រាជធានីភ្នំពេញ ៖ ប្រជាពលរដ្ឋដែលរស់នៅតាមបណ្ដាយស្ទឹងព្រែកត្នោត ក្នុងភូមិសាស្ត្រខណ្ឌដង្កោ រាជធានីភ្នំពេញ បាននិយាយថា គិតមកដល់ត្រឹមថ្ងៃទី០៣ ខែមេសា ឆ្នាំ២០២៦ នៅស្ទឹងព្រែកត្នោត…
រាជធានីភ្នំពេញ ៖ ប្រជាពលរដ្ឋដែលរស់នៅតាមបណ្ដាយស្ទឹងព្រែកត្នោត ក្នុងភូមិសាស្ត្រខណ្ឌដង្កោ រាជធានីភ្នំពេញ បាននិយាយថា គិតមកដល់ត្រឹមថ្ងៃទី០៣ ខែមេសា ឆ្នាំ២០២៦ នៅស្ទឹងព្រែកត្នោត គ្មានត្រីងាប់បន្តទៀតនោះទេ ។ ត្រីតូចធំរាប់រយក្បាល បានងាប់កាលពីប៉ុន្មានថ្ងៃមុនអស់បាត់ទៅហើយ ដែលសូម្បីតែកំពឹសក៏ងាប់អស់គ្មានសល់ដែរ ពេលនេះគ្មានត្រីសម្រាប់ចាប់ធ្វើម្ហូបបានឡើយ ។ ចំណែកអ្នកដែលមានមុខរបរជាអ្នកនេសាទ ធ្លាប់តែដាក់មង បង់សំណាញ់ ឬប្រើឧបករណ៍ផ្សេងៗ ដើម្បីចាប់ត្រីនៅក្នុងស្ទឹងនោះបានយកទៅលក់ដូរ ឬធ្វើម្ហូបប្រចាំថ្ងៃ ក៏មិនអាចរកចាប់ត្រីបានទៀតដែរ ។
ប្រជាពលរដ្ឋ បាននិយាយបន្តទៀតថា ត្រីដែលងាប់នៅក្នុងស្ទឹងព្រែកត្នោតនោះមានច្រើនប្រភេទ ដូចជាត្រីសណ្ដាយ ត្រីពោ ត្រីប្រា ត្រីក្រាយ ត្រីខ្យា ជាដើម។ល។ ដែលត្រីខ្លះធំៗ ១ក្បាល មានទម្ងន់៥ទៅជាង១០គីឡូក្រាមឯណោះ ជាពិសេសត្រីប្រា ត្រីពោ និងត្រីសណ្ដាយធំៗណាស់ ។ កន្លងមកពេលទៅឈរមាត់ស្ទឹងត្រង់ចំណុចកន្លែងអន្លង់ត្រី បានឮត្រីមាត់ ឬឃើញត្រីហែលដេញត្របាក់ចំណីមិនស្ងាត់នោះទេ ប៉ុន្តែចាប់ពីត្រឹមចុងខែមីនា និងចូលដល់ដើមខែមេសា ឆ្នាំ២០២៦នេះ ស្ងាត់មាត់ត្រីដូចចោរលួចសេះ ព្រោះត្រីងាប់អស់ហើយ ។
ប្រជាពលរដ្ឋបាននិយាយបន្ថែមទៀតថា កុំថា ឡើយតែត្រីច្រើនប្រភេទខាងលើដែលងាប់ សូម្បីតែកំពឹសក៏ងាប់អស់គ្មានសល់ដែរ ហើយចំណែកឯទឹកស្ទឹងនោះ ក៏នៅតែធំក្លិនស្អុយ ពុំទាន់អាចដងយកទៅប្រើការបាននៅឡើយ ។ ពួកគាត់ពុំដឹងថា អព្ភូតហេតុនោះកើតឡើងដោយសារអ្វីនោះទេ ហើយពួកគាត់ដឹងថា វាបានកើតឡើងតាំពីចំណុចស្ពាន៧មករា សង្កាត់ក្រាំងពង្រ រហូតដល់សង្កាត់សាក់សំពៅ និងសង្កាត់គងនយ ហើយទឹកស្អុយនោះក៏ហូតទៅដល់សង្កាត់ក្រោមៗទៀតក្នុងភូមិសាស្ត្រខណ្ឌដង្កោរាជធានីភ្នំពេញផងដែរ ។
សូមរម្លឹកថា ហេតុការណ៍ត្រីពុលងាប់នៅក្នុងទឹកស្ទឹងព្រែត្នោតខាងលើនេះ បានចាប់ផ្ដើមកើតមានឡើងតាំងពីអំឡុងថ្ងៃទី២៧ ខែមីនា ឆ្នាំ២០២៦មកម្ល៉េះ នៅភូមិសាស្ត្រសង្កាត់សាក់សំពៅ និងសង្កាត់គងនយ ខណ្ឌដង្កោ រាជធានីភ្នំពេញ ហើយរហូតដល់ថ្ងៃទី៣០ ខែមីនា ឆ្នាំ២០២៦ ទើបមានការភ្ញាក់ផ្អើលខ្លាំង ។ ក្រោយពេលទទួលបានដំណឹងនេះភ្លាម នៅថ្ងៃដដែលនេះ មន្ត្រីជំនាញ នៃក្រសួងបរិស្ថាន ក៏បានចុះទៅពិនិត្យទីតាំងស្ទឹងព្រែកត្នោត ត្រង់ចំណុចដែលមានត្រីងាប់នោះ និងកន្លែងផ្សេងៗទៀតជាច្រើនកន្លែងរួចមកហើយ ប៉ុន្តែនៅមិនទាន់រកមូលហេតុឃើញនៅឡើយ ៕
ចែករំលែកព័តមាននេះ