ខេត្តបាត់ដំបង ៖ សម្លេងភ្លេងខ្លងខែកហែកមេឃជ្រែកអាកាសក្នុងក្បូនដង្ហែសាកសពជនរងគ្រោះដែលស្លាប់ដោយគ្រោះថ្នាក់ចរាចរណ៍ចំនួន០៦នាក់ (រាប់ទាំងកូនក្នុងផ្ទៃ) នារសៀលថ្ងៃទី២៩ មីនា ឆ្ពោះទៅកាន់ទីមេនបូជាក្នុង «វត្តកកោះ» ស្រុកមោងប្ញស្សី ក្រោមតំណក់ទឹកភ្នែកដ៏សោកសៅនៃសាចញាតិ…
ខេត្តបាត់ដំបង ៖ សម្លេងភ្លេងខ្លងខែកហែកមេឃជ្រែកអាកាសក្នុងក្បូនដង្ហែសាកសពជនរងគ្រោះដែលស្លាប់ដោយគ្រោះថ្នាក់ចរាចរណ៍ចំនួន០៦នាក់ (រាប់ទាំងកូនក្នុងផ្ទៃ) នារសៀលថ្ងៃទី២៩ មីនា ឆ្ពោះទៅកាន់ទីមេនបូជាក្នុង «វត្តកកោះ» ស្រុកមោងប្ញស្សី ក្រោមតំណក់ទឹកភ្នែកដ៏សោកសៅនៃសាចញាតិ និងមនុស្សរាប់រយនាក់ដែលបានជូនដំណើរចុងក្រោយ ប្រៀបបាននឹងសម្លេងជនរងគ្រោះកំពុងដង្ហើយហៅយ៉ាងរន្ធឹករកយុត្តិធម៌ ខណៈឃាត.ករដ៏មហាប្រល័យនេះកំពុងសំងំខ្លួនក្រៅសំណាញ់ច្បាប់នៅឡើយ ។
ពិតជាគួរឱ្យសោកសៅ និងរន្ធត់ពេកក្រៃ នៅពេលឃើញ «មេនបូជាសព»ចំនួន០៥ ត្រូវបានគេរៀបចំជាជួរក្បែរៗគ្នានៅក្នុងបរិវេណនៃវត្តកកោះ ស្ថិតក្នុងឃុំកកោះ ស្រុកមោងប្ញស្សី ដើម្បីត្រៀមបូជាសាកសពជនរងគ្រោះចំនួន០៦នាក់ (កូនក្នុងផ្ទៃអាយុ៣ខែម្នាក់ផង) ដែលស្លាប់ដោយសារគ្រោះថ្នាក់ចរាចរណ៍ ។ សាច់ញាតិ និងមនុស្សរាប់រយនាក់ទៀត បានជូនដំណើរចុងក្រោយនៃក្បូនដង្ហែសពរួមគ្នា ឆ្ពោះទៅកាន់ទីលានបូជា ក្រោយសម្លេងភ្លេងខ្លងខែក និងសម្រែកស្រែកទ្រហោរយំកងរំពង ស្ដាយស្រណោះអាឡោះអាល័យដល់សពជនរងគ្រោះ ។
សាកសពជនរងគ្រោះជាក់ស្ដែងចំនួន០៥នាក់ ។ ប៉ុន្តែថែមទារកក្នុងសាកសពស្ត្រីម្នាក់ ផង សរុបទៅស្លាប់ចំនួន០៦នាក់ ហើយមានម្នាក់ទៀតរងរបួសធ្ងន់កំពុងសង្គ្រោះបន្ទាន់នៅមន្ទីរពេទ្យ ។ ក្រុមជនរងគ្រោះ ត្រូវរថយន្តជនមច្ចុរាជបុកសម្លាប់ទាំងកំរោល និងយ៉ាងអយុត្តិធម៌ កាលពីរាត្រីថ្ងៃទី២៧ មីនា នៅលើកំណាត់ផ្លូវជាតិលេខ៥ ត្រង់ចំណុចភូមិកកោះ ឃុំកកោះ ស្រុកមោងប្ញស្សី ។
របាយការណ៍សមត្ថកិច្ច ជនមច្ចុរាជបានបើករថយន្តបុកក្រុមជនរងគ្រោះពីក្រោយទាំងកំរោល ពេលកំពុងធ្វើដំណើរស្របទិសគ្នាពីកើតទៅលិច ។ ហើយរថយន្តបុកជនរងគ្រោះ ខណៈដែលក្រុមជនរងគ្រោះកំពុងជិះម៉ូតូរួមដំណើរគ្នាចំនួន០២គ្រឿង បណ្ដាលឲ្យដួលស្លាប់យ៉ាងរន្ធត់រដូករណែលពេញលើថ្នល់ជាតិ ។ រីឯម្ចាស់រថយន្តបានបើកទ្វារចុះរត់គេចខ្លួនបាត់ស្រមោលរហូតមកទល់នឹងពេលនេះ ។
របាយការណ៍សមត្ថកិច្ចបានឲ្យដឹងទៀតថា រថយន្តបង្កនោះស៊េរីទំនើបម៉ាក Mercedes Benz AMG GT53 ពណ៌ខ្មៅ ពាក់ស្លាកលេខ កម្ពុជា C S.6168 អ្នកបើកបរមិនត្រូវបានគេស្គាល់អត្តសញ្ញាណទេ ពេលកើតហេតុ ព្រោះជននេះ បានរត់ចោលរថយន្តដែលបង្កគ្រោះថ្នាក់ ។ ប៉ុន្តែអត្តសញ្ញាណម្ចាស់រថយន្តមច្ចុរាជនេះ ត្រូវបានគេស្គាល់រហូតត្រូវបានគេយកទៅបង្ហោះព្រោងព្រាតពាសពេញក្នុងបណ្ដាញសង្គម នៅថ្ងៃបង្ហើយ នៃពិធីបុណ្យសពជនរងគ្រោះទាំង០៦នាក់ (៣០.០៣.២៦) ។
យោងតាមបណ្ដាញសង្គម និងប្រព័ន្ធផ្សព្វផ្សាយនានា ដែលបានពណ៌នាអំពីអត្តសញ្ញាណម្ចាស់រថយន្តនៅថ្ងៃទី៣០ មីនា នេះ រួមទាំងការទទួលស្គាល់របស់សមត្ថកិច្ចជំនាញផង ម្ចាស់រថយន្តដែលប្រល័យនេះ ត្រូវគេស្គាល់ថា ឈ្មោះ ស៊ីវ ជ័យសិដ្ឋ ភេទប្រុស ជាអ្នកជំនួញដ៏ល្បីវ័យក្មេងម្នាក់ប្រចាំក្រុងប៉ោយប៉ែត ។ ហើយត្រូវគេចង្អុលបង្ហាញបន្ថែមថា ម្ចាស់រថយន្ត ក៏ជាកូនប្រុសរបស់លោកស៊ីវ សុជាតិ ហៅតោ មានតួនាទីជាស្នងការរងខេត្តបន្តាយមានជ័យ ។
កោះសន្តិភាពមិនអាចទំនាក់ទំនងសុំការបញ្ជាក់ពីលោក ស៊ីវ សុជាតិ ហៅតោ ស្នងការរងខេត្តបន្ទាយមានជ័យបានទេ រហូតមកទល់នឹងម៉ោងផ្សាយនេះ ពាក់ព័ន្ធនឹងមានការអះអាងថា ម្ចាស់រថយន្តជាកូនប្រុសរបស់លោក ។ ប៉ុន្តែនាយការិយាល័យចរាចរណ៍ជើងគោកនៃស្នងការខេត្តបាត់ដំបង លោក ចាន់ សុធី បានទទួលស្គាល់ថា ម្ចាស់រថយន្តពិតជាមានឈ្មោះដូចការផ្សព្វផ្សាយមែន តែយើងមិនទាន់ដឹងថា តើពេលកើតហេតុ ឈ្មោះ ស៊ីវ ជ័យសិដ្ឋ នោះជាបើកបរ ឬអុ្នកផ្សេង?
លោក ចាន់ សុធី បានប្រាប់កោះសន្តិភាពតាមទូរស័ព្ទថា ម្ចាស់រថយន្តពិតជាឈ្មោះ ស៊ីវ ជ័យសិដ្ឋ តែលោកមិនបានបញ្ជាក់ថា ជាកូនលោកស្នងការរងខាងលើមែន ឬមិនមែននោះទេ ។ លោក ចាន់ សុធី គ្រាន់តែបញ្ជាក់ និងទទួលស្គាល់យ៉ាងជាក់លាក់ថា «រថយន្តស៊េរីទំនើបខាងលើនេះ ពិតជាបានបើកបុកអ្នកជិះម៉ូតូចំនួន០២គ្រឿង ពីក្រោយមែនពេលកំពុងធ្វើដំណើរស្របទិសគ្នា» ។
ពេលនេះ យើងស្គាល់អត្តសញ្ញាណម្ចាស់រថយន្ត តែយើងមិនទាន់ឃាត់ខ្លួនម្ចាស់រថយន្តនេះបាននៅឡើយទេ ព្រោះជននេះកំពុងគេចខ្លួន ប៉ុន្តែយើងកំពុងទំនាក់ទំនងតាមខ្សែបណ្ដាញ ដើម្បីឲ្យម្ចាស់រថយន្តបង្កចូលខ្លួនដោះស្រាយតាមផ្លូវច្បាប់ ខណៈពិធីបុណ្យសពជនរងគ្រោះក៏ត្រូវបានបញ្ចប់ហើយដែរនាថ្ងៃទី៣០ មីនា នេះ ៕
ចែករំលែកព័តមាននេះ