ទីក្រុងហាណូយ៖ វៀតណាមមុនដំបូងខំអរបានចុះកិច្ចព្រមព្រៀងពាណិជ្ជកម្មមុនគេមុនឯងនៅក្នុងក្របខណ្ឌអាស៊ាន។ ចុងក្រោយនេះសភាពការណ៍ប្រែប្រួល ត្រាំក្រឡាស់សម្ដីភ្លាម១រំពេច។ ទីក្រុងហាណូយមានចិត្តខឹងសម្បារ និងលែងទុកចិត្តអាមេរិកហើយព្រោះលោកត្រាំប្រកាសយកពន្ធគយទៅលើទំនិញវៀតណាមលើសពីកម្រិតដែលមាននៅក្នុងកិច្ចព្រមព្រៀង។
ប្រភពដែលដឹងកិច្ចការផ្ទៃក្នុងវៀតណាមបានប្រាប់អ្នកសារព័ត៌មានអំពីបញ្ហានេះ ហើយត្រូវទស្សនាវដ្ដីប៉ូលីទីកូ (Politico) ចុះផ្សាយមុនគេ។ នៅក្នុងស្ថានភាពនេះ គេមានចំណុចសង្ស័យថាតើអាមេរិក និងវៀតណាមពិតជាចរចាត្រូវរ៉ូវគ្នា និងចុះកិច្ចព្រមព្រៀងពាណិជ្ជកម្មមែន ឬយ៉ាងណា? បើតាមលោកត្រាំ លោកប្រកាសថាប្រទេសទាំង២បានព្រមព្រៀងគ្នាហើយ។
ថ្មីៗនេះ វៀតណាមជឿជាក់ថាខ្លួនចរចាត្រូវរ៉ូវគ្នារួចហើយជាមួយអាមេរិកអំពីអត្រាពន្ធ។ ប៉ុន្តែមិននឹកស្មានថាចុងក្រោយនេះ លោកត្រាំប្រកាសពន្ធទៅលើទំនិញវៀតណាមខ្ពស់ដដែល។ ហេតុនេះ ទីក្រុងហាណូយមិនទទួលស្គាល់ជាផ្លូវការទេនូវកិច្ចព្រមព្រៀងដែលលោកត្រាំបានប្រកាសកាលពីសប្ដាហ៍មុន។ កាលនោះ ត្រាំថាលោកតូឡាម ប្រធានាធិបតីវៀតណាម បានអនុម័តយល់ព្រមទៅលើកិច្ចព្រមព្រៀងនោះហើយ។
ដោយសារភាគីទាំង២និយាយតែមាត់ទទេ និងមិនបានបង្ហាញឯកសារជាផ្លូវការ ដូច្នេះ គេមិនទាន់ដឹងថាតើពិតជាមានកិច្ចព្រមព្រៀងជាមួយគ្នាមែន ឬយ៉ាងណា? កាលពីថ្ងៃទី២ ខែកក្កដា លោកត្រាំបង្ហោះសារនៅលើបណ្ដាញសង្គមថាវៀតណាមជាប្រទេសទី២ (បន្ទាប់ពីអង់គ្លេស) ដែលបានចរចាបញ្ហាពន្ធរហូតដល់សម្រេចបានកិច្ចព្រមព្រៀងជាមួយគ្នា។ លោកសរសេរបន្តទៀតថាទំនិញវៀតណាមនាំចូលអាមេរិកឯកភាពគ្នាយកពន្ធគយ២០%។
ជាការឆ្លើយតប លោកត្រាំថាវៀតណាមយល់ព្រមបើកចំហទីផ្សារសម្រាប់ទំនិញនាំចូលពីអាមេរិក។ ពោលគឺទំនិញអាមេរិកនាំចូលវៀតណាមឯកភាពគ្នាយកពន្ធគយសូនភាគរយ។ ប៉ុន្តែការប្រកាសរបស់លោកត្រាំនៅលើបណ្ដាញសង្គមបានបង្កការភ្ញាក់ផ្អើលសម្រាប់វៀតណាម។ ប្រភពដែលស្នើសុំមិនបញ្ចេញឈ្មោះប្រាប់ថាមុនដំបូង វៀតណាមស្មានថាត្រាំយកពន្ធត្រឹមក្បែរ១១%ប៉ុណ្ណោះ។ ក្រោយពេលលោកត្រាំបង្ហោះសារនោះ វៀតណាមរក្សាភាពស្ងប់ស្ងាត់ មិនធ្វើអត្ថាធិប្បាយអ្វីទេ។
អ្នកជំនាញខ្លះបារម្ភថាវៀតណាម និងអាមេរិកស្រួលមិនស្រួលអាចនឹងមានបញ្ហាជាមួយគ្នាដោយសារការនិយាយក្រឡិចក្រឡុច។ កាលពីឆ្នាំ២០០២ ទំហំដោះដូរពាណិជ្ជកម្មរវាងប្រទេសទាំង២គឺ២,៩ពាន់លានដុល្លារ។ ឆ្នាំ២០២២កើនឡើងដល់ជាង១៣៩ពាន់លានដុល្លារ។ ប៉ុណ្ណឹងនៅមិនដល់ចិនទេ។ ប្រទេសចិននៅតែជាដៃគូពាណិជ្ជកម្មធំជាងគេរបស់វៀតណាមជាមួយនឹងទំហំពាណិជ្ជកម្មជាង២រយពាន់លានដុល្លារ។ ខាងលើនេះជាការដកស្រង់ប្រភពពីសារព័ត៌មានដឹណេសិន (The Nation)៕
ចែករំលែកព័តមាននេះ