ខេត្តកំពង់ស្ពឺ៖ ស្រូវរដូវប្រាំងឆ្នាំ២០២៦ក្នុងស្រុកចំនួន០២ គឺស្រុកគងពិសី និងស្រុកបរសេដ្ឋ នៃក្នុងខេត្តកំពង់ស្ពឺ ប្រជាកសិករកំពុងតែប្រមូលផលបណ្ដើរៗហើយ ខណៈដែលតម្លៃស្រូវក្នុងរដូវប្រាំងនេះមានការកើនឡើងជាងរដូវវស្សា។ ជាក់ស្ដែង នៅថ្ងៃទី០២ ខែមេសា…
ខេត្តកំពង់ស្ពឺ៖ ស្រូវរដូវប្រាំងឆ្នាំ២០២៦ក្នុងស្រុកចំនួន០២ គឺស្រុកគងពិសី និងស្រុកបរសេដ្ឋ នៃក្នុងខេត្តកំពង់ស្ពឺ ប្រជាកសិករកំពុងតែប្រមូលផលបណ្ដើរៗហើយ ខណៈដែលតម្លៃស្រូវក្នុងរដូវប្រាំងនេះមានការកើនឡើងជាងរដូវវស្សា។
ជាក់ស្ដែង នៅថ្ងៃទី០២ ខែមេសា ឆ្នាំ២០២៦ មន្ត្រីជំនាញការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ ដោយមានកិច្ចសហការជាមួយអាជ្ញាធរមូលដ្ឋាន មន្ត្រីកសិកម្មឃុំ និងតំណាងការិយាល័យកសិកម្ម ធនធានធម្មជាតិ និងបរិស្ថានស្រុក បានចុះអង្កេតទិន្នផលស្រូវប្រាំង ស្ថិតក្នុងភូមិសាស្ត្រឃុំនិទាន ស្រុកបសេដ្ឋ និងឃុំជង្រុក ស្រុកគងពិសី នៃខេត្តកំពង់ស្ពឺ។
មន្ត្រីជំនាញដែលចុះទៅដល់ទីតាំងស្រែស្រូវរបស់ប្រជាកសិករពិនិត្យជាក់ស្ដែងជាលទ្ធផលនៃការអង្កេតស្រូវរបស់កសិករដែលនៅក្នុងឃុំនិទាន ស្រុកបសេដ្ឋ ទទួលបានទិន្នផលល្អគឺចំនួន៥,៨តោនក្នុង០១ហិកតា ហើយកសិករនៅក្នុងឃុំជង្រុក ស្រុកគងពិសី ទទួលបានទិន្នផលចំនួន៤តោនក្នុង០១ហិកតាដែលជាទិន្នផលមួយបង្គួរសម្រាប់ស្រូវរដូវប្រាំងនេះ។
លោក យឹម ណន ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺបានឲ្យដឹងថាចំពោះរដូវវស្សាឆ្នាំ២០២៦នេះ ប្រជាកសិករនៅទូទាំងខេត្តកំពង់ស្ពឺធ្វើបរិមាណតិចតួចតែប៉ុណ្ណោះ។ដោយសារតែឯកឧត្តមបណ្ឌិតអភិបាលខេត្តកំពង់ស្ពឺបានណែនាំបង្វែរពីធ្វើស្រែប្រាំង ឲ្យកសិករងាកទៅដាំបន្លែរដូវប្រាំងវិញ ក៏ព្រោះតែស្រូវរដូវប្រាំងអស់ទឹកច្រើន ហើយខេត្តរបស់យើងខ្សត់ទឹក។
គួររំលឹកផងដែរថាកាលពីរដូវវស្សាប្រជាកសិករនៅក្នុងខេត្តកំពង់ស្ពឺទាំងមូលបានធ្វើស្រូវរដូវវស្សាលក់ស្រូវស្រាល នៅតាមសហគមន៍, ទីតាំងប្រមូលផ្តុំ និងឈ្មួញកណ្តាលបានតម្លៃ ៦១០រៀក្នុង០១គីឡូក្រាម។ បើដឹកយកទៅលក់ដល់រោងម៉ាស៊ីនបានតម្លៃប្រមាណ ៦៨០រៀល ទៅ៧៣០រៀលក្នុង០១គីឡូក្រាម។
ចំណែកស្រូវកណ្តាលលក់នៅតាមសហគមន៍, ទីតាំងប្រមូលផ្តុំ និងឈ្មួញកណ្តាលបានតម្លៃជាមធ្យម ៨៩៧រៀលក្នុង០១គីឡូក្រាម ប្រសិនបើកសិករដឹកដល់រោងម៉ាស៊ីនបានតម្លៃ ១០០០រៀល ទៅដល់១០៥០រៀលក្នុង០១គីឡូក្រាមផងដែរ៕
ចែករំលែកព័តមាននេះ