ទីក្រុងបាងកក៖ បន្ទាប់ពីគណបក្សភូមិចៃថៃប្រកូកប្រកាសថាខ្លួនកៀងគរបានសំឡេងអ្នកតំណាងរាស្ត្រគ្រប់គ្រាន់ដើម្បីបោះឆ្នោតគាំទ្របេក្ខជនខ្លួនជានាយករដ្ឋមន្ត្រីថ្មី គណបក្សភឿថៃប្រកាសថាខ្លួនក៏កំពុងត្រៀមចរចាជាមួយគណបក្សនយោបាយ១ចំនួនដើម្បីបង្កើតរដ្ឋាភិបាលចម្រុះថ្មីផងដែរ។ នេះបើយោងតាមការបញ្ជាក់របស់នាយករដ្ឋមន្ត្រីស្ដីទីថៃ លោកភូមិថាម វិឆាយ៉ាឆៃ។ មន្ត្រីគណបក្សភឿថៃដែលស្នើសុំមិនបញ្ចេញឈ្មោះប្រាប់ថាភឿថៃនឹងតែងតាំងលោកឆៃកាសឺម (Chaikasem) ជាបេក្ខជននាយករដ្ឋមន្ត្រី។
លោកឆៃកាសឺមសព្វថ្ងៃនេះមានអាយុ៧៧ឆ្នាំ ជាអ្នកច្បាប់ ជាអតីតអគ្គព្រះរាជអាជ្ញា និងជាអតីតរដ្ឋមន្ត្រីក្រសួងយុត្តិធម៌។ លោកឆៃកាសឺមជាបេក្ខជនចុងក្រោយគេរបស់ភឿថៃដែលបញ្ជូនឈ្មោះទៅគណៈកម្មការរៀបចំការបោះឆ្នោតឆ្នាំ២០២៣។ ទោះបីគាត់មានបទពិសោធនយោបាយតិចតួចស្ដួចស្ដើង ប៉ុន្តែគណបក្សភឿថៃអស់ជម្រើសហើយ បើមិនតែងតាំងលោកឆៃកាសឺមទេ មិនដឹងត្រូវតែងតាំងអ្នកណាទេ។
គេមិនទាន់ដឹងថាតើលោកឆៃកាសឺមអាចដឹកនាំប្រទេសកើតឬអត់។ ជាពិសេសការធ្វើកំណែទម្រង់ ឬការនាំប្រទេសជាតិឱ្យចាកផុតពីបញ្ហាសេដ្ឋកិច្ចធ្លាក់ចុះប្រហែលជាពិបាកបន្តិចសម្រាប់អ្នកដៃថ្មីដូចជារូបលោក។ ក្រុមអ្នកវិភាគយល់ថាបើប្រទេសថៃបណ្ដែតបណ្ដោយឱ្យមានវិបត្តិនយោបាយជាបន្តទៀតមិនកើតទេ។ សេដ្ឋកិច្ចអាចនឹងមានបញ្ហាកាន់តែខ្លាំង។
ទោះបីស្ថានការណ៍ធ្លាក់ចុះដល់ប៉ុណ្ណឹងហើយបន្ទាប់ពីតុលាការធម្មនុញ្ញដកតំណែងមេរបស់ខ្លួន ប៉ុន្តែគណបក្សភឿថៃនៅតែអះអាងថាខ្លួនអាចដើរកៀងគរកម្លាំងគាំទ្រគ្រប់គ្រាន់នៅសភាដើម្បីបន្តកាន់អំណាច។ នេះបើយោងតាមលោកភូមិថាមនិយាយក្រោយពេលជួបមន្ត្រីជាន់ខ្ពស់របស់គណបក្សនយោបាយចំនួន៥យ៉ាងតិច។
គណបក្សរួមថៃសាងជាតិ (United Thai Nation), ប្រជាធិបតេយ្យ, ឆាតថៃប៉ាតាណា (Chartthaipattana), ប្រឆាឆាត (Prachachat) និងឆាតប៉ាតាណា (Chart Pattana) បានបញ្ជូនអ្នកតំណាងរបស់ខ្លួនទៅចូលរួមកិច្ចពិភាក្សាជាមួយភឿថៃ។ ឥឡូវនេះមាន២ក្រុមដែលត្រៀមប្រជែងគ្នានៅក្នុងការជ្រើសរើសនាយករដ្ឋមន្ត្រីថ្មី។ មួយគឺគណបក្សភឿថៃ និងមួយទៀតគឺគណបក្សភូមិចៃថៃដែលកំពុងដើរកៀងគរកម្លាំងដូចគ្នា។
ប៉ុន្តែគេមិនដឹងថាតើភឿថៃអាចប្រកួតឈ្នះភូមិចៃថៃដែរឬទេព្រោះប្រធានគណបក្សភូមិចៃថៃ លោកអនុទីន បានប្រកាសរួចហើយថាលោកមានសំឡេងគ្រប់គ្រាន់នៅសភាដើម្បីក្លាយជានាយករដ្ឋមន្ត្រី។ លោកទើបតែចងសម្ព័ន្ធភាពជាមួយគណបក្សប្រជាជនដែលមានអ្នកតំណាងរាស្ត្ររហូតដល់១៤៣រូបច្រើនជាងគណបក្សភឿថៃទៅទៀត។ ទោះជាយ៉ាងណាក្ដី លោកភូមិថាមនៅតែនិយាយដោយទំនុកចិត្តថាចាំមើលចុះ ភឿថៃនៅតែអាចបង្កើតរដ្ឋាភិបាលថ្មីបាន។ យើងមិនចង់ឱ្យមានការជាប់គាំងនយោបាយទេ។
គួរកត់សម្គាល់ថាលោកឆៃកាសឺមដែលលេចឮល្ហៀងៗមកថានឹងតែងតាំងជាបេក្ខភាពនាយករដ្ឋមន្ត្រីរបស់ភឿថៃនោះគ្រាន់តែជាដំណឹងក្រៅផ្លូវការទេ។ លោកភូមិថាមមិនបានបញ្ជាក់ជាចំហថាភឿថៃនឹងតែងតាំងលោកឆៃកាសឺមឡើយ។ បេក្ខភាពមួយចំនួនដែលត្រៀមបញ្ជូនឈ្មោះទៅសភា ហើយអាចនឹងក្លាយជានាយករដ្ឋមន្ត្រីថ្មីមានដូចជាលោកអនុទីន, លោកឆៃកាសឺម, លោកភីរ៉ាផាន (Pirapan), លោកប្រាយុទ្ធចាន់អូចា និងបេក្ខជនមួយចំនួនទៀតដែលគេមិនសូវស្គាល់។ ប៉ុន្តែគេគិតថាលោកប្រាយុទ្ធដែលបច្ចុប្បន្នជាសមាជិកក្រុមប្រឹក្សាព្រះរាជបល្ល័ង្គលោកប្រហែលជានឿយណាយពីនយោបាយហើយ៕
ចែករំលែកព័តមាននេះ