ទីក្រុងបាងកក៖ ក្រោយព្រឹត្តិការណ៍វាយប្រហារពីសំណាក់យោធាអ៊ីរ៉ង់ទៅលើកប៉ាល់ដឹកប្រេងរបស់ប្រទេសថៃកាលពីថ្ងៃទី១១ ខែមីនានៅច្រកសមុទ្រហ័រម៉ូស គេបានរកឃើញសាកសពមនុស្សមួយចំនួននៅក្នុងកប៉ាល់នោះ។ នេះបើយោងតាមការបញ្ជាក់របស់ក្រុមហ៊ុនម្ចាស់កប៉ាល់។ បន្ទាប់ពីទទួលរងការវាយប្រហារពីយោធាអាមេរិក និងអ៊ីស្រាអែលកាលពីចុងខែកុម្ភៈ ប្រទេសអ៊ីរ៉ង់ក៏ឆ្លើយតបវិញដោយបិទច្រកហ័រម៉ូសព្រោះអ៊ីរ៉ង់ដឹងថាទីនេះជាច្រកដឹកជញ្ជូនប្រេង២៥%នៃពិភពលោក។
កប៉ាល់ដោតទង់ជាតិថៃឈ្មោះមយូរា ណារី បានចាកចេញដំណើរពីកំពង់ផែខាលីហ្វា (Khalifa) ប្រទេសអារ៉ាប់រួម។ នៅពេលកំពុងបើកកាត់ច្រកហ័រម៉ូសសុខៗ អ៊ីរ៉ង់ក៏បានបាញ់មីស៊ីលដាក់កប៉ាល់នោះតែម្ដង។ ក្រុមហ៊ុនម្ចាស់កប៉ាល់ថ្លែងថាសាកសពមនុស្សត្រូវគេប្រទះឃើញនៅចំណុចដែលរងការបាញ់ប្រហារ។ ប៉ុន្តែរហូតមកដល់ពេលនេះ គេមិនអាចកំណត់អត្តសញ្ញាណថានោះជាសាកសពរបស់នរណាពិតប្រាកដទេ។
ក្រោយការបាញ់ប្រហារនោះ នាវឹកជនជាតិថៃម្ភៃនាក់មានវាសនាវិលត្រឡប់ទៅមាតុភូមិវិញដោយសុវត្ថិភាព។ ប៉ុន្តែនាវឹកបីនាក់ទៀតនៅតែបន្តបាត់ខ្លួន។ គេសន្និដ្ឋានថាអ្នកទាំងនោះទំនងជាជាប់ផុងទៅណាមិនរួចនៅក្នុងបន្ទប់ដាក់ម៉ាស៊ីនកប៉ាល់។ គេបានបើកប្រតិបត្តិការស្វែងរកនៅក្នុងស្ថានភាពដ៏លំបាកព្រោះពេលនោះបន្ទប់ដាក់ម៉ាស៊ីនកប៉ាល់នោះមានទឹកចូល និងខូចខាតដោយសារអំបែងគ្រាប់។
ក្រសួងការបរទេសថៃថ្លែងថាខ្លួនសោកស្ដាយចំពោះដំណឹងនេះ និងថាគេបានយកដំណឹងនេះទៅជម្រាបជូនក្រុមគ្រួសារជនរងគ្រោះរួចហើយ។ ឆ្មាំបដិវត្តឥស្លាមថ្លែងកាលពីខែមីនាថាខ្លួនវាយប្រហារមិនត្រឹមតែកប៉ាល់ឈ្មោះមយូរា ណារីប៉ុណ្ណោះទេ ប៉ុន្តែក៏វាយកប៉ាល់ដាក់ទង់ជាតិប្រទេសលីបេរីយ៉ាផងដែរដែលបើកកាត់តាមច្រកសមុទ្រហ័រម៉ូសដោយមិនស្ដាប់ការព្រមានរបស់ពួកគេ៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ