ធសាស្ត្រអាហារកែច្នៃ និងអាហារនាពេលអនាគតនៃសភាពាណិជ្ជកម្មថៃ និងក្រុមប្រឹក្សាពាណិជ្ជកម្មថៃ កាលពីថ្ងៃទី២៩ វិច្ឆិកា បានបង្ហើបពីរបាយការណ៍គ្រោះទឹកជំនន់ដ៏ធ្ងន់ធ្ងរនៅតំបន់ភាគខាងត្បូង ដោយបញ្ជាក់ថា ខណៈពេលដែលសេដ្ឋកិច្ចថៃទាំងមូលមិនទាន់រងផលប៉ះពាល់ធ្ងន់ធ្ងរនៅឡើយ តែផលប៉ះពាល់លើវិស័យភស្តុភារកម្ម ផលិតកម្ម និងទេសចរណ៍ពិតជាធ្ងន់ធ្ងរណាស់ គឺប៉ះពាល់ដល់កិច្ចប្រជុំ សិក្ខាសាលា ឧស្សាហកម្មសណ្ឋាគារ និងភោជនីយដ្ឋានក្នុងតំបន់។ ការខូចខាតត្រូវបានប៉ាន់ប្រមាណថាមានរហូតដល់ ១០ ពាន់លានបាតឯណោះ។
លោកបន្តថា រយៈពេលស្តារឡើងវិញ ផ្អែកលើស្ថានភាពទូទៅ ត្រូវបានប៉ាន់ប្រមាណថាចំណាយពេលចាប់ពី ៣ ទៅ ៦ ខែ និងរហូតដល់ ១ ឆ្នាំ។ ការស្តារឡើងវិញត្រូវបានបែងចែកជា ២ ដំណាក់កាល ៖ ១. រយៈពេលខ្លី នឹងចំណាយពេលពី ៣-៦ ខែ ដើម្បីទាមទារការចាក់ដីឡើងវិញ ជួសជុលអគារ ផ្លូវថ្នល់ និងយានយន្តមួយចំនួន។ ដំណាក់ទី ២ រយៈពេលវែង នឹងចំណាយពេលរហូតដល់ ១ ឆ្នាំ ដើម្បីរៀបចំសម្រាប់វិស័យទេសចរណ៍ និងស្តារទំនុកចិត្តភ្ញៀវឡើងវិញពេញលេញ។
វិស័យកសិកម្ម ដំណាំសាកវប្បកម្ម និងកសិដ្ឋាន នឹងត្រូវការពេលយ៉ាងហោចណាស់ ៦ ខែ ដើម្បីស្តារឡើងវិញ ដោយរំពឹងថានឹងទទួលបានប្រាក់កម្ចីអត្រាការប្រាក់ទាប ដើម្បីស្តារអាជីវកម្មឡើងវិញ។ ចំណែកវិស័យឧស្សាហកម្ម ដូចជា តំបន់ឧស្សាហកម្ម និងរោងចក្រ ប្រសិនបើការខូចខាតគ្រឿងចក្រមិនធ្ងន់ធ្ងរ ការស្តារឡើងវិញរំពឹងថានឹងចំណាយពេល ៦ ខែ។ ប៉ុន្តែបើការខូចខាតលាតសន្ធឹងដល់គ្រឿងចក្រ ឬឧបករណ៍ធំៗដែលប្រើក្នុងប្រតិបត្តិការទាំងនេះ ផលប៉ះពាល់នឹងមានរយៈពេលវែង ការស្តារវិញនឹងចំណាយពេលច្រើនឆ្នាំ។
សម្រាប់វិស័យអាជីវកម្ម តម្រូវឱ្យមានទាំងជំនួយហិរញ្ញវត្ថុ និងការរៀបចំរចនាសម្ព័ន្ធអាជីវកម្មឡើងវិញ ដូចជា កម្ចីអត្រាការប្រាក់ទាប ដើម្បីវិនិយោគទៅលើគ្រឿងចក្រ និងបច្ចេកវិទ្យាថ្មី អនុញ្ញាតឱ្យអាជីវកម្មបន្តប្រតិបត្តិការឡើងវិញឱ្យបានលឿនតាមដែលអាចធ្វើទៅបាន។ ម្យ៉ាងវិញទៀត កម្ចីអត្រាការប្រាក់ទាប ឬ កម្ចីទន់ ត្រូវមានសម្រាប់អាជីវកម្មធ្លាប់ជួបប្រទះការលំបាកក្នុងការខ្ចីកន្លងមក។ នៅពេលគ្រោះមហន្តរាយកាន់តែធ្ងន់ធ្ងរ រដ្ឋាភិបាលគួរតែអនុវត្តវិធានការពិសេស ដើម្បីធ្វើឱ្យវាកាន់តែងាយស្រួលសម្រាប់បណ្តាអាជីវកម្មក្នុងការខ្ចីប្រាក់ ដើម្បីគាំទ្រប្រតិបត្តិការរបស់ពួកគេ និងស្តារឡើងវិញ។
ដោយឡែក លោកស្រី សុផាជី សុធម្មភុន (Suphajee Suthumpun) រដ្ឋមន្ត្រីក្រសួងពាណិជ្ជកម្ម ក៏បានគូសបញ្ជាក់ថា ក្រសួងកំពុងពន្លឿនវិធានការ ដើម្បីជួយកាត់បន្ថយបន្ទុកចំណាយសាធារណៈ ដើម្បីអនុញ្ញាតឱ្យជីវភាពប្រជាជនវិលត្រឡប់ទៅរកធម្មតាវិញឱ្យបានឆាប់រហ័សតាមដែលអាចធ្វើទៅបាន។ លោកស្រីក៏បានចាត់តាំងឱ្យនាយកដ្ឋានពាណិជ្ជកម្មផ្ទៃក្នុង សម្របសម្រួលជាមួយបណ្តាក្រុមហ៊ុនផលិត និងអ្នកលក់រាយសម្ភារៈសំណង់ធំៗ ដើម្បីបើកយុទ្ធនាការរយៈពេល១ខែ ផ្តល់ជូនការបញ្ចុះតម្លៃរដល់ ៨០% លើផលិតផលគ្រឿងសំណង់សំខាន់ៗ សម្រាប់ការជួសជុល។
ក្រសួងក៏កំពុងបង្កើនសារពើភ័ណ្ឌ ក៏ដូចជាពង្រីកការចែកចាយដល់ ៤០ សាខានៅតំបន់ភាគខាងត្បូង ដោយគ្របដណ្តប់លើស្រុកហាតយ៉ៃ (Hat Yai) ខេត្តសុងក្លា (Songkhla) ណាខនស៊ីថាម៉ារាត (Nakhon Si Thammarat) ស៊ូរ៉ាត់ថានី (Surat Thani) ជុំភុន (Chumphon) ផាថាលុង (Phatthalung) ត្រាង (Trang) សាតូន (Satun) យ៉ាឡា (Yala) និងខេត្តណារ៉ាធីវ៉ាត់ (Narathiwat)។
ជាមួយគ្នានោះ នាយកដ្ឋានពាណិជ្ជកម្មផ្ទៃក្នុង និងការិយាល័យពាណិជ្ជកម្មខេត្ត ត្រូវបានប្រគល់ភារកិច្ចលើការត្រួតពិនិត្យតម្លៃ បរិមាណផលិតផល និងគុណភាពនៃសេវាកម្មជួសជុល ដើម្បីការពារការកេងប្រវ័ញ្ច អំឡុងពេលរងផលប៉ះពាល់៕ ប្រភព ៖ Matichon
ចែករំលែកព័តមាននេះ