ខេត្តកំពង់ឆ្នាំង ៖ លោក សេង វិចិត្រ អភិបាលស្រុក​រលាប្អៀរ ខេត្តកំពង់ឆ្នាំង​  រួម​និង​ក្រុមការងារ នៅ​ព្រឹក​ថ្ងៃ​ទី 24 ខែមីនា ឆ្នាំ 2026 បាន​អញ្ជើញ ចុះ​ទៅ​ដល់ទី​តាំង ករណី​គ្រោះថ្នាក់​ចរាចរណ៍​ផ្លូវទឹក ដែល​បាន​កើតឡើង​កាលពី​ថ្ងៃ​ទី 23 ខែមីនា ឆ្នាំ 2026 នៅ​ចំណុច​ភូមិ​ក្បាលកោះ សង្កាត់​កោះដាច់​  ខណ្ឌ ជ្រោយចង្វារ រាជធានី​ភ្នំពេញ បណ្ដាល​ឱ្យ ប្រជាពលរដ្ឋ​ចំនួន 6 នាក់ រស់នៅ​ភូមិ ថ្មកែវ ឃុំ​ស្វាយ​ជ្រុំ ស្រុក​រលាប្អៀរ បាន​រង​គ្រោះ ក្នុង​នោះ​ម្នាក់​បាន​ស្លាប់ ៣​នាក់​បាត់​ខ្លួន និង​២​នាក់​រួច​ផុត​ជីវិត ។ គួររំលឹកថា រក​ឃើញ​ស​.​ព​នារី ២​នាក់​ទៀត ក្នុង​ករណី​លិ​.​ច​ទូក​ស្មាច់ នៅ​រមណីយដ្ឋាន​ឆ្នេរ​ខ្សាច់​កោះដាច់ កាលពី​ម្សិលមិញ

លោក សេង វិចិត្រ បាន​បញ្ជាក់​តាម​ទូរ​សព្ទ​ដោយ​ក្តី​សោកសង្រេង​ថា ក្រុម​គ្រួសារ​រង​គ្រោះ​ទាំង 6 នាក់ បាន​អញ្ជើញ​ទៅ​ធ្វើ​បុណ្យសព​ដន្លង នៅ​ភូមិ​ក្បាលកោះ សង្កាត់​កោះដាច់ ។​ក្រោយ​ពី បញ្ចប់​កម្មវិធី​បុណ្យសព​រួច​ហើយ​ក៏​នាំ​គ្នា​វិល​ត្រឡប់​មក​ខេត្តកំពង់ឆ្នាំង​វិញ​។ ប៉ុន្តែ​ជា​អកុសល ពេល​ឆ្លង​កា​ឡូត​បា​ឡា​ស្មាច់ មក​ដល់​ពាក់កណ្ដាល​ទន្លេមេគង្គ ស្រាប់តែ​កាណូត​បា​ឡា​ស្មាច់​បាន​លិច​ចូល​ទន្លេ (​មិន​ច្បាស់​ពី​មូលហេតុ )​បណ្ដាល​ឱ្យ​ជន​រង​គ្រោះ​ទាំង 6 នាក់ រួមមាន​ម្ដាយ, កូន និង​ចៅ បាន​លិច​ចូល​ទន្លេ នឹង​បាន​បាត់​ខ្លួន​ចំនួន 3 នាក់ រក​ឃើញ​សព​ម្នាក់ ចំណែក​២​ទៀត បាន​ជួយ​សង្គ្រោះ​ទាន់​ពេលវេលា ។

ជនរងគ្រោះទាំង៦នាក់ខាងលើ រួមមាន​១-ឈ្មោះ​ហ៊ឹ​ម សោ ភេទ​ស្រី​ អាយុ 60 ឆ្នាំ បាន​ស្លាប់​ (ស្ត្រី​រង​គ្រោះ​រូប​នេះ​ត្រូវជា​ដន្លង​សព​ដែល​ទើបបាន​បញ្ចប់​ក្នុង​ពិធី​បុ​ណ​) ២-ឈ្មោះ​តុ​ន ស្រី​សឿ​ន ភេទ​ស្រី អាយុ 46 ឆ្នាំ​ បាន​​ស្លាប់ (​ស្ត្រី​រូប​នេះ​ត្រូវជា​កូន​របស់​លោកយាយ​ហឹ​ម​សោ ) ៣-កុមា​រា ឈ្មោះ ចិ​ត្រា វិច្ឆិកា អាយុ 6 ឆ្នាំ បានស្លាប់ ៤ -កុមារី ឈ្មោះ ចិ​ត្រា បញ្ញា អាយុ 5 ឆ្នាំ​ បាន​ស្លាប់ (កុមារ​ទាំង​ពីរ​នាក់​នេះ​ត្រូវជា​កូន របស់​ស្ត្រី​ឈ្មោះ តុ​ន​ស្រី​សឿ​ន)​  ៥-ឈ្មោះ ចាន់ សុ​ជាតិ ភេទ​ប្រុស អាយុ 50​ឆ្នាំ​ ​នៅ​រស់​ និង 6-ឈ្មោះ​ហ៊ឹ​ម ស្រី​វន ភេទ​ស្រី​ អាយុ 46 ឆ្នាំ នៅ​រស់​ (បុរស​ស្ត្រី​២​នាក់​នេះ​ត្រូវជា​ប្អូន​របស់​លោកយាយ ហ៊ឹ​ម​សោ) ។​ ជន​រង​គ្រោះ​ទាំង 6 នាក់​រស់នៅ​ភូមិ​ថ្មកែវ ឃុំ​ស្វាយ​ជ្រុំ ស្រុក​រលាប្អៀរ ខេត្តកំពង់ឆ្នាំង ។

អភិបាលស្រុក​រលាប្អៀរ លោក សេង វិចិត្រ បាន​បញ្ជាក់​នៅ​រសៀល​ថ្ងៃ​ទី 24 មីនា​នេះ​ថា ក្រោយ​ពេល​ទៅ​ដល់​កន្លែង​កើតហេតុ ធ្វើ​ពិធី​បន់ស្រន់​តាម​អបិយ​ជំនឿ​ដើម្បី​ឲ្យ​រក​សព​ឃើញ រួច​ហើយ​ក៏​បាន​ទៅ​សាកសួរ ជន​រង​គ្រោះ​ដែល​កំពុង​សម្រាក​ព្យាបាល​នៅ​មន្ទីរពេទ្យ ។​

លោក​ក៏បាន​បន្ថែម​ទៀត​ថា គិត​ត្រឹម​ម៉ោង 4​និង 50 នាទី ល្ងាច នេះ សព​ជន​រង​គ្រោះ​បាន​ប្រទះ​ឃើញ​២​នាក់​ហើយ នៅ​បាត់​តែ​ម្នាក់ ទៀត​រក​ពុំ​ទាន់​ឃើញ​នៅឡើយ​ ៕