ខេត្តកំពង់ចាម៖​​ យ៉ាងហោចណាស់ផ្ទះប្រជាពលរដ្ឋ១០ខ្នង រងផលប៉ះពាល់ដោយសារភ្លៀងលាយឡំនឹងខ្យល់កន្ត្រាក់បោកបក់​កួចយ៉ាងខ្លាំង និងបានបំផ្លិចបំផ្លាញចម្ការដំណាំចំនួន២កន្លែង ក្នុងស្រុកចំការលើ ខេត្តកំពង់ចាម។

យោងតាមការចុះផ្សាយរបស់រដ្ឋបាលខេត្តកំពង់ចាម បានឱ្យដឹងថាប្រជាពលរដ្ឋ ៣ភូមិ ក្នុង ឃុំតាប្រុក និង ៣ភូមិទៀត ក្នុងឃុំល្វាលើ ស្រុកចំការលើ ​បានរងគ្រោះដោយខ្យល់កន្ត្រាក់ សរុប ១២គ្រួសារ។ ហេតុការណ៍នេះ បានកើតឡើង កាលពីម៉ោង ៦ល្ងាច ថ្ងៃទី២៨ ខែសីហា ឆ្នាំ២០២៥ ដែលពេលនោះ មានភ្លៀងលាយឡំនឹងខ្យល់កន្ត្រាក់បក់​កួចយ៉ាងខ្លាំង បានបំផ្លាញចម្ការតាសក់២កន្លែង ទំហំ ៤២អា ហើយធ្វើឱ្យផ្ទះ ១០ខ្នង ក្នុងភូមិនាងឡើង ភូមិស្រែប្រាំង-ភូមិត្រពាំងបី- ភូមិ៣ និងភូមិល្វាជើង ត្រូវរបើកដំបូលស័ង្កសី រងផលប៉ះពាល់កម្រិតមធ្យម និងកម្រិតស្រាល ។

លុះនៅព្រឹកថ្ងៃទី២៩ ខែឧសភា ឆ្នាំ២០២៥ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានចាត់លោកជំទាវ ប៉ាង ដានី រួមដំណើរដោយ ឯកឧត្តមនាយកសាខា រួមជាមួយមន្ត្រីអនុសាខាស្រុក ក្រុមកាកបាទក្រហមកម្ពុជាឃុំ និងអ្នកស្ម័គ្រចិត្តភូមិ បានចុះជួបសំណេះសំណាល សួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋ​ដែលរងគ្រោះដោយខ្យល់កន្ត្រាក់ សរុប ១២គ្រួសារ​៕