រាជធានីភ្នំពេញ ៖ បន្ទាប់ពីមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ និងគណៈអភិបាលខណ្ឌ៧មករា ធ្វើពិធី«ក្រុងពាលី»សុំសេចក្តីសុខពីម្ចាស់ទឹកម្ចាស់ដីជាផ្លូវការ រួចមក កាលពីព្រឹកថ្ងៃទី២១ ខែតុលា…
រាជធានីភ្នំពេញ ៖ បន្ទាប់ពីមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ និងគណៈអភិបាលខណ្ឌ៧មករា ធ្វើពិធី«ក្រុងពាលី»សុំសេចក្តីសុខពីម្ចាស់ទឹកម្ចាស់ដីជាផ្លូវការ រួចមក កាលពីព្រឹកថ្ងៃទី២១ ខែតុលា ឆ្នាំ២០២៥ លោកអភិបាលខណ្ឌ៧មករាបានដឹកនាំមន្ត្រីជំនាញទៅពិនិត្យការដ្ឋានអគារអតីត «សណ្ឋាគារអង្គរមានជ័យ» ដែលអ្នកបច្ចេកទេសកំពុងវាយកម្ទេចជាបណ្តើរៗ ។
ប្រជាពលរដ្ឋរាប់សិបគ្រួសារ ព្រមទទួលយកប្រាក់ជាគោលនយោបាយ ដើម្បីចាកចេញ ប៉ុន្តែនៅសល់២គ្រួសារទៀត នៅមិនទាន់ដោះស្រាយបញ្ចប់នៅឡើយទេ ។ នៅព្រឹកថ្ងៃអង្គារទី២១ ខែតុលា ឆ្នាំ២០២៥ លោក ថេង សុថុល អភិបាលខណ្ឌ៧មករា បានដឹកនាំក្រុមការងារ ជាមួយមន្ត្រីជំនាញក្រសួងរៀបចំដែនដី នគរូបនីយកម្ម និងសំណង់ ទៅត្រួតពិនិត្យមើលទីតាំងការដ្ឋាន ដែលកំពុងដំណើរការប្រើប្រាស់គ្រឿងចក្រវាយរំលំ ។ អគារនេះ មានទីតាំងស្ថិតនៅចំណុចកែងរវាងមហាវិថីព្រះមុនីវង្សនិងមហាវិថីកម្ពុជាក្រោម ក្នុងភូមិ១សង្កាត់មនោរម្យ ខណ្ឌ៧មករា ។
បើតាមមន្ត្រីជំនាញអះអាងថា ដំបូងយើងត្រូវឲ្យកម្មករវាយជញ្ជាំងថ្មតាមជាន់នីមួយៗ ដោយមានដាក់សំណាញ់បាំងការពារមិនឲ្យកម្ទេចថ្មធ្លាក់ប៉ះពាល់ដល់ផ្ទះជិតខាង ពិសេសអ្នកធ្វើដំណើរឆ្លងកាត់ទីនោះ រួចហើយចាប់ផ្តើមប្រើគ្រឿងចក្រកាយនិងវាយប្លង់សេនិងសសរពីលើដល់ក្រោម ។
សូមជម្រាបថា កាលពីព្រឹកថ្ងៃទី១៧ ខែតុលា ឆ្នាំ២០២៥កន្លងទៅ ឯកឧត្តម យស់ ឆោម ណារ៉ាឌី រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ ដោយមានការចូលរួមពីលោក ឌីរ័ត្ន ខេមរុណ អភិបាលរងខណ្ឌ៧មករា បានដឹកនាំក្រុមការងារ ដើម្បីរៀបចំពិធីក្រុងពាលីតាមបែបសាសនា សុំសេចក្ដីសុខពីម្ចាស់ទឹកដី ដែលនៅថែរក្សាអគារអតីតសណ្ឋាគារ«អង្គរមានជ័យ» ដើម្បីដំណើរការគ្រឿងចក្រវាយរំលំ ។
តាមលោក សុខ ស៊ីធារ៉ា អគ្គនាយកក្រុមហ៊ុនបានឲ្យដឹងថា ដំណើរការវាយរំលំអគារខាងលើនេះ អាចប្រើរយៈពេល១ខែកន្លះ ដែលគិតចាប់ពីថ្ងៃទី១៣ ខែតុលា ឆ្នាំ២០២៥ ។ បន្ទាប់ពីមានពិធីក្រុងពាលីរួចរាល់ ក្រុមការងាររបស់ក្រុមហ៊ុនទទួលម៉ៅការ«សាជីវកម្មពិស្ណុការ អន្តរជាតិ» នឹងចាប់ផ្តើមភ្លាមៗ ដោយការវាយជញ្ជាំងតាមជាន់នីមួយៗ រួចទើបវាយប្លង់សេ រហូតទាល់តែអស់គ្រប់ជាន់តែម្តង ។
ការវាយកម្ទេចនេះ ធ្វើយ៉ាងណាឲ្យរួចជាស្ថាពរតែក្នុងរយៈពេល៤៥ថ្ងៃប៉ុណ្ណោះ ។ឯកឧត្តមរដ្ឋលេខាធិការ យស់ ឆោមណារ៉ាឌី បានបញ្ជាក់បន្ថែមថា មកទល់នឹងពេលនេះ ៦៥ គ្រួសារបានរើសសម្ភារៈចេញពីអគានោះរួច រាល់ផងដែរ ។ ក្រសួងរៀបចំដែនដី នគរូបនីយកម្ម និងសំណង់ នឹងបន្តដោះស្រាយជូនពួកគាត់ នៅទីស្តីការក្រសួង ដែលបច្ចុប្បន្នពួកគាត់នៅ ២គ្រួសារ កំពុងគិតពិចារណាដែលនឹងធ្វើការជាមួយក្រសួងបន្តទៀត ។
គួរបញ្ជាក់ថា អតីតសណ្ឋាគារ«អង្គរមានជ័យ» ត្រូវបានសាងសង់ឡើងកាលពីអំឡុងឆ្នាំ១៩៥០ ដែលបើគិតមកដល់បច្ចុប្បន្នសំណង់អគារនេះមានអាយុកាល៧៥ឆ្នាំមកហើយ ស្ថិតនៅលើផ្លូវកែងរវាងមហាវិថីព្រះមុនីវង្ស និងមហាវិថីកម្ពុជាក្រោម ក្នុងសង្កាត់មនោរម្យ ខណ្ឌ៧មករា ៕
ចែករំលែកព័តមាននេះ