ខេត្តបាត់ដំបង ៖ យោង«សេចក្ដីប្រកាសព័ត៌មាន»គ្មានលេខ… គ្មានហត្ថលេខា… ដែលគេអះអាងថា ចេញដោយ«អ្នកនាំពាក្យ»នៃស្នងការដ្ឋាននគរបាលខេត្តបាត់ដំបង បានប្រកាសនៅថ្ងៃទី០១ មេសា នេះ ជាសាធារណៈថា…
ខេត្តបាត់ដំបង ៖ យោង«សេចក្ដីប្រកាសព័ត៌មាន»គ្មានលេខ… គ្មានហត្ថលេខា… ដែលគេអះអាងថា ចេញដោយ«អ្នកនាំពាក្យ»នៃស្នងការដ្ឋាននគរបាលខេត្តបាត់ដំបង បានប្រកាសនៅថ្ងៃទី០១ មេសា នេះ ជាសាធារណៈថា «ជនសង្ស័យឈ្មោះ ស៊ីវ ជ័យសិដ្ឋ ភេទប្រុស ជាអ្នកបើករថយន្តបង្កគ្រោះថ្នាក់លើផ្លូវជាតិលេខ៥ ក្នុងភូមិកកោះ ឃុំកកោះ ស្រុកមោងប្ញស្សី បណ្តាលឱ្យស្លាប់ជនរងគ្រោះចំនួន០៥នាក់នោះ មិនបានចូលខ្លួនតាមការកោះហៅរបស់សមត្ថកិច្ចនៅឡើយទេ» ។ សូមរំលឹកថា៖ ក្បូនដង្ហែសាកសព០៦នាក់រួមគ្នាឆ្ពោះទៅទីមេនបូជា ក្រោមតំណក់ទឹកភ្នែកដ៏សោកសៅនៃមនុស្សរាប់រយនាក់ដែលបានជូនដំណើរចុងក្រោយ
សេចក្ដីប្រកាសព័ត៌មានរបស់អ្នកនាំពាក្យស្នងការនគរបាលខេត្តបាត់ដំបងនេះមិនបានបញ្ជាក់ពីមូលហេតុ ដែលជនសង្ស័យដ៏មហាប្រល័យលើដងផ្លូវនោះ មិនព្រមចូលខ្លួនបំភ្លឺ ឬបង្ហាញពីគោលការណ៍បន្ត ត្រូវចាត់ការបែបណានោះទេ លោកអ្នកនាំពាក្យគ្រាន់តែប្រាប់ឲ្យសាធារណៈបានជ្រាបជា«ព័ត៌មាន»ប៉ុណ្ណោះ ។
យោង«លិខិតកោះហៅ»លេខ០១៦ ចុះហត្ថលេខាដោយលោក ប៉ូវ វណ្ណឌី ស្នងការរងទទួលផែនសណ្ដាប់ធ្នាប់ កាលពីថ្ងៃទី២៨ មីនា ក្នុងនាមជាមន្ត្រីនគរបាលយុត្តិធម៌បាន «កោះហៅឈ្មោះ ស៊ីវ ជ័យសិដ្ឋ ភេទប្រុស អាយុ២០ឆ្នាំ (ជនសង្ស័យបង្កគ្រោះថ្នាក់ចរាចរណ៍បណ្ដាលឲ្យស្លាប់មនុស្ស០៦នាក់រាប់ទាំងកូនក្នុងផ្ទៃ)ឱ្យចូលខ្លួនមកកាន់ការិយាល័យចរាចរណ៍ផ្លូវគោកនៃស្នងការខេត្តបាត់ដំបងនៅម៉ោង១០ព្រឹកថ្ងៃទី០១ មេសា ឆ្នាំ២០២៦ ជាកំណត់ ដើម្បីបំភ្លឺក្នុងករណីបង្កគ្រោះថ្នាក់ចរាចរណ៍ ដែលកើតឡើងកាលពីថ្ងៃទី២៧ មីនា នៅស្រុកមោងប្ញស្សី» ។ ប៉ុន្តែបើគិតត្រឹមម៉ោង១២ថ្ងៃត្រង់ថ្ងៃទី ០១ មេសា គឺផុតឱសានវាទរយៈពេល០២ម៉ោង ដែលត្រូវជននេះចូលខ្លួនបំភ្លឺ
ហើយ ។
ដោយបែបនេះ ទើបលោកអ្នកនាំពាក្យនៃស្នងការខេត្តបាត់ដំបងត្រូវប្រញាប់ប្រញាល់ចេញសេចក្ដីប្រកាសព័ត៌មានជូនសាធារណៈជ្រាប ព្រោះបើយឺតយ៉ាវខ្លាចត្រូវប៉ុយថ្នាក់ដឹកនាំ ឬ រងការរិះគន់ពីមហាជន ។ គេមិនដឹងថា តើត្រូវបន្តនីតិវិធីបែបណាទៀតទេ ទៅលើជនសង្ស័យឈ្មោះ ស៊ីវ ជ័យសិដ្ឋ ដែលមិនព្រមចូលខ្លួនបំភ្លឺតាមលិខិតកោះហៅខាងលើនេះ? ត្រង់ចំណុចនេះ កោះសន្តិភាពបានព្យាយាមទំនាក់ទំនងតាមប្រព័ន្ធ«តេឡេក្រាម»ទៅលោក ប៉ូវ វណ្ណឌី ស្នងការរង ដែលបានចេញលិខិត «កោះហៅ»ជនសង្ស័យ ដើម្បីចង់ដឹងពីនីតិវិធីបន្តទៅលើជនសង្ស័យ ប៉ុន្តែលោកស្នងការរងរូបនេះ មិនបានលើកទូរស័ព្ទទេ ។
ដោយឡែក លោក ចាន់ សុធី ប្រធានការិយាល័យចរាចរណ៍បានផ្ដល់ចម្លើយខ្លីថា «ជនសង្ស័យឈ្មោះ ស៊ីវ ជ័យសិដ្ឋ ពិតជាមិនព្រមចូលខ្លួនមកបំភ្លឺតាមការកំណត់មែន» តែលោកក៏មិនបានបញ្ជាក់ពីនីតិវិធីបន្តដែរ ដោយលោកប្រាប់ថា «កំពុងប្រជុំ» ។
យោងលើសាវតារបស់ជនសង្ស័យដ៏មហាប្រល័យលើដងផ្លូវរូបនេះ ដែលប្រព័ន្ធផ្សព្វផ្សាយនានាចេញផ្សាយយ៉ាងផុសផុល និងឡើងកក្រើកអាណាចក្រកម្ពុជា ជនឈ្មោះ ស៊ីវ ជ័យសិដ្ឋ មានអាយុទើបតែ២០ឆ្នាំប៉ុណ្ណោះ ជាកូនប្រុសសំណប់របស់លោកឧត្តមសេនីយ៍ត្រី ស៊ីវ សុជាតិ ស្នងការរងខេត្តបន្ទាយមានជ័យ ។
អ្នកខេត្តជាប់ជាយដែនមួយនេះ ដែលស្គាល់ពីសាវតាគ្រួសារដ៏មានទ្រព្យ និងមានឥទ្ធិពលមួយនេះ សុទ្ធតែបានអះអាងប្រហាក់ប្រហែលគ្នាថា ជាគ្រួសាមួយដែលមានទ្រព្យស្ដុកស្ដម្ភគួរសមគ្រាន់បើដែរ បើធៀបទៅនឹងអ្នកដទៃទៀត នៅក្នុងខេត្តជាមួយគ្នា ។
បើតាមនិយាយពីជីវិតស៊ីវិល័យរបស់កូនៗវិញ ស៊ីវ ជ័យសិដ្ឋ គឺជាយុវជនវ័យក្មេងឈាមរាវម្នាក់ដែលរស់នៅយ៉ាងហ៊ឺហារ ជាមួយនឹងសម្ភារនិយម ទំនើបៗបែបកូនអភិជន ។ គេរាល់គ្នាតែងប្រទះឃើញកូនលោកផ្កាយ១រូបនេះ បង្ហាញរូបរាង និងជីវិតដ៏ហ៊ឺហារជាមួយនឹងរថយន្តទំនើបៗភាគច្រើននៅតំបន់ទីក្រុងប៉ោយប៉ែត ដែលជាទីក្រុងដ៏ស៊ីវិល័យមួយ នៅជាប់ទល់ដែនខ្មែរ-ថៃនៃខេត្តបន្តាយមានជ័យ ហើយយុវជននេះ ក៏ជាអ្នកធ្វើជំនួញដ៏ធំដុំម្នាក់ដែរនៅតំបន់ក្រោមដំបូលឆ័ត្រដ៏មានឥទ្ធិពលរបស់ឪពុក ។ នេះជាប្រភពខ្លះៗដែលកោះសន្តិភាពទទូលបានពីអ្នកខេត្តបន្ទាយមានជ័យ ។
ជនឈ្មោះ ស៊ីវ ជ័យសិដ្ឋ កូនប្រុសសំណប់របស់លោកផ្កាយ១ ស៊ីវ សុជាតិ ស្នងការរងខេត្តបន្ទាយមានជ័យ ត្រូវជាប់សង្ស័យថា បានបើករថយន្តស៊េរីដ៏ទំនើបរបស់ខ្លួន ម៉ាក Mercedes ពណ៌ខ្មៅ ពាក់ស្លាកលេខ កម្ពុជា C S.6168 ដែលមានបិទរូបថតស្ដេចជួញដូរគ្រឿងលំដាប់ពិភពលោក លំអលើជញ្ជាំងរថយន្តផង បុកពីក្រោយយ៉ាងកំរោលទៅលើមនុស្សចំនួន០៦នាក់ ដែលកំពុងជិះម៉ូតូចំនួន០២គ្រឿង ក្នុងគោលដៅស្រមទិសគ្នា កាលពីរាត្រីថ្ងៃទី២៧ មីនា កន្លងទៅនេះ នៅលើផ្លូវជាតិលេខ៥ ត្រង់ចំណុចភូមិកកោះ ឃុំកកោះ ស្រុកមោងប្ញស្សី ។
នៅក្នុងព្រឹត្តិការណ៍ដ៏មហាប្រល័យ ក្រោមស្នាដៃកូនលោកផ្កាយ១នេះ បានធ្វើឲ្យអ្នកជិះម៉ូតូចំនួន០៥នាក់ស្លាប់ភ្លាមៗ និងមានម្នាក់របួសធ្ងន់ធ្ងរ ។ នៅក្នុងចំណោមអ្នកស្លាប់ទាំង០៥នាក់ ត្រូវក្រុមគ្រួសារជនរងគ្រោះអះអាងថា មានស្ត្រីម្នាក់ស្លាប់ទាំងទារកអាយុ០៣ខែនៅក្នុងផ្ទៃផង ។ ដូច្នេះបានន័យថា នៅក្នុងព្រឹត្តិការណ៍ដ៏សោកនាដកម្មនេះ មានមនុស្សស្លាប់រហូតដល់ទៅចំនួន០៦នាក់ឯណោះ និងម្នាក់រងរបួសធ្ងន់ ។ ជនរងគ្រោះទាំងអស់សុទ្ធតែជាសាច់ញាតិ ឬជាក្រុមគ្រួសារតែមួយរស់នៅក្នុងភូមិ-ឃុំកើតហេតុតែម្ដង ។
យ៉ាងណាក្ដី គិតត្រឹមម៉ោងចេញផ្សាយនេះ ជនមច្ចុរាជដែលឈ្មោះក្នុងលិខិត«កោះហៅ»ឲ្យចូលបំភ្លឺបស់សមត្ថកិច្ច នៅតែគ្មានដំណឹងឈឹង សូម្បីតែលោកផ្កាយ១ ជាឪពុកបង្កើតក៏មិនដឹងថា កូនរបស់ខ្លួនរត់ទៅជើងមេឃ ជើងមុង ឬចេញក្រៅស្រុកដែរ ។
ពេលនេះ មហាជនទូទាំងប្រទេស បាននិងកំពុងរង់ចាំមើលថា តើមន្ត្រីជំនាញ ឬថ្នាក់ដឹកនាំប្រទេសមានចំណាត់ការបន្តបែបណាទៀតទៅលើជនដ៏មហាពិឃាតលើដងផ្លូវ? តើលោក ស៊ីវ សុជាតិ ស្នងការរង ដែលជាឪពុករបស់ជនឈ្មោះ ស៊ីវ ជ័យសិដ្ឋ អាចនាំកូនប្រុសសំណប់យកមកប្រគល់ជូនមន្ត្រីជំនាញ ឬជូនតុលាការបានដែរ ឬអត់ ? តើនាំមកដោយរបៀបណា? តែសូមកុំនាំគ្នាសំងំធ្វើស្ងាត់ៗ? ៕
ចែករំលែកព័តមាននេះ