ខេត្តបាត់ដំបង ៖ ក្នុងចំណោមបេក្ខជនដែលបានចូលរួមប្រឡងសញ្ញាបត្រមធ្យមសិក្សាទុតិយភូមិ ជាក់ស្ដែងក្នុងរយៈពេល០២ថ្ងៃក្នុងមណ្ឌលបាត់ដំបង នៃសម័យប្រឡងថ្ងៃទី២៨ និង២៩ សីហា ឆ្នាំ២០២៥ មានចំនួន៩,៣៤៤នាក់ ក្នុងនោះ…
ខេត្តបាត់ដំបង ៖ ក្នុងចំណោមបេក្ខជនដែលបានចូលរួមប្រឡងសញ្ញាបត្រមធ្យមសិក្សាទុតិយភូមិ ជាក់ស្ដែងក្នុងរយៈពេល០២ថ្ងៃក្នុងមណ្ឌលបាត់ដំបង នៃសម័យប្រឡងថ្ងៃទី២៨ និង២៩ សីហា ឆ្នាំ២០២៥ មានចំនួន៩,៣៤៤នាក់ ក្នុងនោះ មានបេក្ខជនចំនួន០៦នាក់បានជួបបញ្ហាសុខភាព តែត្រូវបានក្រុមអនុរក្ស និងក្រុមគ្រូពេទ្យជួយសង្គ្រោះ និងសម្របសម្រួលបានប្រឡប់រហូតបានចប់គ្រប់វិញ្ញាសារ ។ នេះបើតាមប្រសាសន៍លោកប្រធានមន្ទីរអប់រំយុវជន និងកីឡាខេត្ត។
លោក យី សុងគី ប្រធានមន្ទីរអប់រំយុវជន និងកីឡាខេត្ត បានថ្លែងប្រាប់កោះសន្តិភាពពីបញ្ហានេះ នៅព្រឹកថ្ងៃទី៣០ សីហា ថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិឆ្នាំនេះ(២០២៥) មានបេក្ខជនប្រឡងចំនួន០៦នាក់ បានជួបបញ្ហាសុខភាព តែពួកគេត្រូវបានក្រុមគ្រួពេទ្យប្រឹកប្រែងជួយសង្គ្រោះ និងតាមដានសុខភាពជាប្រចាំរហូតប្រឡងបានចប់ចុងចប់ដើម មិនខកខានមួយវិញ្ញាសារណាឡើយ។ ប៉ុន្តែត្រង់ចំណុចបេក្ខជនមានបញ្ហាសុខភាពនេះ លោកប្រធានមន្ទីរបានបញ្ជាក់ដូច្នេះថា «បេក្ខជនដែលមានបញ្ហាសុខភាព ត្រូវបានក្រុមគ្រួពេទ្យ និងក្រុមអនុរក្សរៀបចំបន្ទប់ប្រឡងដាច់ដោយឡែក ។
ដោយឡែក បេក្ខជនខ្លះ ដែលមានស្ថានភាពហាក់ធ្ងន់បន្តិច ដែលគ្រូពេទ្យត្រូវតាមដានសុខភាពជាប្រចាំត្រូវបានរៀបតុប្រឡងនៅក្បែរទ្វាររថយន្តសង្គ្រោះតែម្ដង ដើម្បីងាយស្រួលដល់ការជួយសង្គ្រោះ» ។ សម្រាប់សម័យប្រឡង«សញ្ញាបត្រមធ្យមសិក្សាទុតិយភូមិ» ឆ្នាំ២០២៥នេះ ខេត្តបាត់ដំបង មានមណ្ឌលប្រឡងសរុបចំនួន១៤ និងមានបន្ទប់ប្រឡងសរុបចំនួន៣៨៤ ។ បេក្ខជនដែលមានសិទ្ធិត្រូវប្រឡងមានសរុបចំនួន៩៤៩១នាក់។ ប៉ុន្តែមានតែបេក្ខជនចំនួន៩៣៤៤នាក់ប៉ុណ្ណោះ ដែលបានមកប្រឡងជាក់ស្ដែង។ នេះបើតាមយោងតាមរបាយការណ៍បឋមរបស់ការិយាល័យជំនាញនៃមន្ទីរអប់រំយុវជន និងកីឡាខេត្ត ។
ប៉ុន្តែយ៉ាងណា លោក យី សុងគី ប្រធានមន្ទីរអប់រំយុវជន និងកីឡា បានបញ្ជាក់ថា ស្ថានភាពទូទៅ នៃសម័យប្រឡង«សញ្ញាបត្រមធ្យមសិក្សាទុតិយភូមិ»ក្នុងឆ្នាំ២០២៥ នេះ ដំណើរការបានយ៉ាងល្អប្រសើរស្ទើរគ្រប់បែបយ៉ាង។ កិច្ចការពារសន្តិសុខរបស់កម្លាំងសមត្ថកិច្ច ការការពារថែរក្សាកេះដាក់វិញ្ញាសារប្រឡង និងស្ថានភាពបេក្ខជនប្រឡងមានវិន័យ និងសណ្ដាប់ធ្លាប់ល្អ។
ពោល៖ គ្រប់បែបយ៉ាង គ្រប់មណ្ឌលនៃដំណើរការប្រឡប«បាក់ឌុប«ឆ្នាំនេះ គឺល្អប្រសើរគួរឲ្យកត់សម្គាល់ ។ លោកប្រធានមន្ទីរក៏បានបង្ហាញពីក្ដីសង្ឃឹម និងមានសុទិដ្ឋិនិយមថា «បើយោងពីស្ថានភាពការសិក្សា និងចំណេះដឹងនៃបេក្ខជនទូទៅ និងវិញ្ញាសារប្រឡងក្នុងឆ្នាំនេះ បេក្ខជនអាចនឹងមានចំនួនច្រើនជាងសម័យប្រឡងឆ្នាំមុនៗ ដែលនឹងទទូលបានពិន្ទុះល្អ» ៕
ចែករំលែកព័តមាននេះ