ទីក្រុងព្យុងយ៉ាង៖ ថ្ងៃនេះ ប្អូនស្រីគីមជុងអ៊ុនចេញសារព្រមានធ្ងន់ៗទៅអាមេរិក និងកូរ៉េខាងត្បូងដែលកំពុងធ្វើសមយុទ្ធយោធាកក្រើកព្រះធរណីដោយប្រើប្រាស់យុទ្ធោបករណ៍មានតាំងពីនាវា យន្តហោះ និងកងទ័ពសរុបចូលគ្នាជាង១,៨ម៉ឺននាក់។ លោកស្រីគីមយូជុងថ្លែងថាការធ្វើសមយុទ្ធយោធានេះអាចនឹងនាំឱ្យមានផលវិបាកធ្ងន់ធ្ងរដែលយើងនឹកស្មានមិនដល់។ សេចក្ដីព្រមាននេះធ្វើឡើងមួយថ្ងៃបន្ទាប់ពីសមយុទ្ធយោធាដែលមានឈ្មោះថា «ខែលសេរីភាព- Freedom Shield» ចាប់ផ្ដើមកាលពីម្សិលមិញ ហើយនឹងបន្តរហូតដល់ថ្ងៃទី១៩ ខែមីនាទើបបញ្ចប់ទៅវិញ។
លោកស្រីគីមយូជុងយល់ថាការធ្វើសមយុទ្ធយោធានេះធ្វើឱ្យប៉ះពាល់ស្ថិរភាពនៅក្នុងតំបន់ ខណៈដែលសន្តិសុខសាកលលោកកំពុងតែចុះដុនដាបស្រាប់ផង ហើយជម្លោះប្រដាប់អាវុធក៏កើតមានកាន់តែច្រើន។ លោកស្រីអះអាងថាកូរ៉េខាងជើងនឹងបន្តពង្រឹងសមត្ថភាពរបស់ខ្លួនដើម្បីទប់ទល់នឹងការគំរាមកំហែងពីខាងក្រៅ និងដើម្បីបង្ហាញថាខ្លួនត្រៀមខ្លួនរួចជាស្រេចសម្រាប់ទប់ទល់ជាមួយបច្ចាមិត្ត។
ការរិះគន់របស់លោកស្រីគីមយូជុងដូចខាងលើនេះមិនមែនឥតហេតុផលនោះឡើយ។ ប៉ុន្តែវាស្របទៅនឹងនយោបាយការបរទេសរបស់កូរ៉េខាងជើងដែលចាប់ផ្ដើមនិយាយពេញៗមាត់អំពី «សង្គ្រាមត្រជាក់» សម័យថ្មី។ មិនតែប៉ុណ្ណោះ របបក្រុងព្យុងយ៉ាងចូលពាក់ព័ន្ធយ៉ាងជ្រៅនៅក្នុងសង្គ្រាមអ៊ុយក្រែន ពោលគឺមិនត្រឹមតែជួយរុស្ស៊ីផ្នែកអាវុធយុទ្ធភ័ណ្ឌ និងកងទ័ពប៉ុណ្ណោះទេ ប្រទេសទាំង២សច្ចាថាស៊ូខាំស្មៅនៅជាមួយគ្នាលុះគ្រាអវសាន។ គេអាចនិយាយបានដូច្នេះតាមរយៈការចុះហត្ថលេខាលើកតិកាសញ្ញាការពារគ្នាទៅវិញទៅមក។ ចំណែកទំនាក់ទំនងកូរ៉េខាងជើង និងចិនក៏ត្រូវបានពង្រឹងបន្ថែមផងដែរ។
ប្អូនស្រីលោកគីមជុងអ៊ុនកត់សម្គាល់ថាសភាពការណ៍កំពុងតែតានតឹងស្រាប់ទៅហើយ ហើយព្រឹត្តិការណ៍សាកលលោកចេះតែកើតឡើងផ្ទួនៗគ្នា។ ឥឡូវនេះ កម្លាំងអមិត្តកំពុងតែធ្វើសមយុទ្ធយោធាថែមទៀត។ ដូច្នេះ លោកស្រីយល់ថាគេមិនអាចបែងចែកដាច់ពីគ្នាថាតើសកម្មភាពមួយជាយុទ្ធវិធីការពារខ្លួន ឬជាការវាយប្រហារ ហើយក៏មិនអាចបែងចែកដឹងថាតើសកម្មភាពមួយជាការធ្វើសមយុទ្ធយោធាធម្មតា ឬក៏ជាការត្រៀមវាយប្រហារមកលើប្រទេសមួយទៀតនោះដែរ។
ក្រុមអ្នកវិភាគយល់ថាការធ្វើសមយុទ្ធយោធារបស់អាមេរិក និងកូរ៉េខាងត្បូងលើកនេះកើតឡើងនៅក្នុងស្ថានភាពដ៏រសើបសម្រាប់កូរ៉េខាងជើង។ ប្រទេសនេះប្រាកដជាតាមដាននូវសង្គ្រាមរវាងអ៊ីរ៉ង់ទល់នឹងអាមេរិក និងអ៊ីស្រាអែលជាមិនខាន។ ដូចនេះចង់ ឬមិនចង់ របបក្រុងព្យុងយ៉ាងយល់ថាខ្លួនមិនអាចពន្លែងដៃពីអាវុធនុយក្លេអ៊ែរបានឡើយ ត្រូវតែខិតខំពង្រឹងបន្ថែមទៀត បើមិនដូច្នេះទេ ជោគវាសនាមិនខុសពីអ៊ីរ៉ង់នោះឡើយ។
ការលើកឡើងរបស់លោកស្រីគីមយូជុងនៅត្រង់ចំណុចថា «មានតែកម្លាំងយោធាទេជាប្រភពគួរឱ្យជឿទុកចិត្តបំផុតសម្រាប់ទប់ទល់ជាមួយបច្ចាមិត្ត» វាឆ្លុះបញ្ចាំងថាកូរ៉េខាងជើងមិនអាចបណ្ដោយខ្លួនឱ្យមានវាសនាដូចអ៊ីរ៉ង់ដែលកំពុងតែត្រូវអាមេរិក និងអ៊ីស្រាអែលព្រួតគ្នាវាយប្រហារនោះទេ។ កូរ៉េខាងជើងចង់ផ្ញើសារទៅពិភពលោកថាខ្លួនត្រូវតែមានអាវុធនុយក្លេអ៊ែរជាចាំបាច់។ បើមិនអីចឹងទេនឹងជួបនឹងវាសនាអាក្រក់ជាមិនខាន។ ខាងលើនេះជាការអះអាងរបស់លោកលីម អ៊ូលឈូល (Lim Eul-Chul) ជាគ្រូបង្រៀននៅសាកលវិទ្យាល័យគ្យុងណាម (Kyungnam University) និងជាអ្នកឯកទេសខាងបញ្ហាកូរ៉េខាងជើង៕ ប្រភព៖ រ៉យទ័រ (Reuters), ដឹ អ៊ីនឌីផឹនដឹន (The Independent) និងប្រភពដទៃទៀត
ចែករំលែកព័តមាននេះ