ខេត្តបាត់ដំបង ៖ មេកន្ទុយលេខចំនួន៤នាក់ដែលសង្ស័យជ្រកក្រោមក្លៀកលោកអធិការនគរបាលស្រុកសំឡូត ដែលត្រូវបង្ក្រាបដោយកម្លាំងស្នងការដ្ឋានខេត្តនោះ ត្រូវបានលោកចៅក្រមស៊ើបសួរ នៃសាលាដំបូងខេត្ត ចេញដីកាឃុំខ្លួនបណ្ដោះអាសន្ននៅក្នុងពន្ធនាគារហើយ កាលពីរសៀលថ្ងៃទី០២ តុលា ក្រោយពីតំណាងអយ្យការបញ្ចប់ការសាកសួរ…
ខេត្តបាត់ដំបង ៖ មេកន្ទុយលេខចំនួន៤នាក់ដែលសង្ស័យជ្រកក្រោមក្លៀកលោកអធិការនគរបាលស្រុកសំឡូត ដែលត្រូវបង្ក្រាបដោយកម្លាំងស្នងការដ្ឋានខេត្តនោះ ត្រូវបានលោកចៅក្រមស៊ើបសួរ នៃសាលាដំបូងខេត្ត ចេញដីកាឃុំខ្លួនបណ្ដោះអាសន្ននៅក្នុងពន្ធនាគារហើយ កាលពីរសៀលថ្ងៃទី០២ តុលា ក្រោយពីតំណាងអយ្យការបញ្ចប់ការសាកសួរ និងធ្វើការសន្និដ្ឋានលើបទល្មើសដែលពួកគេបានប្រព្រឹត្ត។
មេកន្ទុយលេខទាំង៤នាក់មាន ១-ឈ្មោះ មាស យិន ភេទប្រុស អាយុ៣៣ឆ្នាំ រស់នៅភូមិស៊ុង១ ឃុំស៊ុង ស្រុកសំឡូត ២-ឈ្មោះ ជុំ សាបាន ភេទប្រុស អាយុ៥៥ឆ្នាំ នៅភូមិអូរទទឹម ឃុំតាសាញ ស្រុកសំឡូត ៣-ឈ្មោះ គ្រី សុគន្ធ ភេទប្រុស អាយុ៣៩ឆ្នាំ នៅភូមិព្រៃធំ ឃុំកំពង់ល្ពៅ ស្រុកសំឡូត និង៤-ឈ្មោះ ងឿន រីណា ភេទស្រី អាយុ២៧ឆ្នាំ នៅភូមិកំពង់ល្ពៅ ឃុំកពង់ល្ពៅ ស្រុកសំឡូត។
បើយោងលើការស៊ើបអង្កេតរបស់កម្លាំងជំនាញ នៃស្នងការខេត្ត រួមទាំងចម្លើយបំភ្លឺរបស់មេកន្ទុយលេខខាងលើផង ការបង្កើតទីតាំងប្រព្រឹត្តល្បែងស៊ីសង (ឆ្នោត) នៅក្នុងស្រុកសំឡូតនេះ គឺស្ថិតក្រោមការរៀបចំរចនាសម្ព័ន្ធដោយផ្ទាល់ពីលោកកោ ស៊ុនកាំង អធិការស្រុកសំឡូត ដែលមានមេកន្ទុយលេខដ៏ធំម្នាក់ឈ្មោះ ប៊ុន ចាន់តូ ជាមេខ្លោង គឺជាងពាងប្រហុកធំដែលធ្វើឱ្យបែកខ្ជាយ។
ប៉ុន្តែលោក កោ ស៊ុនកាំង អធិការស្រុកសំឡូត បានព្យាយាមបដិសេធដូច្នេះថា «ខ្ញុំមិនដែលយកលុយ៥ពាន់ ឬ ១ម៉ឺនរៀលពីមេកន្ទុយលេខឡើយ។ ខ្ញុំក៏មិនជាប់ពាក់ព័ន្ធនឹងមេកន្ទុយលេខទាំងអស់នោះដែរ។ ខ្ញុំមិនផ្ដេសផ្ដាសទេ»។
បើទោះជាលោក កោ ស៊ុនកាំង បានបដិសេធដូច្នេះក្ដី ប៉ុន្តែមន្ត្រីក្រោមឱវ៉ាតម្នាក់ ដែលមិនពេញចិត្តនូវទង្វើមិនប្រក្រតីដ៏រលួយវ៉ល់របស់មេកើយខ្លួន បានទម្លាយឲ្យដឹងថា ដំបូងឡើយលោកកោ ស៊ុនកាំង បានបញ្ជាឲ្យកូនចៅជំនិតដើរប្រមូលសំណែនពីមេកន្ទុយលេខនៅក្នុងស្រុកសំឡូត មួយកន្លែងចាប់ពី២០ដុល្លារ រហូតដល់១០០ដុល្លារក្នុង១ខែគិតទៅតាមទីតាំងតូចឬធំ។
ប៉ុន្តែប៉ុន្មានខែចុងក្រោយនេះ ដោយមានមេល្បែងដ៏ធំម្នាក់ឈ្មោះ ប៊ុន ចាន់តូ ចុះទៅសហការបង្កើតទីតាំងល្បែងឲ្យបានធំដុំជាមួយលោកអធិការ ដោយជ្រកក្រោមស្លាកក្រុមហ៊ុន «ឆ្នោតខ្មែរ» ទើបលោកអធិការប្ដូរផែនការឈប់ប្រមូលសំណែនប្រចាំខែវិញ ដើម្បីរៀបចំរចនាសម្ព័ន្ធថ្មីអំពីដំណើរ នៃល្បែងកន្ទុយលេខនេះ។
ប្រភពដដែលបានបញ្ជាក់ថា លោកកោ ស៊ុនកាំង បានបញ្ជាឲ្យលោកមេប៉ុស្ដិ៍គ្រប់ឃុំ ចុះស្រង់ស្ថិតិអ្នកកត់កន្ទុយលេខតាមមូលដ្ឋានរបស់ខ្លួន ដើម្បីណែនាំ ឬចាប់បង្ខំឲ្យមេកន្ទុយលេខទាំងនោះត្រូវតែលក់ឡើងកាតុងឲ្យមេខ្លោងធំឈ្មោះប៊ុន ចាន់តូ បើមិនព្រមធ្វើតាមទេ លោកកាំង នឹងបញ្ជាឲ្យកម្លាំងមូលដ្ឋានចុះបង្ក្រាបភ្លាមៗតែម្ដង។
ដោយឡែកមេកន្ទុយលេខម្នាក់ដែលត្រូវសមត្ថកិច្ចឃាត់ខ្លួន ក៏បានទម្លាយស្រដៀងគ្នានឹងមន្ត្រីខាងលើដែរថា ខ្លួនត្រូវបានមេខ្លោងល្បែងឈ្មោះប៊ុន ចាន់តូ ដែលអមដំណើរដោយលោកមេប៉ុស្ដិ៍១រូប ចុះទៅដាក់គំនាបដល់ផ្ទះគាត់តែម្ដង។ មេកន្ទុយលេខរូបនេះបាននិយាយដូច្នេះថា «មេខ្លោងកន្ទុយលេខឈ្មោះចាន់តូ បានណែនាំខ្ញុំឲ្យលក់ឡើងកាតុងឲ្យគាត់ ដោយប្រាប់ថា គ្មាននរណាហ៊ានចាប់ទេ ព្រោះមានអាជ្ញាធរដែនដីជួយការពារ គឺមានលោកមេប៉ុស្តិ៍ និងលោកកាំង អធិការស្រុកសំឡូត»។ បុរសនេះក៏បានបញ្ជាក់ដែរថា គ្រប់មេកន្ទុយលេខទាំងអស់ក្នុងស្រុកសំឡូត សុទ្ធតែត្រូវលោកអធិការកៀបសង្កត់បែបនេះ បើមិនស្ដាប់តាមការណែនាំទេ លោកអធិការនឹងបញ្ជាឲ្យកម្លាំងចុះបង្ក្រាបភ្លាមៗតែម្ដង។
សូមបញ្ជាក់ថា ក្រុមប្រព្រឹត្តល្បែងកន្ទុយលេខខាងលើនេះ ត្រូវបានលោកស្នងការខេត្តបញ្ជាឲ្យកម្លាំងកងអន្តរាគមន៍បង្ការ បង្ក្រាប នៃស្នងការដ្ឋានខេត្ត ចុះបង្ក្រាបនិងឃាត់ខ្លួនជាបន្តបន្ទាប់ កាលពីរសៀលថ្ងៃទី២៩ កញ្ញា កន្លងទៅថ្មីៗនេះ ដែលធ្វើឡើងលើទីតាំងចំនួន៤កន្លែង ក្នុងឃុំកំពង់ល្ពៅ ឃុំស៊ុង និងឃុំតាសាញ ស្រុកសំឡូត។
បើតាមសមត្ថកិច្ចបានប្រាប់ថា នៅមានទីតាំងកត់កន្ទុយលេខរាប់សិបកន្លែងទៀត ដែលកំពុងបើកដំណើរការដោយជ្រកក្រោមស្លាកក្រុមហ៊ុន «ឆ្នោតខ្មែរ» ដែលរៀបចំដោយលោក កោ ស៊ុនកាំង អធិការស្រុកសំឡូត និងមេខ្លោងល្បែងឆ្នោតឈ្មោះប៊ុន ចាន់តូ។
ពាក់ព័ន្ធនឹងការប្រព្រឹត្តល្បែងស៊ីសងនៅក្នុងស្រុកសំឡូតនេះ មន្ត្រីស្រុកសំឡូតម្នាក់បានផ្ដល់ព័ត៌មានមកថា បន្ទាប់ពីកម្លាំងស្នងការខេត្តចុះបង្ក្រាបនិងឃាត់ខ្លួនមេកន្ទុយលេខ៤នាក់ញាត់គុករួចមក កាលពីរសៀលថ្ងៃទី០២ តុលា លោកលឹម សាម៉េត អភិបាលស្រុកសំឡូត បានកោះប្រជុំគណៈកម្មការកងឯកភាពស្រុកភ្លាមៗ ដើម្បីពិភាក្សាអំពីល្បែងស៊ីសងនេះ។
បើតាមប្រភពដដែលបានបញ្ជាក់ថា នៅក្នុងកិច្ចប្រជុំនោះ មានលោកមេឃុំមួយរូបបានឡើងព្រលះយ៉ាងចាស់ដៃនៅចំពោះលោកអធិការនិងលោកចៅហ្វាយស្រុក ស្ដីពីការកើនឡើងនៃបនល្បែងស៊ីសងក្នុងមូលដ្ឋាន ហើយគ្មានការទប់ស្កាត់ឬបង្ក្រាប។
លោកមេឃុំរូបនោះបានលើកឡើងចំៗ ហើយថែមទាំងបានព្រមានដូច្នេះថា «ខ្ញុំបានស្នើម្ដងហើយ ម្ដងទៀតទៅលោកអធិការនិងលោកចៅហ្វាយស្រុក សុំឲ្យជួយបង្ក្រាបល្បែងស៊ីសង (អាប៉ោង និងមាន់ជល់) ដែលកំពុងកើតមានយ៉ាងគគ្រឹកគគ្រេងនៅក្នុងឃុំរបស់ខ្ញុំ តែគ្មានអស់លោកណាខ្វល់ខ្វាយទេ។ ប៉ុន្តែខ្ញុំសុំម្ដងនេះទៀត តែបើគ្មានការបង្ក្រាបទេ ខ្ញុំ និងឡើងទៅប្ដឹងលោកអភិបាលខេត្ត និងលោកស្នងការខេត្តហើយ»។ ប៉ុន្តែរហូតមកដល់ពេលនេះគេមិនទាន់ដឹងថា លោកអធិការ និងលោកចៅហ្វាយស្រុកសំឡូត ដែលមហាជននិយាយតៗគ្នាថា «កំពុងរលួយវ៉ល់នោះ» មានវិធានការបែបណានៅឡើយទេ៕
គួររំលឹកថា ៖ កក្រើកម្តងទៀត! ច្រើនស្អេកស្កះពាសពេញស្រុកសំឡូត
ចែករំលែកព័តមាននេះ