ខេត្តបន្ទាយមានជ័យ ៖ អាជ្ញាធរឃុំគោករមៀតបានឱ្យដឹងថា លំនៅឋាន៣ទៅ៤ល្វែងនៅក្បែរផ្សារ ដោយគ្រាប់ទាហានសៀមផ្លោងដាក់បណ្តាលឱ្យឆេះអស់ នៅរសៀលថ្ងៃទី១៤ ខែធ្នូ ឆ្នាំ២០២៥ ខណៈដែលមានការភ្ញាក់ផ្អើលថា ឆេះផ្សារបឹងត្រកួន…
ខេត្តបន្ទាយមានជ័យ ៖ អាជ្ញាធរឃុំគោករមៀតបានឱ្យដឹងថា លំនៅឋាន៣ទៅ៤ល្វែងនៅក្បែរផ្សារ ដោយគ្រាប់ទាហានសៀមផ្លោងដាក់បណ្តាលឱ្យឆេះអស់ នៅរសៀលថ្ងៃទី១៤ ខែធ្នូ ឆ្នាំ២០២៥ ខណៈដែលមានការភ្ញាក់ផ្អើលថា ឆេះផ្សារបឹងត្រកួន ។
លោក ណៃ ពៅ មេឃុំគោករមៀតបានឱ្យដឹងបន្ថែមថា ទាហានថៃបានបាញ់ផ្លោង១គ្រាប់ធ្លាក់ចំផ្ទះប្រជាពលរដ្ឋបណ្តាលឱ្យឆេះអស់ចំនួន៣ទៅ៤ល្វែង នៅខាងកើតឆៀងខាងជើងផ្សារបឹងត្រកួន បណ្តាលខូចខាតអស់ទាំងស្រុងនៅពេលប្រជាពលរដ្ឋ ត្រូវបានជម្លៀសចេញអស់ មុនពេលទាហានថៃបានបើកការបាញ់ប្រហារមកលើលំនៅឋានប្រជាពលរដ្ឋស្លូតត្រង់ ដែលភ័យខ្លាចនាំគ្នារត់ទៅរកតំបន់សុវត្ថិភាព ។
លោកបានបញ្ជាក់ថា ការភ្ញាក់ផ្អើលក្រោយពេលមានផ្សែងហុយចេញទៅក្បែរផ្សារបឹងត្រកួន តែត្រូវបានកម្លាំងជួរមុខផ្តល់ព័ត៌មានថា អគ្គិភ័យដែលឆេះនោះមិនមែនឆេះផ្សារទេ គឺឆេះផ្ទះប្រជាពលរដ្ឋអស់ពី៣ទៅ៤ល្វែង ដោយគ្រាប់ផ្លោងទាហានសៀម នៅខាងកើតឆៀងខាងជើងផ្សារបឹងត្រកួន ។
លោក ណៃ ពៅ បានបញ្ជាក់ថា រយៈពេល១សប្តាហ៍នេះ ទាហានសៀមបានបើកការបាញ់ប្រហារមកលើភូមិសាស្គ្រឃុំគោករមៀត ស្រុកថ្មពួក បណ្តាលប្រជាពលរដ្ឋមានការភ័យខ្លាចបានភៀសខ្លួនចេញអស់ពីលំនៅឋានទៅរកតំបន់សុវត្ថិភាព ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានសរសេរលើបណ្តាញសង្គម នៅយប់ថ្ងៃទី១៤ ធ្នូ ឆ្នាំ២០២៥ថា ក្នុងសកម្មភាពឈ្លានពានប្រដាប់អាវុធរបស់យោធាថៃរយៈពេល៨ថ្ងៃមកនេះ យោធាសៀមបានយកជនស៊ីវិលជាគោលដៅនៃការវាយប្រហារ រួមមានផ្ទះសម្បែងជនស៊ីវិល ភូមិឋាន ស្ពាន ថ្នល់ សាលារៀន មន្ទីរពេទ្យ វត្តអារាម ។
ឯកឧត្តមបានលើកឡើងថា ការវាយប្រហារដោយសព្វាវុធធុនធ្ងន់រួមនឹងយន្តហោះទម្លាក់គ្រាប់បែក និងគ្រាប់បែកចង្កោម ផ្សែងពុល បង្កឱ្យប្រជាជនស៊ីវិលស្លូតត្រង់របស់កម្ពុជាបាត់បង់ជីវិតចំនួន១១រូប (ទារក១រូប) និងរបួសចំនួន៥៩រូប គិតត្រឹមថ្ងៃទី១៤ ខែធ្នូ ឆ្នាំ២០២៥ ។
ជាមួយគ្នានោះដែរ ឯកឧត្តមបានឲ្យដឹងថា ត្រឹមល្ងាចថ្ងៃទី១៤ ខែធ្នូ ឆ្នាំ២០២៥ប្រជាពលរដ្ឋដែលភៀសខ្លួនពីសកម្មភាពឈ្លានពានប្រដាប់អាវុធរបស់យោធាសៀមមានចំនួន ១២០ ៨១៤គ្រួសារ ស្មើនឹង ៤០៣ ៦០១នាក់ ក្នុងនោះស្ត្រីចំនួន ២០៨ ២៦៦នាក់ និងកុមារចំនួន ៩៧ ២០៩នាក់ ។
ឯកឧត្តមរដ្ឋមន្ត្រីបានលើកឡើងថា ភាគីសៀមត្រូវទទួលខុសត្រូវចំពោះសកម្មភាពនៃការរំលោភឈ្លានពានរបស់ខ្លួនលើទឹកដីកម្ពុជា និងយកជនស៊ីវិលជាគោលដៅនៃការវាយប្រហាររបស់ខ្លួន ។ នេះជាការរំលោភបំពានយ៉ាងធ្ងន់ធ្ងររបស់ភាគីថៃលើច្បាប់អន្តរជាតិ និងសិទ្ធិមនុស្ស ៕
ចែករំលែកព័តមាននេះ