ខណៈដែលមាសកាន់តែទទួលបានការគាំទ្រ និងមានទំនុកចិត្ត នៅស្របពេលដែលសេដ្ឋកិច្ចពិភពលោក ស្ថិតនៅក្នុងមន្ទិលជាបន្តបន្ទាប់ នៅប៉ុន្មានឆ្នាំចុងក្រោយ កម្ពុជាបានប្រកាសបើកដំណើរការអណ្តូងរ៉ែមាសទី២ ។ លោក កែវ រតនៈ…
ខណៈដែលមាសកាន់តែទទួលបានការគាំទ្រ និងមានទំនុកចិត្ត នៅស្របពេលដែលសេដ្ឋកិច្ចពិភពលោក ស្ថិតនៅក្នុងមន្ទិលជាបន្តបន្ទាប់ នៅប៉ុន្មានឆ្នាំចុងក្រោយ កម្ពុជាបានប្រកាសបើកដំណើរការអណ្តូងរ៉ែមាសទី២ ។
លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានអះអាង កាលពីថ្ងៃទី២២ ខែមេសា ឆ្នាំ២០២៦ថា អណ្តូងរ៉ែមាសថ្មីនេះ គឺមាននៅតំបន់ព្រំប្រទល់រវាងខេត្តកំពង់ធំ និងខេត្តក្រចេះ ។
អណ្តូងរ៉ែមាសទី២នេះ ត្រូវបានគេដឹងថា គឺបានឈានដល់ដំណាក់កាលចម្រាញ់រ៉ែមាសហើយ ដោយប្រតិបត្តិការនោះ គឺដំណើរការដោយក្រុមហ៊ុន ខេមបូឌាន ខេ៨៨ អ៊ិនដាសស្ត្រី ឯ.ក (CAMBODIAN K88 INDUSTRY CO., LTD.)។
ក្រុមហ៊ុន ខេមបូឌាន ខេ88 អ៊ិនដាសស្ត្រី ឯ.ក បានឲ្យដឹងថា ក្រុមហ៊ុនបានចាប់ផ្តើមសិក្សា ស្រាវជ្រាវរ៉ែ នៅទីនោះតាំងពីឆ្នាំ២០២០ រហូតឈានទៅដល់ការប្រកាសរកឃើញជម្រករ៉ែមាស ដែលមានលក្ខណៈសេដ្ឋកិច្ចនៅឆ្នាំ២០២៣ និងបានឈានដល់ការរៀបចំសាងសង់និងដំណើរការរោងចក្រចម្រាញ់រ៉ែមាសជាមួយនឹងទុនវិនិយោគសរុបប្រមាណ៤០លានដុល្លារ ។
ក្រុមហ៊ុនបានបន្តថា ជាមួយនឹងប្រតិបត្តិការនេះ គឺវាបានបង្កើតការងារដោយផ្ទាល់ជូនប្រជាពលរដ្ឋខ្មែរចំនួន៣៧៥ នាក់ បន្ថែមពីលើការបង់សួយសារ និងពន្ធអាករនានាតាមច្បាប់ជាប្រយោជន៍របស់ជាតិ ។
គួររំលឹកថា អណ្តូងរ៉ែមាសទី១ នៅកម្ពុជាមានទីតាំងនៅតំបន់អូខ្វោវ ស្រុកកែវសីមា ខេត្តមណ្ឌលគិរី បានបើកដំណើរការនៅថ្ងៃទី២១ មិថុនា ឆ្នាំ២០២១ ដោយក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត Renaissance Minerals (Cambodia) Limited របស់ប្រទេសអូស្ត្រាលី ។
បើតាមលោករដ្ឋមន្ត្រី នៅក្នុងរយៈពេល៥ ឆ្នាំមកនេះ វិស័យរ៉ែមាសនៅកម្ពុជា បានផ្តល់ចំណូលចូលជាតិប្រមាណជា២០០លានដុល្លាររួចហើយ ៕
ចែករំលែកព័តមាននេះ