រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) និងសមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា (FASMEC) នៅថ្ងៃទី ៣…
រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) និងសមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា (FASMEC) នៅថ្ងៃទី ៣ ខែមេសា ឆ្នាំ ២០២៦ នេះ បានរៀបចំវេទិកាសារព័ត៌មានលើប្រធានបទ ៖ «រួមគ្នាផលិត រួមគ្នាប្រើផលិតផលជាតិ» ដើម្បីពង្រឹង និងពង្រីកផលិតផលក្នុងស្រុកទាំងបរិមាណ និងគុណភាព សុវត្ថិភាព ធ្វើយ៉ាងណាបំពេញតម្រូវការប្រើប្រាស់អំឡុងពេលពហិការមិនប្រើប្រាស់ផលិតផលប្រទេសថៃ ។ វេទិកានេះមានអ្នកសារព័ត៌មានចូលរួមមកពី ៦០ ស្ថាប័ន ។
វេទិកានេះក៏មានតាំងបង្ហាញផលិតផលក្នុងស្រុកសំខាន់ៗ ជាច្រើនផងដែរដែលគ្រោងនឹងដាក់តាំងបង្ហាញនៅក្នុងពិព័រណ៍ផលិតផលខ្មែរ ឆ្នាំ ២០២៦ លើកទី ៣ ដែលគ្រោងនឹងធ្វើឡើងនៅមជ្ឈមណ្ឌលសាលសន្និបាត និងពិព័រណ៍កោះពេជ្រ រយៈពេល ៤ ថ្ងៃ ចាប់ពីថ្ងៃទី ៩ ដល់ថ្ងៃទី ១២ ខែមេសា ឆ្នាំ ២០២៦ ខាងមុខនេះ ។
ឧកញ៉ា តែ តាំងប៉ ប្រធានក្រុមប្រឹក្សាភិបាល សមាគមមូលនិធិសម្ដេចតេជោ និង FASMEC បានឱ្យដឹងថា ដោយសារមានសំណូមពរពីម្ចាស់សហគ្រាស សិប្បកម្ម ដែលបានចូលរួមពិព័រណ៍កាលពីលើកទី ១ និងលើកទី ២ ទទួលបានជោគជ័យ ដូច្នេះពួកគាត់ចង់ឱ្យរៀបចំការពិពរ័ណ៍ដូចគ្នានេះជាលើកទី ៣ និងជាបន្តបន្ទាប់ទៀត ។ លោក ឧកញ៉ា បានបន្តថា ការតាំងពិព័រណ៍ពីមួយលើកទៅមួយលើកមានក្រុមហ៊ុនចូលរួមកើនឡើងជាលំដាប់ ហើយសម្រាប់លើកទី ៣ នឹងមានស្តង់បង្ហាញផលិតផលចូលរួមចំនួនជាង ៣០០ ស្តង់ ។ អ្វីដែលប្លែកជាងមុន គឺដោយសារលើកនេះមានផលិតផលថ្មីៗ ប្លែកៗជាច្រើនដែលមានទាំងគុណភាព សោភ័ណភាព និងបរិមាណដែលអាចទទួលយកបាន ព្រមទាំងបច្ចេកវិទ្យាផលិតទំនើបជាងមុន ៕
ចែករំលែកព័តមាននេះ