ខេត្តកំពង់ស្ពឺ៖ ព្រោះតែប្រយោជន៍ផ្ទាល់ខ្លួន អ្នកវិនិយោគផ្សារកំពង់ស្ពឺថ្មីទើបដេញថ្លៃបានថ្មីៗ ហើយមកវិនិយោគនៅពេលថ្មីៗនេះ បានបញ្ជាឲ្យបុគ្គលិកនិងកូនចៅរបស់ខ្លួនយកផ្លូវសាធារណៈជុំវិញផ្សារកំពង់ស្ពឺ ធ្វើជាកន្លែងផ្ញើម៉ូតូបង្កឲ្យមានការកកស្ទះដល់ប្រជាពលរដ្ឋអ្នកធ្វើដំណើរជុំវិញផ្សារកំពង់ស្ពឺ ។
ជាក់ស្ដែងនៅព្រឹកថ្ងៃទី១៩ ខែមេសា ឆ្នាំ២០២៦នេះ ប្រជាពលរដ្ឋអ្នកធ្វើដំណើរលើកឡើងថា ការកកស្ទះចរាចរណ៍នៅជុំវិញផ្សារកំពង់ស្ពឺ កើតមានឡើងស្ទើរតែជារៀងរាល់ថ្ងៃ ព្រោះតែអ្នកវិនិយោគយកផ្លូវសាធារណៈធ្វើជាកន្លែងផ្ញើកង់-ម៉ូតូ ហើយអ្នកបើកបររថយន្ត និងម៉ូតូ ពិបាកក្នុងការធ្វើដំណើរខ្លាំងណាស់ ចំពោះសន្តិសុខនិងសណ្តាប់ធ្នាប់ មិនឃើញមកអើតឈ្ងោកនោះទេ បើទោះបីជាមានការកកស្ទះយ៉ាងណាក៏ដោយ។
ការយកផ្លូវសាធារណៈដាក់ផ្ញើម៉ូតូជុំវិញផ្សារកំពង់ស្ពឺពីសំណាក់អ្នកវិនិយោគផ្សារដែលទើបនិងដេញថ្លៃបាននេះត្រូវបានប្រជាពលរដ្ឋរិះគន់ថាព្រោះតែប្រយោជន៍របស់ខ្លួន បែរជាយកផ្លូវសាធារណៈរបស់រដ្ឋដាក់ជាកន្លែងផ្ញើម៉ូតូសម្រាប់យកលុយដាក់ហោប៉ាវខ្លួនឯងទៅវិញ។ ដែលទង្វើរបស់អ្នកវិនិយោគផ្សារកំពង់ស្ពឺថ្មីដែលទើបដេញថ្លៃបាននេះហាក់បីដូចជាមិនគោរពទៅតាមគោលការណ៍នៃការដេញថ្លៃរបស់ជំនាញពាក់ព័ន្ធ។ ដោយសារតែកន្លងទៅអ្នកវិនិយោគផ្សារកំពង់ស្ពឺចាស់ដែលគេស្គាល់ថាក្រុមហ៊ុនរបស់លោកហោ យាន ជាក្រុមហ៊ុនវិនិយោគតាមបណ្ដាផ្សារនានាមិនដែលមានការកកស្ទះក្នុងការធ្វើដំណើរជុំវិញផ្សារកំពង់ស្ពឺនេះទេ។ ប៉ុន្តែអ្នកវិនិយោគផ្សារកំពង់ស្ពឺថ្មីនេះហាក់បីដូចជាមានអំណាចខ្លាំងណាស់ ព្រោះតែប្រយោជន៍ផ្ទាល់ខ្លួន មិនគិតពីផលប្រយោជន៍សាធារណៈរបស់រដ្ឋនោះទេបែរជាយកផ្លូវសាធារណៈរបស់រដ្ឋនៅជុំវិញផ្សារកំពង់ស្ពឺធ្វើជាកន្លែងផ្ញើម៉ូតូយកលុយដាក់ហោប៉ាវយ៉ាងរំភើយទៅវិញ។
ពាក់ព័ន្ធនិងការលើកឡើងរបស់ប្រជាពលរដ្ឋខាងលើនេះអ្នកយកព័ត៌មានយើងមិនអាចសុំការពន្យល់ពីអ្នកវិនិយោគផ្សារកំពង់ស្ពឺថ្មីដែលទើបនឹងដេញថ្លៃបាននោះទេដោយសារតែមិនមានលេខទូរស័ព្ទធ្វើការសួរនាំនោះទេ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ