ទីក្រុងគូឡាឡំាពួ៖ សមាគមអាស៊ានឯកភាពគ្នាថាគម្រោងរៀបចំការបោះឆ្នោតនៅមីយ៉ាន់ម៉ាមិនមែនជារឿងសំខាន់ខ្លាំងពេកដែលត្រូវដាក់ជាចំណុចអាទិភាពនោះទេ។ អាស៊ានជំរុញឱ្យរបបសឹករបស់លោកមីនអុងឡាំងបន្តអនុវត្តឱ្យបានខ្ជាប់ខ្ជួនទៅតាមអ្វីដែលធ្លាប់សន្យាចំពោះមុខអាស៊ាន។ ខាងលើនេះជាការលើកឡើងរបស់ប្រមុខការទូតម៉ាឡេស៊ីក្នុងនាមជាប្រធានអាស៊ានប្ដូរវេននៅឆ្នាំនេះ។
នេះក៏ជាការថ្លែងដើម្បីបញ្ជាក់ឱ្យបានច្បាស់។ បើមិនអីចឹងទេអាចនឹងមានការបកស្រាយច្រឡំថាអាស៊ានគាំទ្រគម្រោងរៀបចំការបោះឆ្នោតដែលប្រកាសដោយរបបសឹកកាលពីប៉ុន្មានខែមុននេះ។ រដ្ឋមន្ត្រីម៉ាឡេស៊ី លោកមូហាមេត ហាសាន ថ្លែងថាអាស៊ានចង់ឃើញមីយ៉ាន់ម៉ាឱ្យតម្លៃខ្ពស់ចំពោះផែនការសន្តិភាព៥ចំណុចដែលរបបសឹកធ្លាប់បានសន្យាកាលពីឆ្នាំ២០២១។
ក្រោយរដ្ឋប្រហារផ្ដួលរំលំលោកស្រីស៊ូជីបានប៉ុន្មានខែ របបសឹកសន្យាជាមួយអាស៊ានដូចខាងលើនេះ។ ជាពិសេស ការបិទបញ្ចប់អរិភាពនឹងគ្នា និងការអនុញ្ញាតឱ្យដឹកជំនួយមនុស្សធម៌។ គេសង្កេតឃើញថាផែនការសន្តិភាពនោះភាគច្រើនមិនសូវអនុវត្តបានជោគជ័យទេ។ របបសឹកមិនចង់សន្ទនាគ្នាជាមួយក្រុមប្រឆាំងទេព្រោះពួកគេគិតថាអ្នកទាំងនោះជាក្រុមភេរវករ។
ហេតុនេះ លោកមហាមេតថ្លែងប្រាប់អ្នកសារព័ត៌មានថាការបោះឆ្នោតមិនមែនជាចំណុចសំខាន់ជាអាទិភាពទេនៅក្នុងផែនការសន្តិភាពទាំង៥ចំណុច។ យើងសូមជូនយោបល់ទៅមីយ៉ាន់ម៉ាថាអ្វីដែលជាចំណុចអាទិភាពគឺការបិទបញ្ចប់អំពើហិង្សាគ្រប់ប្រភេទដើម្បីឱ្យគ្រប់ភាគីអាចអង្គុយសន្ទនាគ្នាបាន។
ប្រមុខការទូតរូបនេះសូមបញ្ជាក់ឱ្យបានច្បាស់ថាអាស៊ាននឹងមិនទទួលស្គាល់ជាដាច់ខាតនូវលទ្ធផលបោះឆ្នោតដែលមិនចូលរួមដោយគ្រប់ភាគី។ ការបោះឆ្នោតមិនពេញលេញមិនមែនជារឿងត្រឹមត្រូវនោះទេ។ ការបោះឆ្នោតរបៀបនេះមិនត្រឹមតែមិនអាចដោះស្រាយបញ្ហាបានប៉ុណ្ណោះទេ ប៉ុន្តែថែមទាំងធ្វើឱ្យស្ថានការណ៍នយោបាយកាន់តែអ័ព្ទអួ៕
អត្ថបទពាក់ព័ន្ធ
របបសឹកមីយ៉ាន់ម៉ាប្រកាសបោះឆ្នោតដោយសេរី និងយុត្តិធម៌នៅចុងឆ្នាំនេះ ឬដើមឆ្នាំក្រោយ
ចែករំលែកព័តមាននេះ