ទីក្រុងកៀវ៖ កាលពីយប់មិញ រុស្ស៊ីវាយប្រហារដោយដ្រូនទៅលើតំបន់ជាយក្រុងកៀវបណ្ដាលឱ្យស្លាប់មនុស្សម្នាក់ និងរបួស១១នាក់។ នេះបើយោងតាមអភិបាលតំបន់កើតហេតុ លោកមីកូឡា កាឡាស់ស្នីក (Mykola Kalashnyk)។ លោករាយការណ៍ថាពួកសត្រូវបានវាយប្រហារមកលើយើងដោយដ្រូនជាថ្មីម្ដងទៀត,…
ទីក្រុងកៀវ៖ កាលពីយប់មិញ រុស្ស៊ីវាយប្រហារដោយដ្រូនទៅលើតំបន់ជាយក្រុងកៀវបណ្ដាលឱ្យស្លាប់មនុស្សម្នាក់ និងរបួស១១នាក់។ នេះបើយោងតាមអភិបាលតំបន់កើតហេតុ លោកមីកូឡា កាឡាស់ស្នីក (Mykola Kalashnyk)។ លោករាយការណ៍ថាពួកសត្រូវបានវាយប្រហារមកលើយើងដោយដ្រូនជាថ្មីម្ដងទៀត, ក្រុមអ្នកជួយសង្គ្រោះកំពុងជម្លៀសមនុស្សចេញពីកន្លែងស្នាក់នៅនៅលើអគារខ្ពស់ៗ, ភ្នាក់ងារអគ្គិភ័យនៅតែបន្តពន្លត់ភ្លើងដែលឆេះ។
ក្រោយមក លោកបង្ហោះសារនៅលើតេឡេក្រាមថាគួរឱ្យស្ដាយ ដោយសារការវាយប្រហាររបស់សត្រូវមកលើវីសហ្គោរ៉ូត (Vyshgorod) ធ្វើឱ្យមនុស្សម្នាក់ស្លាប់ និង១១នាក់រងរបួស។ ក្នុងចំណោមអ្នករបួសក៏មានកុមារតូចម្នាក់ផងដែរ។ ការវាយប្រហាររបស់រុស្ស៊ីថ្មីបំផុតនេះកើតឡើងបន្ទាប់ពីរុស្ស៊ីទើបតែវាយប្រហារផ្គុំគ្នាដោយដ្រូន និងមីស៊ីលកាលពីយប់ថ្ងៃសុក្របណ្ដាលឱ្យស្លាប់មនុស្ស៣នាក់ និងផ្ដាច់ភ្លើងអគ្គិសនីនៅក្នុងគេហដ្ឋានរាប់សែនគ្រួសារទូទាំងប្រទេសអ៊ុយក្រែន។
ងាកចេញពីស្ថានការណ៍សឹក យើងក្រឡេកទៅមើលនយោបាយការទូតរបស់អ៊ុយក្រែនវិញម្ដង។ ក្រុមអ្នកចរចារបស់អ៊ុយក្រែនធ្វើដំណើរជិតដល់ប្រទេសអាមេរិកហើយដើម្បីពិភាក្សាគ្នាជាបន្តទៀតទៅលើផែនការសន្តិភាពដែលផ្ដួចផ្ដើមឡើងដោយអាមេរិកដើម្បីបញ្ចប់សង្គ្រាម។ ប៉ុន្តែការជួបគ្នាលើកនេះមិនមែនធ្វើឡើងនៅវ៉ាស៊ីនតោនទេ គឺធ្វើឡើងនៅរដ្ឋផ្លរីដា។ គណៈប្រតិភូអ៊ុយក្រែនក្រៅពីជួបទីប្រេសិតពិសេសរបស់លោកត្រាំគឺលោកស្ទីវវីតខូស ពួកគេក៏នឹងជួបកូនប្រសារបស់លោកត្រាំផងដែរ។
គេមិនទាន់ដឹងថាតើនៅក្នុងផែនការដែលនឹងពិភាក្សាលើកនេះនឹងកែសម្រួលថែមថយត្រង់ចំណុចណាខ្លះទេ។ ប៉ុន្តែផែនការដំបូងដែលមាន២៨ចំណុចនោះហាក់ដូចជាលំអៀង ឬធ្វើទៅតាមការទាមទាររបស់រុស្ស៊ីស្ទើរតែទាំងអស់។ ផែនការនោះសរសេរចេញមកពិគ្រោះគ្នាតែពីរនាក់អាមេរិក និងរុស្ស៊ី។ ចំណែកអ៊ុយក្រែន និងអឺរ៉ុបមិនត្រូវគេអនុញ្ញាតឱ្យចូលរួមពិភាក្សាគ្នាដើម្បីតាក់តែងផែនការនោះទេ។
ផែនការនោះទាមទារឱ្យអ៊ុយក្រែនដកថយពីតំបន់ដូញែត។ អាមេរិកទទួលស្គាល់ដូញែត, គ្រីម៉េ និងលូហានជារបស់រុស្ស៊ី។ បន្ទាប់ពីផែនការនេះរងការរិះគន់ពីអ៊ុយក្រែន និងអឺរ៉ុប អាមេរិកក៏យកផែនការនោះមកកែសម្រួលឡើងវិញ។ ប៉ុន្តែខ្លឹមសារនៅក្នុងផែនការនោះនៅតែមិនបានបញ្ជាក់ច្បាស់ៗនៅឡើយទេ។ នៅថ្ងៃចន្ទសប្ដាហ៍ក្រោយ លោកហ្សេឡិនស្គីនឹងធ្វើដំណើរទៅទីក្រុងប៉ារីសដើម្បីពិភាក្សាជាមួយលោកម៉ាក្រុង។ ចំណែកលោកស្ទីវវីតខូសនឹងធ្វើដំណើរទៅទីក្រុងម៉ូស្គូដើម្បីជួបលោកពូទីន និងទីប្រឹក្សារបស់លោក។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលបារាំង។ ខាងលើនេះជាការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ