៥០ថ្ងៃនៃសង្គ្រាមមជ្ឈិមបូព៌ា! ពិភពលោកខាតបង់ប្រមាណ៥០ពាន់លានដុល្លារទៅលើប្រេង
អន្តរជាតិ ៖ យោងតាមអ្នកវិភាគ និងការគណនារបស់ទីភ្នាក់ងារសារព័ត៌មាន Reuters ដែលចេញផ្សាយកាលពិថ្ងៃទី១៧ ខែមេសា ឆ្នាំ២០២៦ បានបង្ហាញថា នៅក្នុងរយៈពេល…
អន្តរជាតិ ៖ យោងតាមអ្នកវិភាគ និងការគណនារបស់ទីភ្នាក់ងារសារព័ត៌មាន Reuters ដែលចេញផ្សាយកាលពិថ្ងៃទី១៧ ខែមេសា ឆ្នាំ២០២៦ បានបង្ហាញថា នៅក្នុងរយៈពេល ៥០ ថ្ងៃនៃសង្គ្រាមរវាងសហរដ្ឋអាមេរិក និងអ៊ីស្រាអែលជាមួយនឹងអ៊ីរ៉ង់ ឬអាចហៅបានថា សង្គ្រាមតំបន់មជ្ឈិមបូព៌ានោះ ពិភពលោកបានខាតបង់ប្រាក់ជាង៥០ពាន់លានដុល្លារអាមេរិកទៅលើប្រេងឆៅដែលមិនត្រូវបានផលិត ហើយផលវិបាកនៃវិបត្តិនេះ អាចនឹងឃើញនៅរយៈពេលជាច្រើនខែ និងសូម្បីតែច្រើនឆ្នាំខាងមុខទៀត។
យោងតាមទិន្នន័យក្រុមហ៊ុនវិភាគទិន្នន័យប្រេងសកល Kpler បានបង្ហាញថា ចាប់តាំងពីជម្លោះចាប់ផ្តើមនៅចុងខែកុម្ភៈមក ប្រេងឆៅ និងឧស្ម័នរាវ (Condensate) ជាង ៥០០ លានបារ៉ែលបានបាត់វត្តមានពីទីផ្សារពិភពលោក ដែលនេះជាការរំខានដល់ការផ្គត់ផ្គង់ថាមពលដ៏ធំបំផុតក្នុងប្រវត្តិសាស្ត្រសម័យទំនើប។ បើតាមការប៉ាន់ស្មានរបស់ Reuters អាចប្រៀបធៀបថា ប្រេងឆៅ ៥០០ លានបារ៉ែលដែលបានបាត់បង់ ស្មើនឹងកាត់បន្ថយតម្រូវការអាកាសចរណ៍នៅទូទាំងពិភពលោករយៈពេល១០សប្តាហ៍ គ្មានការធ្វើដំណើរតាមដងផ្លូវដោយយានយន្តនៅទូទាំងពិភពលោករយៈពេល១១ថ្ងៃ ឬគ្មានប្រេងផ្គត់ផ្គង់សម្រាប់សេដ្ឋកិច្ចពិភពលោករយៈពេល៥ថ្ងៃ។
បណ្តាប្រទេសនៅឈូងសមុទ្រអារ៉ាប់បានបាត់បង់ផលិតកម្មប្រេងឆៅប្រហែល ៨ លានបារ៉ែលក្នុង១ថ្ងៃសម្រាប់ខែមីនា។ ទិន្នន័យ Kpler បានឱ្យដឹងថា ការនាំចេញប្រេងឥន្ធនៈយន្តហោះពីប្រទេសអារ៉ាប៊ីសាអូឌីត កាតា អេមីរ៉ាតអារ៉ាប់រួម គុយវ៉ែត បារ៉ែន និងអូម៉ង់ បានធ្លាក់ចុះពីប្រហែល ១៩,៦ លានបារ៉ែលក្នុងខែកុម្ភៈ មកត្រឹម ៤,១ លានបារ៉ែល សម្រាប់ខែមីនា និងខែមេសារួមបញ្ចូលគ្នា។ លោក Johannes Rauball អ្នកវិភាគជាន់ខ្ពស់នៅ Kpler បានលើកឡើងថា ដោយសារតម្លៃប្រេងឆៅជាមធ្យមប្រហែល១០០ដុល្លារក្នុង១បារ៉ែល ចាប់តាំងពីជម្លោះបានចាប់ផ្តើម ដូច្នេះបរិមាណដែលបាត់បង់ទាំងនោះ តំណាងឱ្យប្រាក់ចំណូលដែលបាត់បង់ប្រហែល ៥០ ពាន់លានដុល្លារអាមេរិក។
ការស្តារឡើងវិញពេញលេញអាចនឹងត្រូវចំណាយពេលច្រើនឆ្នាំ បើទោះបីជាច្រកសមុទ្រហ័រមូស (Hormuz) បើកឡើងវិញយ៉ាងណាក៏ដោយ ខណៈដែលបច្ចុប្ប្បន្ន បញ្ហាច្រកដឹកជញ្ជូនប្រេងដ៏សំខាន់មួយនេះ នៅតែជាការប្រទាញប្រទង់យ៉ាងខ្លាំងរវាងសហរដ្ឋអាមេរិក និងអ៊ីរ៉ង់។ ជាមួយគ្នានោះដែរ ការងើបឡើងវិញនៃផលិតកម្មប្រេង និងលំហូរដឹកជញ្ជូនត្រូវបានរំពឹងថានឹងដំណើរការយឺតផងដែរ។
ទិន្នន័យពី Kpler បានបន្ថែមថា ស្តុកប្រេងឆៅសកលនៅលើគោកបានធ្លាក់ចុះប្រហែល ៤៥ លានបារ៉ែលក្នុងខែមេសា។ ចាប់តាំងពីចុងខែមីនាមក ការកាត់ដាច់ផលិតកម្មបានឈានដល់ប្រហែល ១២ លានបារ៉ែលក្នុង១ថ្ងៃ។
លោក Rauball បានបន្ថែមថា ទីតាំងប្រេងឆៅធំៗនៅគុយវ៉ែត និងអ៊ីរ៉ាក់ អាចចំណាយពេលពី ៤ ទៅ ៥ ខែដើម្បីវិលទៅរកកម្រិតប្រតិបត្តិការធម្មតាវិញ ដែលអូសបន្លាយពេលការទាញយកស្តុកប្រេងពេញ១រដូវក្តៅ។ រីឯការខូចខាតដល់សមត្ថភាពចម្រាញ់ឧស្ម័នធម្មជាតិរាវ (LNG) នៅទីក្រុងឧស្សាហកម្ម Ras Laffan របស់ប្រទេសកាតា មានន័យថា ការស្តារឡើងវិញពេញលេញនៃហេដ្ឋារចនាសម្ព័ន្ធថាមពលក្នុងតំបន់នោះ អាចចំណាយពេលច្រើនឆ្នាំ៕
ចែករំលែកព័តមាននេះ