ប្រទេសអារ៉ាប់រួម ៖ អ្នកដំណើរប្រហែល ២០ ២០០ នាក់បានជាប់គាំងនៅក្នុងប្រទេសអារ៉ាប់រួម (អេមីរ៉ាតអារ៉ាប់រួម) ដោយសារការផ្អាកជើងហោះហើរ បណ្តាលមកពីការវាយប្រហារតាមអាកាសដោយអ៊ីរ៉ង់។ យ៉ាងណាមិញ…
ប្រទេសអារ៉ាប់រួម ៖ អ្នកដំណើរប្រហែល ២០ ២០០ នាក់បានជាប់គាំងនៅក្នុងប្រទេសអារ៉ាប់រួម (អេមីរ៉ាតអារ៉ាប់រួម) ដោយសារការផ្អាកជើងហោះហើរ បណ្តាលមកពីការវាយប្រហារតាមអាកាសដោយអ៊ីរ៉ង់។ យ៉ាងណាមិញ ដើម្បីបន្ធូរបន្ថយបន្ទុក អារ៉ាប់រួមបានប្រកាសថា ខ្លួននឹងរ៉ាប់រងថ្លៃសណ្ឋាគារ និងអាហារដល់អ្នកដំណើរជាង ២ ម៉ឺននាក់ ដែលជាប់គាំងក្នុងប្រទេស ដោយសារការបិទដែនអាកាស។
នេះបើតាមប្រភពពីសារព័ត៌មាន Euronews ចេញផ្សាយកាលពីថ្ងៃទី២ ខែមីនា ឆ្នាំ២០២៦។
អាជ្ញាធរអាកាសចរណ៍ស៊ីវិលទូទៅរបស់អារ៉ាប់រួម (GCAA) បានប្រកាសថា រដ្ឋកំពុងតែទទួលបន្ទុកថ្លៃស្នាក់នៅ និងអាហារទាំងអស់សម្រាប់អ្នកដំណើររងផលប៉ះពាល់ និងជាប់គាំង។ សារាចរមួយពីក្រសួងវប្បធម៌ និងទេសចរណ៍ទីក្រុងអាប៊ូដាប៊ី ដែលចេញទៅកាន់បណ្តាសណ្ឋាគារ ដោយជូនដំណឹងថា ដោយសារតែកាលៈទេសៈបច្ចុប្បន្ន និងភ្ញៀវមួយចំនួនបានដល់កាលបរិច្ឆេទចេញដំណើរ តែមិនអាចធ្វើដំណើរបាននោះ ក្រសួងសូមស្នើសុំឱ្យអ្នកពន្យារពេលស្នាក់នៅរបស់ពួកគេរហូតដល់ពួកគេអាចចេញដំណើរបាន ដោយថ្លៃស្នាក់នៅ និងហូបចុកបន្ថែមនឹងរ៉ាប់រងដោយក្រសួង។
យោងតាមសារព័ត៌មាន Khaleej Times របស់អារ៉ាប់រួមបានឱ្យដឹងថា ក្រសួងសេដ្ឋកិច្ច និងទេសចរណ៍ទីក្រុងឌូបៃ ក៏បានផ្ញើអ៊ីមែលទៅបណ្តាសណ្ឋាគារ ដើម្បីផ្តល់ជូនជម្រើសក្នុងការពន្យារពេលស្នាក់នៅរបស់ពួកគេដល់ភ្ញៀវក្រោមលក្ខខណ្ឌដូចគ្នានឹងការកក់ដំបូងរបស់ពួកគេ។ សម្រាប់អ្នកដែលមិនអាចរ៉ាប់រងការចំណាយលើការបន្តការស្នាក់នៅបាន សណ្ឋាគារទាំងនោះត្រូវជូនដំណឹងដល់ក្រសួង។
ទន្ទឹមជាមួយគ្នាដែរ អាជ្ញាធរសាធារណៈសម្រាប់អាកាសចរណ៍ស៊ីវិល បានប្រកាសនៅថ្ងៃទី១ ខែមីនា ឆ្នាំ២០២៦ ថា ការវាយតម្លៃលើការខូចខាតកំពុងត្រូវបានធ្វើឡើង ដោយមានគោលបំណងអនុវត្តការជួសជុល ដើម្បីស្តារប្រតិបត្តិការឡើងវិញ ឱ្យបានឆាប់តាមដែលអាចធ្វើទៅបាន៕
ចែករំលែកព័តមាននេះ