ខេត្តព្រះសីហនុ ៖ ក្នុងរយៈពេល ៣ ឆ្នាំចុងក្រោយ វិទ្យាស្ថានពហុបច្ចេកទេសមិត្តភាពកម្ពុជា-ចិន ខេត្តព្រះសីហនុ បានបណ្តុះបណ្តាលយុវជនសរុបជាង ៥ពាន់នាក់ឱ្យមានជំនាញ ដែលឆ្លើយតបនឹងតម្រូវការទីផ្សារការងារ ។
លោក ប៊ូ សំអាត នាយកវិទ្យាស្ថានពហុបច្ចេកទេសមិត្តភាពកម្ពុជា-ចិន ខេត្តព្រះសីហនុ បានឱ្យដឹងថា ក្នុងរយៈពេល ៣ ឆ្នាំកន្លងមក វិទ្យាស្ថានបានបណ្តុះបណ្តាលសិស្ស-និស្សិតកម្រិត C2, C3, សញ្ញាបត្រជាន់ខ្ពស់បច្ចេកទេស និងបរិញ្ញាបត្របច្ចេកវិទ្យា សរុប ១,៤៤១នាក់ ក្នុងនោះស្ត្រី ៥៨០នាក់ ខណៈសិស្សកម្រិត C1 តាមរយៈកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈ សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១លាន ៥សែននាក់ ( TVET 1.5M) មានចំនួន ៣,៦២៦នាក់ ក្នុងនោះស្ត្រី ១,៣២២នាក់ ។
លោកនាយកមានប្រសាសន៍ថា៖ «គោលដៅរបស់វិទ្យាស្ថាន គឺមិនត្រឹមតែផ្តល់ចំណេះដឹងទ្រឹស្តីដល់សិស្ស-និស្សិតប៉ុណ្ណោះទេ ប៉ុន្តែផ្តោតសំខាន់លើការអនុវត្តជាក់ស្តែង ដើម្បីឱ្យពួកគេមានជំនាញច្បាស់លាស់ អាចយកទៅប្រើប្រាស់ក្នុងការងារ និងឆ្លើយតបនឹងតម្រូវការរបស់សហគ្រាស» ។
លោកបានបន្តថា តាមរយៈកម្មវិធី TVET 1.5M វិទ្យាស្ថានបានចូលរួមផ្តល់ឱកាសដល់យុវជនមកពីគ្រួសារក្រីក្រ និងគ្រួសារប្រឈមហានិភ័យ ឱ្យទទួលបានការបណ្តុះបណ្តាលជំនាញក្នុងរយៈពេលខ្លី ព្រមទាំងទទួលបានប្រាក់ឧបត្ថម្ភ និងការគាំទ្រដោយផ្ទាល់ ដែលជួយឱ្យយុវជនមានលទ្ធភាពរៀនជំនាញ និងឈានទៅរកការងារធ្វើ ។
ជាមួយគ្នានេះ លោក ប៊ូ សំអាត បានបញ្ជាក់ថា ចំណុចសំខាន់មួយទៀតរបស់វិទ្យាស្ថាន គឺការភ្ជាប់ការបណ្តុះបណ្តាលទៅនឹងតម្រូវការការងារជាក់ស្តែង។ លោកបញ្ជាក់ថា អតីតសិស្ស-និស្សិតដែលបានបញ្ចប់ការសិក្សា មានអត្រាទទួលបានការងារធ្វើ ជាង ៩០ភាគរយ នៅតាមរោងចក្រ ក្រុមហ៊ុន និងសហគ្រាសនានា ក្នុងតំបន់សេដ្ឋកិច្ចពិសេស និងតំបន់ជុំវិញខេត្តព្រះសីហនុ ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានលើកឡើងថា ការបណ្តុះបណ្តាលជំនាញបច្ចេកទេស និងវិជ្ជាជីវៈ គឺជាយន្តការសំខាន់មួយក្នុងការរៀបចំកម្លាំងពលកម្មកម្ពុជាឱ្យមានជំនាញសមស្របទៅនឹងតម្រូវការទីផ្សារការងារ ជាពិសេសនៅតំបន់ដែលកំពុងមានការរីកចម្រើនផ្នែកឧស្សាហកម្ម និងសេដ្ឋកិច្ច ។
លោកបានមានប្រសាសន៍ថា៖ «ការដែលយុវជនទទួលបានជំនាញច្បាស់លាស់ និងអាចយកជំនាញនោះទៅប្រើប្រាស់រកការងារធ្វើ គឺជាចំណុចសំខាន់នៃការបណ្តុះបណ្តាល TVET។ ដូច្នេះ ក្រសួងបន្តជំរុញឱ្យគ្រឹះស្ថាន TVET ពង្រឹងគុណភាពបណ្តុះបណ្តាល និងឱ្យកាន់តែស៊ីគ្នាជាមួយតម្រូវការរបស់ទីផ្សារការងារ» ។
លោក ស៊ុន មេសា បានបន្ថែមថា ការចូលរួមរបស់គ្រឹះស្ថាន TVET នៅតាមរាជធានី-ខេត្ត មិនត្រឹមតែជួយបង្កើនចំនួនអ្នកមានជំនាញប៉ុណ្ណោះទេ ប៉ុន្តែថែមទាំងជួយឱ្យយុវជនអាចស្វែងរកការងារធ្វើនៅក្នុងស្រុក មានចំណូល និងចូលរួមក្នុងការអភិវឌ្ឍសេដ្ឋកិច្ចជាតិ ៕ អត្ថបទសហការ
ចែករំលែកព័តមាននេះ