ខេត្តកំពង់ឆ្នាំង ៖ បន្ទាប់ពីទទួលព័ត៌មានពីសារព័ត៌មានកោះសន្តិភាពដែលបានចុះផ្សាយ អំពីស្ត្រីចំណាស់ម្នាក់ស្លុតចិត្ត ក្រោយពីទទួលដំណឹងអំពីការស្លាប់របស់កូនប្រុសរបស់គាត់ ដែលជាអ្នកទទួលបន្ទុកគ្រួសារ បានទទួលមរណភាពដោយសារខ្សែភ្លើងឆក់កាលពីព្រឹកថ្ងៃទី ៤ ខែកញ្ញាឆ្នាំ ២០២៥…
ខេត្តកំពង់ឆ្នាំង ៖ បន្ទាប់ពីទទួលព័ត៌មានពីសារព័ត៌មានកោះសន្តិភាពដែលបានចុះផ្សាយ អំពីស្ត្រីចំណាស់ម្នាក់ស្លុតចិត្ត ក្រោយពីទទួលដំណឹងអំពីការស្លាប់របស់កូនប្រុសរបស់គាត់ ដែលជាអ្នកទទួលបន្ទុកគ្រួសារ បានទទួលមរណភាពដោយសារខ្សែភ្លើងឆក់កាលពីព្រឹកថ្ងៃទី ៤ ខែកញ្ញាឆ្នាំ ២០២៥ ។ គួររំលឹកថា អ្នកម្ដាយស្លុតចិត្ត ពេលទទួលដំណឹងថាកូនប្រុសត្រូវខ្សែភ្លើងឆ.ក់ស្លា.ប់ពេលកំពុងធ្វើការនៅភ្នំពេញ និងស្នើសុំសប្បុរសជនជួយ
នៅព្រឹកថ្ងៃទី ៥ ខែកញ្ញាឆ្នាំ ២០២៥ លោក សេង វិចិត្រ អភិបាលស្រុក រលាប្អៀរ និងនិងក្រុមការងារបានចុះដល់លំនៅដ្ឋានស្ត្រីទុរគតខាងលើ មានឈ្មោះញ៉េប ប៉ាក់ អាយុ ៧២ឆ្នាំ រស់ក្នុងភូមិឃ្លៃ ឃុំជ្រៃបាក់ ស្រុករលាប្អៀរ។
លោក សេង វិចិត្រ អភិបាលស្រុករលាប្អៀរ បានបញ្ជាក់ថា ស្ត្រីចំណាស់ឈ្មោះ ញ៉េប ប៉ាក់ បានបាត់បង់កូនប្រុសឈ្មោះ ញ៉េប វាសនា អាយុ ៣៣ ឆ្នាំ ដោយសារការឆក់ខ្សែភ្លើងពេលធ្វើការនៅរាជធានីភ្នំពេញ។
ដោយមើលឃើញភាពទុក្ខលំបាកបែបនេះ លោកបានដឹកនាំក្រុមការងារនាំយកអំណោយមកផ្ដល់ជូន ស្ត្រីខាងលើមាន អង្ករ ៥០គីឡូក្រាម ទឹកសុទ្ធ១កេះ ទឹកផ្លែឈើ១កេះ ទឹកត្រីទឹកស៊ីអ៊ីវ និងថវិកាសរុប ៣០ម៉ឺនរៀល។ ដោយឡែក អាជ្ញាធរ ឃុំជ្រៃបាក់ បានឧបត្ថម្ភបង្ករ ២៥ គីឡូក្រាម ឃីត១កញ្ចប់ និងថវិកា ៥៣ម៉ឺនរៀល។ ក្នុងនាមលោកជាអាជ្ញាធរស្រុកសូមថ្លែងអំណរគុណដល់សារព័ត៌មានកោះសន្តិភាពដែលបានជួយផ្សាយពីទុក្ខលំបាករបស់ស្ត្រីខាងលើ នេះផងដែរ៕
ចែករំលែកព័តមាននេះ