ខេត្តកំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ បានប្រកាសនៅលើបណ្តាញសង្គមហ្វេសប៊ុក នាថ្ងៃទី១៣ ខែកញ្ញា ឆ្នាំ២០២៥នេះថា ៖ បំបែកសំណុំរឿងក្រុមចោរលួចគោជាច្រើនករណីក្នុងទឹកដី៤ស្រុក ៖…
ខេត្តកំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ បានប្រកាសនៅលើបណ្តាញសង្គមហ្វេសប៊ុក នាថ្ងៃទី១៣ ខែកញ្ញា ឆ្នាំ២០២៥នេះថា ៖ បំបែកសំណុំរឿងក្រុមចោរលួចគោជាច្រើនករណីក្នុងទឹកដី៤ស្រុក ៖ សាមគ្គីមុនីជ័យ គងពិសី សំរោងទង និងភ្នំស្រួច ។
ស្នងការដ្ឋាននគរបាលខេត្តកំពង់ស្ពឺ បានបញ្ជាក់ថា ៖ ដោយមានការដឹកនាំបញ្ជាដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កម្លាំងអធិការដ្ឋាននគរបាលស្រុកសាមគ្គីមុនីជ័យ បានធ្វើការល្បាត នៅក្នុងភូមិសាស្ដ្រ ដោយសារតែមួយរយៈនេះ កើតមានករណីបាត់គោ អ្នកស្រុកជាហូរហែរ ល្បាតតាមផ្លូវជាតិលេខ៥១ ក្នុងភូមិរោងដំរី ឃុំភ្នំតូច ស្រុកសាមគ្គីមុនីជ័យ បានឃើញជនសង្ស័យម្នាក់អង្គុយលើម៉ូតូដូចជា រង់ចាំអ្នកណាមួយ ទើបសមត្ថកិច្ចបានធ្វើការសួរនាំ ពេលនោះជនខាងលើផ្ដល់ចម្លើយរដិបរដុបមិនច្បាស់ថា ខ្លួនមកទីនេះធ្វើអីប្រាកដ ទើបនាំមកប៉ុស្ដិ៍ដើម្បីធ្វើការសួរនាំបន្ថែម នៅប៉ុស្ដិ៍នគរបាលរដ្ឋបាលភ្នំតូច ។
ក្នុងនោះជនសង្ស័យបញ្ជាក់ថា ខ្លួនឈ្មោះ វង់ ចាន់ផាក់ អាយុ៣៨ឆ្នាំ រស់នៅភុមិធម្មយុទ្ធ សង្កាត់ផ្អេរ ក្រុងកំពង់ឆ្នាំង ខេត្តកំពង់ឆ្នាំង មកទីនេះដឹកមនុស្សម្នាក់មកជួបមិត្ដភក្ភិ តែមិនដឹងធ្វើអីទេ មាន(ឈ្មោះ នុត រ៉ា ភេទប្រុស អាយុ៤៣ឆ្នាំ រស់នៅម្តុំសាលាលេខ៥ ខេត្តកំពង់ឆ្នាំង) ដោយឈ្មោះ សំ ដារ៉ា បានឲ្យទៅដឹកមកពីសួនសត្វសាហ្វារី មកទម្លាក់ចោលនៅចំណុចខាងលើ បន្ទាប់មកឃើញមានរថយន្ដទ្រុងដឹកគោមួយមកដល់ម៉ាកហ៊ីយ៉ាន់ ដាយពណ៌ខៀវទ្រុងខ្ពស់បាំងជិតសងខាង មានគ្នាចំនួន៤នាក់ ។
ដោយបានការដឹកនាំផ្ទាល់ ពីលោកវរសេនីយ៍ឯក ខឹម សាម៉ុន អធិការនគរបាលស្រុក ជនសង្ស័យបានឆ្លើយ និងផ្ដល់ចម្លើយជូនសមត្ថកិច្ចថា អ្នកដែលខ្លួនដឹកមក គឺជាក្រុមចោរលួចគោក្នុងខេត្ដកំពង់ស្ពឺជាច្រើនដង និងបានដឹកយកទៅលក់ ដោយមិនដែលមានអ្នកណាទាន់នោះទេ តាមការមិនចាំច្បាស់ ស្រុកសាមគ្គីមុនីជ័យ ចំនួន២លើក ស្រុកសំរោងទង ចំនួន២លើក ស្រុកភ្នំស្រួច ចំនួន៣លើក ស្រុកគងពិសី ចំនួន៧លើក ។
ក្នុងចំណោមបក្ខពួកខាងលើ គឺខ្លួនជាអ្នកដឹកឈ្មោះ សំ ដារ៉ា ដើរដាក់តាមគោលដៅដោយផ្ទាល់ រីឯបក្ខពួកផ្សេងទៀតមកតាមមធ្យោបាយផ្សេងក្នុងនោះឈ្មោះ ស.ន ភេទប្រុស អាយុ៣៣ឆ្នាំ ឈ្មោះ រ ភេទប្រុស អាយុ៣៤ឆ្នាំ ទាំង២នាក់រស់នៅខេត្តកំពង់ឆ្នាំង ។
ចំពោះវត្ថុតាងដែលដកហូតរួមមាន ទូរស័ព្ទ២គ្រឿង ម៉ូតូ១គ្រឿង ម៉ាកហុងដាC125ពណ៌ខ្មៅសេរីឆ្នាំ២០០៨គ្មានផ្លាកលេខ ។
ដោយបានការសម្របម្រួលនីតិវិធីពីតំណាងអយ្យការ និងសមត្ថកិច្ចពាក់ព័ន្ធកម្លាំងបានឈានទៅធ្វើការឃាត់ខ្លួនមុខសញ្ញាសង្ស័យ ឈ្មោះ សំ ដារ៉ា ហៅរ៉ា ភេទប្រុស អាយុ៤១ឆ្នាំ រស់នៅភូមិដើមពពេល ឃុំថ្មឥដ្ឋ ស្រុកកំពង់ត្រាច ខេត្តកំពង់ឆ្នាំង ។
បច្ចុប្បន្នជនសង្ស័យ២នាក់ និងវត្ថុតាងមួយចំនួនត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកសាមគ្គីមុនីជ័យ ដើម្បីបំពេញនីតិវិធីកសាងសំណុំរឿងបញ្ជូនទៅការិយាល័យព្រហ្មទណ្ឌខេត្ដ ចំណាត់ការតាមច្បាប់ ៕
ចែករំលែកព័តមាននេះ