ខេត្តបន្ទាយមានជ័យ ៖ ពលរដ្ឋខ្មែរដែលជាអាជីវករលក់ដូរផ្សាររ៉ុងក្លឿ និងកម្មករ គឺចេញ-ចូលមានការថយចុះ ។ ចំណែកពលរដ្ឋថៃមករកស៊ីក្រុងប៉ោយប៉ែតឃើញថា បានសម្រុកចេញច្រើនគិតត្រឹមថ្ងៃទី១៤ ខែមិថុនា ឆ្នាំ២០២៥…
ខេត្តបន្ទាយមានជ័យ ៖ ពលរដ្ឋខ្មែរដែលជាអាជីវករលក់ដូរផ្សាររ៉ុងក្លឿ និងកម្មករ គឺចេញ-ចូលមានការថយចុះ ។ ចំណែកពលរដ្ឋថៃមករកស៊ីក្រុងប៉ោយប៉ែតឃើញថា បានសម្រុកចេញច្រើនគិតត្រឹមថ្ងៃទី១៤ ខែមិថុនា ឆ្នាំ២០២៥ នេះ ស្ថិតនៅច្រកទ្វារព្រំដែនអន្តរជាតិប៉ោយប៉ែត ។
លោក វ៉ាន់ ដារ៉ាន់ ប្រធានស្នាក់ការត្រួតពិនិត្យច្រកទ្វារអន្តរជាតិប៉ោយប៉ែតបានប្រាប់ថា ពលរដ្ឋកម្ពុជាដែលជាអាជីវករនិងកម្មករដែលទៅលក់ដូរផ្សាររ៉ូងក្លឿប្រទេសថៃ មានការថយចុះការចេញ-ចូលទៅលក់ដូរ ហើយឃើញពលរដ្ឋថៃដែលចូលមករកស៊ីនៅក្រុងប៉ោយប៉ែត ត្រូវបានសម្រុកចេញពីកម្ពុជាយ៉ាងច្រើនហើយយ៉ាងតក់ក្រហល់ផងដែរ ។
លោកបានបញ្ជាក់ថា៖ ក្រោយភាគីថៃបានបិទច្រកព្រំដែនកម្ពុជា-ថៃដោយឯកតោភាគី កាលពីថ្ងៃទី០៧ ដល់១៤ ខែមិថុនា ឆ្នាំ២០២៥ ឃើញច្រកទ្វារព្រំដែនកម្ពុជា-ថៃ ត្រូវបានសម្រួលពេលវេលាការចេញ-ចូលកម្ពុជាបើកដំណើរការ៧ម៉ោង ចាប់ពីម៉ោង៩ព្រឹក ដល់ម៉ោង៤រសៀល ។ រីឯភាគីថៃបើកដំណើរការ៨ម៉ោង ចាប់ពីម៉ោង៨ព្រឹក ដល់ម៉ោង៤រសៀល ហើយត្រូវបានអាជ្ញាធរជាប់ជាយដែនសម្រួលពេលវេលាបន្ថែមដល់សិស្សចេញ-ចូលសិក្សាពេលពីម៉ោង៦ដល់ម៉ោង៨ព្រឹក និងល្ងាចចាប់ពីម៉ោង៥ ដល់ម៉ោង៦ល្ងាច ។
លោក លៀម សុដា អភិបាលរងខេត្តបន្ទាយមានជ័យបានបញ្ជាក់ថា ស្ថានភាពព្រំដែនកម្ពុជា-ថៃក្នុងភូមិសាស្គ្រខេត្តបន្ទាយមានជ័យ ក្រោយភាគីថៃបិទច្រកព្រំដែន ហើយបង្រួញពេលវេលាចេញ.ចូលតាមច្រកទ្វារព្រំដែនកម្ពុជា-ថៃ ដោយភូមិសាស្គ្រខេត្តបន្ទាយមានជ័យ មានច្រកព្រំដែនចំនួន៤កន្លែង មានច្រកទ្វារព្រំដែនអន្តរជាតិចំនួន២កន្លែង និងច្រកទ្វារតំបន់ព្រំដែនចំនួន២កន្លែង ដែលកំពុងដំណើរការចេញ-ចូលជាធម្មតា តែពង្រួញពេលវេលាច្រកទ្វារអន្តរជាតិកម្ពុជា បើកអោយចេញ-ចូលរយៈពេល៧ម៉ោង និងភាគីថៃបើកចេញ-ចូលរយៈពេល៨ម៉ោង ។
ចែករំលែកព័តមាននេះ