ទីក្រុងប៉េកាំង ៖ បន្ទាប់ពីរបាយការណ៍ថា យ៉ាងហោចណាស់មានករណីឆ្លងវីរុសនីប៉ាហ៍ (Nipah) ចំនួន ២ ករណីត្រូវបានបញ្ជាក់នៅក្នុងរដ្ឋបេងហ្គាល់ខាងលិច (West Bengal)…
ទីក្រុងប៉េកាំង ៖ បន្ទាប់ពីរបាយការណ៍ថា យ៉ាងហោចណាស់មានករណីឆ្លងវីរុសនីប៉ាហ៍ (Nipah) ចំនួន ២ ករណីត្រូវបានបញ្ជាក់នៅក្នុងរដ្ឋបេងហ្គាល់ខាងលិច (West Bengal) ប្រទេសឥណ្ឌា ក្នុងរយៈពេល១សប្តាហ៍កន្លងមកនេះ ការព្រួយបារម្ភកាន់តែខ្លាំងឡើងត្រូវបានគេសង្កេតឃើញនៅក្នុងប្រទេសចិន។ គួររំលឹកថា ការទទួលទានទឹកត្នោត ក៏ជាកត្តាចម្លងវីរុស«នីប៉ាហ៍»ដែរ
បើទោះបីជាអ្នកជំនាញសុខភាពសាធារណៈនៅក្នុងប្រទេសចិន បានវាយតម្លៃហានិភ័យនៃការចម្លងវីរុសនីប៉ាហ៍ថាមានកម្រិតទាបក៏ដោយ ក៏លើបណ្តាសង្គមចិន នៅតែឃើញការព្រួយបារម្ភកាន់តែខ្លាំងអំពីវីរុសដ៏គ្រោះថ្នាក់នេះ ជាពិសេសនៅពេលថ្ងៃឈប់សម្រាកបុណ្យចូលឆ្នាំចិនខិតជិតមកដល់។ ដ្បិតនៅក្នុងប្រទេសចិន បុណ្យចូលឆ្នាំប្រពៃណីជាតិ ជាពេលវេលាដែលមនុស្សគ្រប់គ្នាធ្វើដំណើរទៅកាន់កន្លែងផ្សេងៗច្រើនបំផុត។
យោងតាមកាសែតហុងកុង South China Morning Post (SCMP) កាលពីថ្ងៃទី២៧ ខែមករា ឆ្នាំ២០២៦ បានរាយការណ៍ថា ការដេញដោលអំពីវីរុសនីប៉ាហ៍ កំពុងកើនឡើងខ្លាំងបំផុតលើបណ្តាញសង្គមនៅក្នុងប្រទេសចិន ដោយមនុស្សជាច្រើននៅតែត្រូវបានលងបន្លាចដោយការបិទខ្ទប់ អំឡុងពេលការផ្ទុះឡើងជំងឺកូវីដ១៩ (Covid-19)។ ម្ចាស់គណនីម្នាក់បានសរសេរថា «វាគួរឱ្យខ្លាចណាស់ក្នុងការគិតពីវា ជាពិសេសជាមួយនឹងបុណ្យចូលឆ្នាំចិន ខិតជិតមកដល់។ ខ្ញុំមិនចង់ឆ្លងកាត់ការបិទខ្ទប់ ឬការដាក់ឱ្យនៅដាច់ដោយឡែកទៀតទេ»។
យោងតាមគេហទំព័រព័ត៌មានហិរញ្ញវត្ថុ Yicai China កាលពីថ្មីៗនេះ បានចេញផ្សាយថា ប្រទេសចិនឥឡូវនេះបានបន្ថែមវីរុសនីប៉ាហ៍ទៅក្នុងបញ្ជីជំងឺឆ្លងដែលត្រូវតាមដាន បន្ទាប់ពីការផ្ទុះឡើងថ្មីមួយក្នុងប្រទេសឥណ្ឌា។ កាសែតចក្រភពអង់គ្លេស The Independent ឯណោះវិញក៏បានរាយការណ៍ថា ប្រទេសឥណ្ឌាបានជួបប្រទះនឹងការផ្ទុះឡើងនៃការឆ្លងវិរុសនេះ នៅក្នុងរដ្ឋកេរ៉ាឡា (Kerala) នៅពាក់កណ្តាលឆ្នាំ ២០២៥ ដោយមានករណីឆ្លងចំនួន ៤ ករណីដែលបានបញ្ជាក់។
អាជ្ញាធរសុខាភិបាល និងអ្នកជំនាញខាងវីរុសនៅក្នុងប្រទេសចិនជឿថា លក្ខណៈនៃវីរុសនីប៉ាហ៍ធ្វើឱ្យផ្ទុះការឆ្លងទូលំទូលាយមិនទំនងជាកើតឡើងនោះទេ។ ទោះជាអត្រាមរណភាពក្នុងករណីឆ្លងវីរុសនេះអាចខ្ពស់ដល់ ៧៥% យ៉ាងណាក៏ដោយ ក៏ការចម្លងគឺស្ថិតនៅកម្រិតទាបជាងជំងឺផ្លូវដង្ហើមដទៃទៀត។
នៅក្នុងសេចក្តីប្រកាសថ្មីៗនេះ មជ្ឈមណ្ឌលគ្រប់គ្រង និងបង្ការជំងឺរបស់ចិន (CDC) បានជំរុញឱ្យមានការប្រុងប្រយ័ត្នកាន់តែខ្លាំងឡើងប្រឆាំងនឹងជំងឺឆ្លងក្នុងរដូវកាលមានការធ្វើដំណើរខ្ពស់ រួមទាំងការព្រមានអំពីហានិភ័យពីជំងឺគ្រុនចាញ់ ជំងឺគ្រុនឈាម ជំងឺគ្រុនឈីក (Chikungunya) និងជំងឺគ្រុនក្តៅឡាសា (Lassa)។ ប៉ុន្តែទោះយ៉ាងណាក៏ដោយ វីរុសនីប៉ាហ៍មិនត្រូវបានលើកឡើងនៅក្នុងសេចក្តីប្រកាសនោះទេ។
វីរុសនីប៉ាហ៍ ត្រូវបានរកឃើញលើកដំបូងនៅអាស៊ីអាគ្នេយ៍ បន្ទាប់ពីការផ្ទុះឡើងនៅក្នុងប្រទេសម៉ាឡេស៊ី និងសិង្ហបុរីរវាងឆ្នាំ ១៩៩៨ និង ១៩៩៩ ដែលភាគច្រើនជាប់ទាក់ទងនឹងកម្មករកសិដ្ឋានចិញ្ចឹមជ្រូក និងអ្នកប៉ះពាល់ជាមួយសត្វពាហនៈ។ បើយោងទៅតាមមជ្ឈមណ្ឌលការពារសុខភាពហុងកុងបង្ហាញថា វីរុសនីប៉ាហ៍អាចឆ្លងដល់សត្វជាច្រើនប្រភេទដូចជា ជ្រូក សេះ ពពែ ចៀម ឆ្មា និងឆ្កែ។
ចាប់តាំងពីដើមសតវត្សរ៍ទី ២១ មក ការផ្ទុះឡើងនៃវីរុសនីប៉ាហ៍ ចំពោះមនុស្សត្រូវបានកត់ត្រានៅក្នុងប្រទេសឥណ្ឌា និងបង់ក្លាដែស ដែលជំងឺនេះជាធម្មតាកើតឡើងរវាងខែធ្នូ និងខែមេសា។ ករណីភាគច្រើនក្នុងប្រទេសឥណ្ឌា និងបង់ក្លាដែស មានទំនាក់ទំនងជាមួយនឹងការទទួលទានទឹកត្នោតស្រស់ៗដែលដែលមានទឹកនោម ឬទឹកមាត់សត្វប្រចៀវឆ្លងមេរោគ ដ្បិតប្រចៀវគឺជាប្រភពនៃវីរុសនីប៉ាហ៍នេះឯង។ បច្ចុប្បន្ន មិនទាន់មានការព្យាបាលជាក់លាក់ ឬវ៉ាក់សាំងសម្រាប់បង្ការវីរុសនេះនៅឡើយទេ។ ដើម្បីឆ្លើយតបទៅនឹងការផ្ទុះឡើងនៅក្នុងប្រទេសឥណ្ឌា ប្រទេសអាស៊ីជាច្រើនកំពុងតែរឹតបន្តឹងការគ្រប់គ្រងសុខភាពសាធារណៈរៀងខ្លួន៕ ប្រភព ៖ Znews
ចែករំលែកព័តមាននេះ