អគារអតីតសណ្ឋាគារអង្គរមានជ័យបាត់រូបរាងហើយ
- ភ្នំពេញ
រាជធានីភ្នំពេញ ៖ គិតត្រឹមព្រឹកថ្ងៃទី០១ ខែវិច្ឆិកា ឆ្នាំ២០២៥ កន្លងមកនេះ សំណង់អគារអតីតសណ្ឋាគារ អង្គរមានជ័យ (មានឈ្មោះដើមនគរជ័យ) ដែលមានអាយុ៧៥ឆ្នាំ…
រាជធានីភ្នំពេញ ៖ គិតត្រឹមព្រឹកថ្ងៃទី០១ ខែវិច្ឆិកា ឆ្នាំ២០២៥ កន្លងមកនេះ សំណង់អគារអតីតសណ្ឋាគារ អង្គរមានជ័យ (មានឈ្មោះដើមនគរជ័យ) ដែលមានអាយុ៧៥ឆ្នាំ ត្រូវបានក្រុមហ៊ុនម៉ៅការ ពិស្ណុការអន្តរជាតិ បានធ្វើការវាយរំលំអតីតសំណង់ដែលមានវ័យចំណាស់នេបានដោយជោគជ័យ ដោយប្រើរយៈពេល១២ថ្ងៃ មុនផែនការដែលបានគ្រោងទុក ហើយក្រុមហ៊ុននឹងធ្វើការសម្អាត យកកម្ទេចអគារសំណង់នេះចេញឱ្យស្អាត និងឈានដល់ការបិទការដ្ឋានទាំងស្រុង១០០% នៅថ្ងៃទី០៧ ខែវិច្ឆិកា ឆ្នាំ២០២៥ ។ សូមរំលឹកថា៖ ចាប់ផ្ដើមវាយកម្ទេចសំណង់អតីតសណ្ឋាគារអង្គរមានជ័យដែលមានអាយុ៧៥ឆ្នាំ
កាលពីវេលាម៉ោង០៩យប់ ថ្ងៃទី៣១ ខែតុលា ឆ្នាំ២០២៥ ក្រោមវត្តមានដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រួមជាមួយលោក ថេង សុថុល អភិបាលខណ្ឌ៧មករា បានដឹកនាំក្រុមការងារចុះត្រួតពិនិត្យមើលវឌ្ឍនភាព ពីដំណើរការដ្ឋានគ្រឿងចក្រវាយរំលំអគារអតីតសណ្ឋាគារអង្គរមានជ័យ ដើម្បីធានាបានសុខសុវត្ថិភាព បញ្ចៀសចរាចរណ៍ដល់បងប្អូនអ្នកធ្វើដំណើរនៅពេលរាត្រី ដែលមានទីតាំងស្ថិតនៅលើមហាវិថីព្រះមុនីវង្ស កែងមហាវិថីកម្ពុជាក្រោម ក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ។
បានកត់សម្គាល់ថា កាលពីព្រឹកថ្ងៃទី១៣ ខែតុលា ឆ្នាំ២០២៥ មុននេះ មន្ត្រីជំនាញបានចុះសិក្សាចប់រួចរាល់ហើយ លើអគារអង្គរជ័យ ដែលមានអាយុកាលជាង៧០ឆ្នាំ និងត្រៀមវាយកម្ទេចចោលដើម្បីបញ្ចៀសការបាក់រលំប៉ះពាល់ដល់ពលរដ្ឋ ។ អគារអង្គរជ័យមានកម្ពស់៦ជាន់ ស្ថិតនៅកាច់ជ្រុងមហាវិថីកម្ពុជាក្រោម និងមុនីវង្ស ក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ដែលកំពុងមានសភាពទ្រុឌទ្រោម និងពុកផុយ ដែលអាចនឹងបាក់ស្រុតមកដោយឯងៗ ខណៈក្រសួងរៀបចំដែនដី នគរូបនីយកម្ម និងសំណង់ និងអាជ្ញាធរពាក់ព័ន្ធ បានចាប់ផ្តើមដាក់គ្រឿងចក្រចូលដើម្បីធើ្វការវាយកម្ទេចចោល ។
សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប៥៩០ម៉ែត្រការ៉េ មានកម្ពស់៦ជាន់ ស្មើនឹង១០៧បន្ទប់ ត្រូវបានសាងសង់ឡើងតាំងពីអំឡុងឆ្នាំ១៩៥០ គិតមកដល់បច្ចុប្បន្ន សំណង់អគារនេះមានអាយុ៧០ឆ្នាំជាងទៅហើយ ។ យោងតាមលិខិតជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ទៅអភិបាលខណ្ឌ៧មករា កាលពីថ្ងៃទី១៧ ខែកញ្ញា ឆ្នាំ២០២៥ ក្រសួងបានស្នើឲ្យអភិបាលខណ្ឌ៧មករា សម្របសម្រួលចាត់ចែងឲ្យគ្រួសារចំនួន៤ ដែលមិនទាន់ឯកភាពទទួលយកដំណោះស្រាយ ឲ្យចាកចេញពីអគារអង្គរមានជ័យ ត្រឹមសប្ដាហ៍ទី៤ នៃខែកញ្ញា ឆ្នាំ២០២៥ ។
ដើម្បីផ្ដល់លទ្ធភាពដល់ក្រសួងចាត់ចែកវាយរំលំអគារនេះ ខណៈក្រសួងក៏បានឯកភាពជាគោលការណ៍ដំឡើងតម្លៃដល់ ២ ៥០០ដុល្លារអាមេរិក ក្នុង១ម៉ែត្រការ៉េ ដែលធ្វើឱ្យតម្លៃគោល (គិតពីជាន់ផ្ទាល់ដីដល់ជាន់ទី៦) កើនដល់ ៧ ៦៩០ដុល្លារអាមេរិក ក្នុង១ម៉ែត្រការ៉េ ។ គឺលើសពីតម្លៃទីផ្សារប្រមាណ២២% ដោយយោងតាមតម្លៃដែលក្រុមហ៊ុនចំនួន៣ បានធ្វើការវាយតម្លៃពីឆ្នាំ២០២៣ដល់២០២៥ ហើយគ្រួសារទាំង៤ អាចទាក់ទងមកក្រុមការងារក្រសួងរៀបចំដែនដី នគរូបនីយកម្ម និងសំណង់ ដើម្បីមកទទួលយកថវិកានៅខែកញ្ញា ឆ្នាំ២០២៥ ។
បើតាមមន្ត្រីជំនាញបានបញ្ជាក់ថា អាគារនេះ នឹងត្រូវវាយកម្ទេចនៅថ្ងៃទៅ១៨ ខែតុលា ឆ្នាំ២០២៥ ដោយមុននឹងវាយកម្ទេច ត្រូវធ្វើការសម្អាតកម្ទេចសំរាមតាមកាំជណ្ដើរនៅតាមបន្ទប់នីមួយៗរួចសិន រួចនឹងធ្វើពិធីក្រុងពាលី តាមបែបសាសនា ៕
ចែករំលែកព័តមាននេះ