ខេត្តកំពង់ស្ពឺ ៖ គ្រូបង្រៀនម្នាក់ត្រូវបានម្តាយកុមារីរងគ្រោះប្តឹងឱ្យនគរបាលស្រុកភ្នំស្រួចធ្វើការឃាត់ខ្លួន ក្រោយពីបុរសជាគ្រូបង្រៀនរូបនោះ តែងតែធ្វើសកម្មភាពបៀតបៀនកេរ្តិ៍ខ្មាសកុមារីច្រើនលើក និងជាប់ពាក់ព័ន្ធករណីរំលោភសេពសន្ថវៈទៀតផង ។ សមត្ថកិច្ចស្រុកភ្នំស្រួចបានឱ្យដឹងថា នៅមុនពេលឈានដល់ធ្វើការឃាត់ខ្លួនបុរសជាគ្រូបង្រៀននេះ កាលពីវេលាម៉ោង០៥និង១០នាទីល្ងាច…
ខេត្តកំពង់ស្ពឺ ៖ គ្រូបង្រៀនម្នាក់ត្រូវបានម្តាយកុមារីរងគ្រោះប្តឹងឱ្យនគរបាលស្រុកភ្នំស្រួចធ្វើការឃាត់ខ្លួន ក្រោយពីបុរសជាគ្រូបង្រៀនរូបនោះ តែងតែធ្វើសកម្មភាពបៀតបៀនកេរ្តិ៍ខ្មាសកុមារីច្រើនលើក និងជាប់ពាក់ព័ន្ធករណីរំលោភសេពសន្ថវៈទៀតផង ។
សមត្ថកិច្ចស្រុកភ្នំស្រួចបានឱ្យដឹងថា នៅមុនពេលឈានដល់ធ្វើការឃាត់ខ្លួនបុរសជាគ្រូបង្រៀននេះ កាលពីវេលាម៉ោង០៥និង១០នាទីល្ងាច ថ្ងៃទី១៣ ខែធ្នូ ឆ្នាំ២០២៥ កម្លាំងប៉ុស្ដិ៍នគរបាលរដ្ឋបាលឃុំត្រែងត្រយឹង បានទទួលពាក្យបណ្តឹងពីស្ត្រីជាម្ដាយអាយុ៦៤ឆ្នាំ បានប្ដឹងរៀបរាប់ថា កាលពីវេលាម៉ោង១២ និង៣០នាទីថ្ងៃត្រង់ ថ្ងៃទី១២ ខែធ្នូ ឆ្នាំ២០២៥ កូនស្រីរបស់គាត់អាយុ១០ឆ្នាំ បានចេញទៅរៀនដូចធម្មតា លុះដល់ម៉ោង៤រសៀល ជនសង្ស័យឈ្មោះ ស្រ៊ាន ពី ភេទប្រុស អាយុ៣៥ឆ្នាំ ជាគ្រូបង្រៀនសាលាជប៉ុន បានហៅកូនគាត់ទៅជិត និងបានស្ទាបអង្អែលលើកុមារីរងគ្រោះ រួចក៏បបួលនាងទៅផ្ទះ ។ ពេលទៅដល់ជនសង្ស័យបៀតបៀនផ្លូវភេទ ។ បន្ទាប់ពីធ្វើសកម្មភាពរួច ជនសង្ស័យក៏ដឹកកូនគាត់មកមុខសាលាវិញ ។
សមត្ថកិច្ចស្រុកភ្នំស្រួចបានបន្តឱ្យដឹងទៀតថា ក្រោយពីទទួលបានពាក្យបណ្តឹងពីម្តាយកុមារីរងគ្រោះរួច កម្លាំងនគរបាលជំនាញព្រហ្មទណ្ឌស្រុកភ្នំស្រួច បានសហការជាមួយកម្លាំងប៉ុស្តិ៍ នគរបាលរដ្ឋបាលឃុំស្រែងត្រយឹង បានធ្វើការស្រាវជ្រាវ និងឃាត់ខ្លួនជនសង្ស័យជាគ្រូបង្រៀនខាងលើ នៅថ្ងៃទី១៤ ខែធ្នូ ឆ្នាំ២០២៥ ដើម្បីសួរនាំ ។ សមត្ថកិច្ចស្រុកភ្នំស្រួចបានបញ្ជាក់ឱ្យដឹងថា ក្រោយធ្វើការឃាត់ខ្លួនសួរនាំ ជនសង្ស័យជាគ្រូបង្រៀនរូបនេះបានឆ្លើយសារភាពថា រូបខ្លួនបានបៀតបៀនកេរ្តិ៍ភេទកុមារីពិតមែន ។
បើតាមការបញ្ជាក់ពីកុមារីរងគ្រោះថា ជនសង្ស័យជាគ្រូបង្រៀនខាងលើ បានធ្វើសកម្មភាពតាំងពីរៀនជាមួយនៅថ្នាក់ទី៤ ឆ្នាំសិក្សា២០២៤-២០២៥ ជាច្រើនលើកនៅក្នុងសាលា ពេលដែលសិស្សចេញពីថ្នាក់រៀនអស់ ។ បច្ចុប្បន្ន គ្រូបង្រៀនល្មោភកាមខាងលើ ត្រូវបាននគរបាលឃាត់ខ្លួន និងកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ